Vilja skoða að Norðurþing sjái sjálft um sorphirðu

Gámasvæði Íslenska gámafélagsins. Mynd: Vikudagur/epe

Framkvæmdanefnd Norðurþings fjallaði nýverið um sorpmál í sveitarfélaginu, mögulega upptöku klippikorta og endurnýjun samninga við þá aðila sem sinna sorphirðu í sveitarfélaginu.

Framkvæmda- og þjónustufulltrúa var í kjölfarið falið að boða til íbúafundar þar sem farið verður yfir sorpmál sveitarfélagsins í beinu framhaldi af útgáfu klippikorta.

Vilja að sveitarfélagið sjái sjálft um sorphirðu

Á fundi sveitarstjórnar í síðustu viku lögðu fulltrúar Framsóknarflokks og Samfylkingar til að tekið verði til skoðunar að sveitarfélagið taki sorpmálin yfir sjálft, s.s. sorphirðu. Í tillögunni sem Hjálmar Bogi Hafliðason fékk bókaða kemur fram að samningar um sorphirðu fyrir austursvæðið renna út um áramót annars vegar og samningar við Íslenska gámafélagið á Húsavík og í Reykjahverfi renna út næst vor. „Samhliða þessu verði starfsemi Þjónustustöðvanna endurskoðuð. Í þessu felast tækifæri að byggja upp öfluga Þjónustu- og flokkunarstöð í húsnæði sveitarfélagsins í Víðimóum,“ segir í bókuninni sem var samþykkt.

„Stöndum á tímamótum“

Hjálmar Bogi Hafliðason segir í skriflegu svari við fyrirspurnum Vikudags að sveitarfélagið Norðurþing standi á tímamótum í sorpmálum. „Í framkvæmdanefnd er nefnd að störfum sem er ætlað að endurskoða starfsemi Þjónustustöðvar (áhaldahúss); hvaða þjónustu við ætlum að veita, hvernig, með hvaða tækjabúnaði o.s.frv. Samingar um sorpmál renna út á austursvæðinu annars vegar um næstu áramót og hinsvegar næsta vor við ÍG [Íslenska gámafélagið] fyrir Húsavík og Reykjahverfi. Það hlýtur því að vera ein sviðsmyndin að skoða samlegðina í þessu, þ.e. styrkja starfsemi Þjónustustöðvar og huga að því hvernig við getum gert betur í sorpmálum,“ segir hann.

Þá segir Hjálmar Bogi að auðveldasta leiðin sé að bjóða þjónustuna út, þá þurfi sveitarfélagið ekki að huga að þjónustunni að öðru leyti en að borga fyrir hana. „Hitt er að taka málið til skoðunar og stuðla að bættri sorpmenningu; hvernig umgöngumst við sorpið, hvað við kaupum, hverju við hendum og hvernig. Stofnanir sveitarfélagins eru t.d ekki nægilega duglegar að flokka og höfða til ábyrgrar neyslu,“ segir hann.

Segir meirihlutann vilja sem minnst af málinu vita

Hjálmar Bogi bætir við að það sé ýmislegt sem ÍG geti gert betur og gagnrýnir fyrirtækið fyrir að hafa ekki staðið við að lækka sorphirðugjöld. Jafnframt gagnrýnir hann meirihlutann fyrir að sína málinu ekki áhuga. „Minnisstæðast er þegar þáverandi forstjóri ÍG sagði að þeir gætu lækkað sorphirðugjöld um helming. Það hefur aldeilis ekki orðið raunin. Við greiðum ein hæstu sorphirðugjöld á landinu og meirihlutinn hagar sér eins og hann vilji sem minnst af málinu vita. Við eigum að sýna ábyrgð í þessu og ein leiðin er að gera málið sjálf.“

Ekki bjartsýnn fyrirfram

Óli Halldórsson sveitarstjórnarfulltrúi Vinstri grænna segist taka tillögunni með opnum hug en er ekki bjarsýnn á að tillagan geti orðið hagkvæmasti kosturinn í stöðunni. „Almenna reglan er sú að það er ekkert sveitarfélag að hirða sorp sjálft lengur nú þegar það er svona mikið flokkað. Ég yrði mjög hissa á ef það yrði hagkvæmt. Hins vegar eftir að ég sá þessa tillögu koma fram þá finnst mér sjálfsagt að þessi kostur sé skoðaður eins og aðrir. Að það sé kannað hvort hann sé raunhæfur og þá hvort það sé áhugavert eða ekki. Ég er ekki bjartsýnn á það fyrir fram. En af heilum hug finnst mér sjálfsagt að skoða þetta eins og annað,“ segir hann í samtali við Vikudag.

Eftir að hafa kynnt sér sorpmálin segir Óli að sveitarfélögin séu fæst að standa í þessum rekstri sjálf eftir að flokkun og meiri meðhöndlun sorps var tekin upp. „Ég þekki ekkert dæmi sjálfur þar sem sveitarfélag er alveg í eigin rekstri í sorpmálum,“ segir hann.

Óli telur að þessi málaflokkur hafi gengið í mörgum atriðum vel en segir ekkert gefið í því hvaða leið sé best. „Það hefur t.d. lækkað rekstrarkostnaður við þetta en ég vil aldrei gefa mér það fyrir fram að menn versli við eitthvað eitt fyrirtæki frekar en annað í þessu. Samningar eru að losna og þá er um að gera að fara í besta mögulega kost.“

Settu hundruð milljóna í málaflokkinn

Hann bendir á að sveitarstjórn hafi í upphafi þessa kjörtímabils sett hudruð milljóna króna í þennan málaflokk. „Við stóðum frammi fyrir því að borga upp hundruð milljóna króna í málaflokkinn frá fyrra rekstrarformi þegar sveitarfélögin sjálf brenndu sorpið. Frá þeim tímapunkti hefur allt verið upp á við, bæði umhverfislega og rekstrarlega en það er án efa hægt að gera frekari úrbætur,“ segir Óli.

Þá segir Óli það alrangt að meirihlutinn vilji ekkert af sorpmálunum vita. „Þessi málaflokkur er eitt af því sem við erum stolt af. Nú er það orðið viðtekin venja hjá íbúum að flokka sorp, eitthvað sem þekktist ekki fyrir fimm árum síðan. Þetta eru orðin ósköp eðlileg vinnubrögð sem ég held að enginn vilji fara út úr aftur.“