Vikublaðið

Skipulagsráð Akureyrarbæjar hefur frestað afgreiðslu á fyrirspurn frá fyrirtækinu SS Byggis ehf. um kaup eða úthlutun á landi til stækkunar á frístundabyggðinni Hálöndum í Hlíðarfjalli. Meirihluti ráðsins vísar til þess að svæðið sé hluti af Græna treflinum, þar sem trjáplöntum hefur verið plantað undanfarin ár. Afgreiðslu er frestað þar til umsögn umhverfis- og mannvirkjaráðs liggur fyrir auk þess sem samráð á að hafa við Norðurorku.

Flestir nemendur dagskóla Verkmenntaskólans á Akureyri koma af svæðinu. Um 58% nemenda skólans eru með lögheimili á Akureyri og hækkar hlutfallið í 77% þegar litið er til Eyjafjarðar alls.

Aðventuundirbúningur er kominn á fullan skrið í Kjarnaskógi og eru fyrstu lifandi jólatrén þegar farin að birtast í verslunum bæjarins, en lögð er áhersla á að bjóða aðeins upp á raunveruleg tré af heimamarkaði að sögn Ingólfs Jóhannssonar framkvæmdastjóra Skógræktarfélags Eyfirðinga.

Sjálfboðaliðar björgunarsveitanna ganga í hús og verða á ferðinni dagana 4.–8. nóvember með Neyðarkallinn til sölu. Með kaupum á kallinum getur almenningur stutt við mikilvægt björgunar- og slysavarnastarf.