Tæplega 2000 manns skrifað undir mótmæli vegna deiliskipulags Drottningarbrautarreits
Tæplega 2000 manns hafa skrifað undir mótmæli á því deiliskipulagi sem nú liggur fyrir um Drottningarbrautarreit á Akureyri og verða undirskriftirnar afhentar bæjaryfirvöldum í dag. Í tilkynningu sem Vilhjálmur Bergmann Bragason hefur sent frá sér fyrir hönd mótmælenda, er mikil andstaða á meðal bæjarbúa við þetta skipulag, en skipulagið hafi það í för með sér að mörg elstu og sögufrægustu hús bæjarins sem hafa átt sinn sess í bæjarmyndinni um árabil hverfi á bak við nýbyggingar. Bæjarráð Akureyrar virðist ætla að fórna þessari fallegu bæjarmynd fyrir skammtímahagsmuni og án þess að vega og meta hin sögulegu verðmæti sem eru í húfi til fulls, en þessar skipulagshugmyndir eru algjörlega úr takti við vilja bæjarbúa. Gríðarlegur fjöldi athugasemda hefur einnig borist frá ýmsum aðilum, bæði leiðsögumönnum og öðrum ferðaþjónustuaðilum sem telja þessar breytingar ekki til framdráttar fyrir ferðaþjónustu á Akureyri, en í því samhengi er bent á mikilvægi þess að standa vörð um það sem einkennir bæinn svo sterkt. Það er enginn á móti uppbyggingu og allir vilja bænum sínum vel og vona svo sannarlega að Akureyri vaxi og dafni. En þetta er ekki rétta leiðin, svo mikið er víst. Þá er mikil óánægja með skipulagið hjá íbúum á umræddu svæði, en hjá mörgum þeirra verða lóðir skertar, auk þess sem að flestir íbúar á svæðinu glata því útsýni sem þeir hafa að miklu eða öllu leyti. Hefur hópur íbúa á svæðinu nú þegar tekið sig saman og haft samband við lögfræðing, en ljóst er að Akureyrarbæ er ekki stætt á slíkum aðgerðum án þess að greiða bætur fyrir. Íbúar á svæðinu halda þó enn í þá von að bæjaryfirvöld hlusti á raddir bæjarbúa og sjái að sér áður en óafturkræfur skaði er skeður. Athygli vekur að sérstaklega mikil andstaða er við framkvæmdirnar á meðal ungs fólks og hafa margir haft orð á því að merkilegt sé að ungt og framsækið fólk skuli bera meira skynbragð á söguleg verðmæti og mikilvægi bæjarmyndarinnar heldur en fólkið sem starfar fyrir bæinn. Undirskriftum var safnað víða um bæinn, en einnig á netinu. Þar gátu mótmælendur einnig skilið eftir ummæli og nýtti fjöldi fólks sér þann möguleika, segir í tilkynningu Vilhjálms. Hann segir það einlæga von þeirra sem standa að mótmælunum að bæjaryfirvöld hlusti á raddir bæjarbúa og falli frá þessum áformum. Við skorum á yfirvöld að standa með sínu fólki og standa vörð um bæjarmynd Akureyrar.
Nýjast
-
Þá er vorið loksins komið
Já vorið er sú árstíð sem ég elska mest. Sennilega er það líka ljótasta árstíðin. Allt skítugt, grasið gulbrúnt, tré og runnar berir. En svo breytist allt á augabragði. Og daginn sem sólgulur fífill brosir við mér, feit hunangsfluga flýgur framhjá, eða kónguló spásserar yfir borðið sem ég sit við, þá hellist þessi barnslega gleði og tilhlökkun vegna sumars sem er í vændum yfir mig. En besta vormerkið er án efa að það birtir. -
Íshokkí í aldarfjórðung 25 ár frá stofnun kvennaliðs SA í íshokkí
„Þetta er ein hraðasta íþrótt í heimi. Ég hef lýst henni á þann veg að leikmaður er í 100 metra hlaupi á fullum hraða, gefi allt í sprettinn, með 10-15 kg aukalega á sér ásamt því að tveir menn hangi á honum. Það þarf að huga að kylfu og hvar pökkurinn er auk þess sem farið er um á örmjóu blaði. Íshokkí reynir mjög mikið á leikmenn, þeir þurfa að vera í góðu formi, sterkir og hafa gott jafnvægi,“ segir Jónína Margrét Guðbjartsdóttir. Hún var ein af þeim konum sem tók þátt í að stofna kvennalið Skautafélags Akureyrar fyrir 25 árum og er enn að, spilar með og þjálfar að auki U16 kvenna hjá félaginu -
Einstök upplifun í Grobbholti
-Sauðfjárbúið á Húsavík sem dregur að sér hundruði gesta á hverju vori -
Gamla verslunin í Vaglaskógi jöfnuð við jörðu
„Það eiga margir góðar minningar um þessa verslun,“ segir Helen Jónsdóttir en gamla góða búðin í Vaglaskógi var jöfnuð við jörðu nýverið. Allt var tekið nema hellan fékk að vera og væntir Helen þess að eitthvað verði gert á staðnum. „Vonandi verður settur upp fallegur áningarstaður þarna, með borðum og bekkjum og jafnvel skilti sem greinir frá sögu verslunarinnar.“ -
Hamrastígur og Kirkjugarðsstígur Finnur ehf bauð lægst í stígagerðina
Gengið verður til samninga við lægstbjóðenda, Finn ehf í gerð tveggja stíga á Akureyri, Hamrastígs og Kirkjugarðsstígs, en fyrirtækið átti lægsta boð í bæði verkin. -
Alþjóðaflugvöllur á Akureyri verði byggður upp
Sveitarfélögin á Norðurlandi vestra og Norðurlandi eystra skora á ríkisstjórn Íslands og Alþingi að koma rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi, sem hefur það að markmiði að alþjóðaflugvöllurinn sé byggður upp og kynntur sem ein af gáttum Íslands -
Grafalvarleg staða í rekstri PCC Bakka rædd í atvinnuveganefnd Alþingis.
Atvinnuveganefnd Alþingis hefur verið upplýst um grafalvarlega stöðu í rekstri PCC Bakka við Húsavík, þar sem stefnt gæti í rekstrarstöðvun undir lok sumars ef ekki tekst að snúa vörn í sókn. -
Listasafnið á Akureyri Nýjar sýningar opnaðar
Sýningar Heimis Hlöðverssonar, Samlífi, og Þóru Sigurðardóttur,Tími – Rými – Efni, verða opnaðar í Listasafninu á Akureyri á laugardag 17. maí kl. 15. Á opnunardegi verður leiðsögn með Heimi kl. 15.45. -
Orkey fyrst á Íslandi með sjálfbærni- vottaða framleiðslu á lífeldsneyti
Orkey hefur fengið alþjóðlega kolefnis- og sjálfbærnivottun, ISCC EU, á lífdísilframleiðslu sína á Akureyri fyrst fyrirtækja sem framleiða lífeldsneyti hérlendis.