Ofbeldi og eldra fólk
Vilborg Gunnarsdóttir skrifar
Ofbeldi hefur margar birtingarmyndir. All oft sést á fólki sem beitt er líkamlegu ofbeldi en alls ekki alltaf. Ofbeldinu er þá beint að þeim hluta líkamans sem oftast er falinn með fatnaði. Slíkt er þá gert meðvitað svo ekki komist upp um það. Ekki síður alvarlegt er andlegt ofbeldi.
Nýlega var felldur dómur yfir ungri konu sem sökuð er um að hafa valdið föður sínum bana. Hún er líka sökuð um langvarandi alvarlegt ofbeldi gegn foreldrum sínum. Þegar dómurinn var felldur kom í ljós að foreldrarnir höfðu ítrekað leitað sér læknisaðstoðar vegna áverka en ekki viljað tilkynna eða kæra vegna tengsla við gerandann; dóttur sína. Læknarnir voru þar með bundnir þagnarskyldu og gátu ekki tilkynnt til lögreglu eða þar til bærra yfirvalda.
Formaður Læknafélags Íslands kom í viðtal að þessu tilefni og benti á þann alvarlega annmarka í lögum að læknar hafa ekki heimild til að ganga „gegn vilja“ skjólstæðinga sinna í tilfellum sem þessum. Þarna telja þeir nauðsynlegt að breyta lögum þannig að hægt sé að grípa inn í í alvarlegum tilfellum. Nýlega var svo viðtal við yfirlækni á Gjörgæsludeild LSH sem tók undir alvarleika þessara mála en hann benti líka á að í lögum er að finna smugu sem hægt væri að nota.
Læknar eru í þeirri erfiðu stöðu og hafa kannski þekkt skjólstæðinga sína í mörg ár og þykir þá erfitt að ganga gegn vilja þeirra. Þeir eiga sumir meira að segja erfitt með að neita einstaklingi um vottorð vegna ökuleyfis þótt augljóst sé að viðkomandi sé ekki hæfur til að stjórna ökutæki en þetta er efni í aðra grein.
Sinnuleysi er líka ofbeldi
Vitaskuld er þarna um vandrataða leið að fara og gæta þarf að persónuvernd og friðhelgi en nauðsynlegt er engu að síður að eitthvað verði gert.
Í dag er það svo að hver sem er, sem telur að brotið sé á barni, getur tilkynnt það til barnaverndaryfirvalda. Það þykir meira en sjálfsagt og eðlilegt. Við hljótum að geta fundið leið þegar kemur að eldra fólki sérstaklega en sá hópur er einstaklega viðkvæmur og liggur vel við höggi.
Undirrituð vann um skeið með og fyrir hóp fólks sem margt hvert var í viðkvæmri stöðu. Þegar einstaklingur er kominn af fyrstu stigum heilabilunar er hann oftast búinn að missa þann hæfileika að skilja og greina á milli þess sem er rétt og rangt. Líka þegar brotið er gegn honum.
Þau brot sem oftast komu inn á borð okkar snéru að fjárhag. Fjarskyldur ættingi birtist kannski allt í einu og bað viðkomandi að ábyrgjast lán eða lána sér pening. Erfðaskrám var breytt og eignir seldar. Þá urðum við vör við sinnuleysi þegar kom að umönnun þannig að viðkomandi nærðist illa, var ekki þrifinn og jafnvel synjað um umgengni við sína nánustu. Þetta er ljótt en engu að síður staðreynd.
Þessu er hægt að breyta ef viljinn er fyrir hendi!
Höfundur er áhugamaður um almenna velferð.
