Píluæðið heldur áfram á Húsavík
Gummi Lilla (t.v.) ásamt Jónasi Halldóri Friðrikssyni, framkvæmdastjóra Völsungs eftir leik í B-úrslitum síðasta vetur. Myndir: Píludeild Völsungs/Facebook.
Það er blússandi gangur í píludeild Völsungs á Húsavík, þar sem áhugi bæjarbúa á þessari sívaxandi íþrótt hefur farið fram úr björtustu vonum. Í samtali við Vikublaðið segir Guðmundur Þráinn Kristjánsson, oftast kallaður Gummi Lilla, formaður deildarinnar, að pílan sé í stöðugri sókn og aðsóknin meiri en nokkru sinni fyrr.
„Við erum með tvo fasta æfingadaga í viku, auk kvennakvölda á miðvikudögum,“ segir Gummi. „Svo reynum við að hafa sveigjanleika í þessu, því það er svo mikil aðsókn í salinn – sérstaklega frá fyrirtækjum í bænum sem nýta aðstöðuna fyrir starfsmannahittinga. Ég held að flest fyrirtæki í bænum séu búin að koma.“
Pílusalurinn, sem staðsettur er í kjallara Sundlaugar Húsavíkur, hefur reynst frábær vettvangur fyrir fjölbreytta samveru – hvort sem um er að ræða æfingar, mót, fjölskyldustundir eða aðra félagslega viðburði. „Það er gaman að sjá fjölskyldur koma saman, foreldra með börn sín, og eiga notalega stund við píluspjaldið,“ bætir Gummi við.
Mót og meistaratitlar
Píludeildin heldur reglulega mót og er þátttakan jafnan góð. „Við héldum nýverið deildarkeppni Völsungs þar sem 22 kepptu, og allir skráðir í deildina geta tekið þátt. Um síðustu helgi tóku Snorri Gunnlaugsson og Sævar Örn Guðmundsson þátt í landsmóti, og næstu helgi[ í dag] verður haldið meistaramót í 501 – þar sem sigurvegarinn verður krýndur pílumeistari Völsungs í þeirri grein.“
Leikurinn 501 er ein vinsælasta keppnisgrein píluíþróttarinnar. Þar hefja keppendur leikinn með 501 stig og draga úr þeim með hverju kasti. Markmiðið er að ná nákvæmlega 0 stigum og klára á tvöföldum reit, t.d. ef leikmaður á 40 stig eftir þá getur hann unnið með því að hitta í tvöfaldan 20– sem krefst bæði nákvæmni og taktískrar hugsunar.
„Við höldum mót að minnsta kosti tvisvar í mánuði og skellum svo í minni skemmtimót þess á milli. Það er alltaf góð þátttaka,“ segir Gummi.
Breiður hópur og öflug þátttaka
Það sem gerir píluíþróttina svo aðgengilega er hversu breiður hópur getur tekið þátt. „Við erum með Miðjuna hæfingu í salnum einu sinni í viku, og eldri borgarar koma á þriðjudags- og fimmtudagsmorgnum. Þetta hentar bæði þeim sem vilja æfa af krafti og þeim sem vilja bara mæta annað slagið.“
Þrátt fyrir að deildin sé enn ung hefur hún náð ótrúlegum árangri. „Við opnum núna fyrir skráningu á nýtt tímabil og reiknum með að það fækki aðeins – enda var fjöldinn sem byrjaði með okkur gríðarlegur, vel yfir hundrað manns,“ segir Gummi og bætir við að félagið hafi slegið öll met í pílubransanum á Íslandi.
Ástríða og samfélagsleg tenging
Í viðtali við Vikublaðiðfyrr á árinu lýsti Gummi því hvernig ástríða og sjálfboðaliðastarf hafi verið lykillinn að velgengni deildarinnar. „Við höfum fengið styrki frá Norðurþingi og fyrirtækjum í bænum, en félagar deildarinnar hafa sjálfir lagt hönd á plóginn í uppbyggingu aðstöðunnar,“ sagði hann þá.
Það er ljóst að píluíþróttin hefur fest rætur á Húsavík og að framtíðin er björt. Með öflugu starfi, fjölbreyttum viðburðum og aðgengi fyrir alla aldurshópa er Völsungur að skapa samfélag í kringum íþrótt sem áður var lítt stunduð á svæðinu – og það með eftirtektarverðum árangri.
Guðmundur málari (í miðjunni) er mikill pílumaður og það varð að fylgja mynd af honum, þó aðallega vegna þess að hann er í svo glæsilegum Obituary-bol. Honum á hægri hönd er Sævar Örn Guðmundsson og Snorri Gunnlaugsson gefur þeim þumalinn til að stilla fókusinn.