Nýjast
-
Lokaorðið - Vinabeiðnir
Ég þreytist ekki á að vara fólk við svikatilraunum af ýmsu tagi. Svikahrappar finna sífellt nýjar leiðir til að reyna að nappa af okkur. Að öllu jöfnu eru þetta ekki einstaklingar heldur hluti af alþjóðlegri skipulagðri glæpastarfsemi. -
Varaflstöðvar fyrir 32 milljónir króna
Heilbrigðisráðherra hefur ákveðið að úthluta heilbrigðisstofnunum á landsbyggðinni samtals 77 milljónum króna til endurnýjunar á tækjabúnaði. -
Ofbeldi og eldra fólk
Ofbeldi hefur margar birtingarmyndir. All oft sést á fólki sem beitt er líkamlegu ofbeldi en alls ekki alltaf. Ofbeldinu er þá beint að þeim hluta líkamans sem oftast er falinn með fatnaði. Slíkt er þá gert meðvitað svo ekki komist upp um það. Ekki síður alvarlegt er andlegt ofbeldi. -
Enn ekki brugðist við kröfum um tiltekt
Ekki hefur verið brugðist við kröfu um tiltekt á lóðinni Setbergi á Svalbarðsströnd og dagsektir eru því áfram lagðar á í samræmi við ákvörðun stjórnar Heilbrigðiseftirlits Norðurlands eystra frá því í október árið 2024. -
Tjaldsvæðisreitur - Lágmarksverð fyrir byggingarétt tæplega 300 milljónir króna
„Við rennum svolítið blint í sjóinn, þetta er ný aðferð hjá okkur og við vitum auðvitað ekki hvað kemur út úr þessu útboði,“ segir Pétur Ingi Haraldsson skipulagsfulltrúi Akureyrarbæjar. Samþykkt hefur verið að leita eftir kauptilboðum í byggingarrétt þriggja lóða fyrir íbúðarhús á svokölluðum Tjaldsvæðisreit. Frestur til að sækja um lóðirnar rennur út á hádegi þann 12. febrúar næstkomandi. Ekki verður hægt að bjóða eingöngu í eina lóð heldur eru þær boðnar út sem ein heild. -
Eyjafjarðarsveit Íslendingar 90% gesta á tjaldsvæði
Íslendingar eru yfirgnæfandi fjöldi gesta á tjaldsvæði Eyjafjarðarsveitar í Hrafnagilshverfi. Þetta sýnir tölfræðin frá síðasta ári. -
Uppstilling hjá Samfylkingu í Norðurþingi fyrir sveitarstjórnarkosningar 16. maí n.k.
Félagsfundur Samfylkingarinnar í Norðurþingi samþykkti einróma tillögu stjórnar um að viðhöfð verði uppstilling sem aðferð við val á framboðslista flokksins í Norðurþingi fyrir sveitarstjórnarkosningar þann 16. maí 2026. -
KEA og EBAK hefja samstarf um þróunarverkefni á íbúðamarkaði
KEA og EBAK – Félag eldri borgara á Akureyri, fyrir hönd óstofnaðs félags ÍBA 55+, hafa undirritað viljayfirlýsingu um samstarf um undirbúning og þróun íbúðakjarna fyrir fólk 55 ára og eldra á Akureyri. Markmið samstarfsins er að kanna forsendur fyrir uppbyggingu sjálfstæðs búsetuforms sem leggur áherslu á lífsgæði, gott aðgengi, sjálfbærni og sterk tengsl við nærsamfélagið. Verkefnið mun meðal annars byggja á hugmyndum um svokallaða lífsgæðakjarna og "íbúðir út lífið", þar sem íbúðir og sameiginleg rými styðja við virkt samfélag eldri borgara og gerir þeim kleift að búa á sínu heimili sem lengst. Gert er ráð fyrir að skipaður verði sameiginlegur undirbúningshópur sem vinni að greiningu á eftirspurn, greiðslugetu og búsetuþörfum, kanni mögulegar staðsetningar og eigi samtal við skipulagsyfirvöld. Niðurstöður þeirrar vinnu geta, ef forsendur reynast hagfelldar, leitt til stofnunar formlegs undirbúnings- og þróunarfélags sem taki til frekari þróunar og undirbúnings framkvæmda. -
Ágætis horfur fyrir sumarið en barátta við árstíðarsveiflur
„Það hefur verið vöxtur í ferðaþjónustu á svæðinu, ekki mjög ör en aukning og það er jákvætt. Millilandaflug beint til Akureyrar vegur þungt hvað þann vöxt varðar en fleiri þættir skipta einnig máli. Liðið ár kom alveg þokkaleg út, þrátt fyrir að blikur væru á lofti í byrjun þess og útlitið fyrir nýhafið ár eru ágætar,“ segir Halldór Óli Kjartansson starfandi framkvæmdastjóri Markaðsstofu Norðurlands. Nú í vikunni hefur staðið yfir stærsti viðburður íslenskrar ferðaþjónustu, Ferðaþjónustuvikan sem lauk með Mannamótum Markaðsstofa landshlutanna í gær, fimmtudag.