Nýjast
-
Píluæðið heldur áfram á Húsavík
Völsungur með yfir hundrað iðkendur -
Hrafnagilsbúið tilnefnt sem ræktunarbú ársins
Hrafnagilsbúið í Eyjafjarðarsveit var eitt af 12 hrossaræktarbúum sem fagráð í hrossarækt valdi til árlegrar heiðursviðurkenningar Bændasamtaka Íslands, sem ræktunarbú ársins. Þetta kemur fram á vefsíðu Eyjafjarðarsveitar. -
Tími kominn til að hugsa um landið allt
Bestu ákvarðanirnar eru teknar þegar við sjáum heildarmyndina. Til að sjá heildarmyndina verðum við að horfa út fyrir nærumhverfi okkar og sjá landið allt, fólkið allt. Núverandi ríkisstjórn virðist þó ekki vera alveg sammála þessu sjónarmiði. Hún sér landið okkar í gegnum þröngan glugga höfuðborgarinnar. Þetta hefur þær afleiðingar að dregið er sífellt úr þjónustu á landsbyggðinni, fjármunum er frekar beint að þéttbýlinu og reglur settar án þess að spurt sé hvernig þær snerta fólk sem býr og starfar utan höfuðborgarsvæðisins. -
Norðurorka varar við svikapósti
Norðurorka vekur athygli á svikapósti með fyrirsögninni Val á raforkusala, þar sem tilkynnt er um ógreiddan rafmagnsreikning. Í framhaldinu er viðtakanda boðið að smella á greiðslusíðu og slá inn kóða sem fylgir póstinum til að ganga frá greiðslu. -
Með því að efla millilandaflug um Akureyrarvöll skapast ný tækifæri
„Akureyrarflugvöllur er mikilvæg innviða- og atvinnuuppbygging fyrir allt Norðurland eystra og raunar fyrir landið í heild. „Með eflingu flugs um Akureyri skapast ný tækifæri fyrir ferðaþjónustu, útflutning, erlendar fjárfestingar og tengsl við alþjóðamarkaði sem nýtast landinu öllu,“ segir í ályktun sem Samtök sveitarfélaga og atvinnuþróunar á Norðurlandi eystra, SSNE samþykktu á haustþingi sínu. -
„Ég elska landsbyggðina og Akureyri er svo sannarlega frábær háskólabær!“
Sigurður Eyjólfur er stúdent við Sálfræðideild Háskólans á Akureyri og gaf út sína fyrstu bók á árinu sem ber heitið „Ég er ekki fullkominn“. Bókin fjallar um hamlandi kvíða sem Sigurður hefur tekist á við í gegnum árin.Hann kynnti bókina í Pennanum Eymundssyni á Akureyri síðasta fimmtudag, þar sem viðtökur voru afar hlýjar. -
Listasafnið á Akureyri: Femina Fabula kveður um helgina
Sýndarveruleikasýningunni Femina Fabula, sem stendur nú yfir í sal 08 í Listasafninu á Akureyri, lýkur næstkomandi sunnudag. Sýningin hefur hlotið mikil og góð viðbrögð gesta safnsins og hafa yfir sjöhundruð manns borið hana augum á síðustu sex vikum. Sýningin byggir á hugmyndum sex sviðslistakvenna sem tjá kvenlega næmni og krafta með aðstoð sýndarveruleikagleraugna. Verkin urðu til í samvinnu þeirra við myndlistarkonuna Kirsty Whiten og leikstjórann Kristján Ingimarsson, sem er listrænn stjórnandi verksins. -
Matargafir og NorðurHjálp snúa bökum saman
„Staðan er bara hreint út sagt ömurleg. Með þessari samvinnu erum við að bregðast við aukinni ásókn í aðstoð úr samfélaginu um þessar mundir og vonum svo sannarlega að við komust í gegnum þá þungu mánuði sem fram undan eru,“ segir Sigrún Steinarsdóttir hjá Matargjöfum á Norðurlandi. Tvö mannúðarfélög sem starfa á Akureyri og sinna Norðurlandi öllu hafa tekið ákvörðun um að láta reyna á samstarf sín á milli, en þetta eru félögin Matargjafir og NorðurHjálp. -
Fasteignaskattsprósenta lækkar! – fjárhagsleg ábyrgð og framtíðarsýn fyrir Akureyrarbæ
Eitt af meginhlutverkum bæjarstjórnar er að byggja upp stöðugt, öflugt og framsækið samfélag þar sem íbúar og fyrirtæki dafna í góðu umhverfi til búsetu og rekstrar.
