Lýsir áhyggjum af miklu og viðvarandi atvinnuleysi

Aðalfundur Félags málmiðnaðarmanna Akureyri ályktaði um mörg brýn mál. Mynd: Ásgrímur.

Aðalfundur Félags málmiðnaðarmanna Akureyri sem haldin var í Alþýðuhúsinu í gær, lýsir yfir áhyggjum af  miklu og viðvarandi atvinnuleysi. “Í janúar á þessu ári voru að jafnaði 775 einstaklingar án atvinnu á Norðurlandi eystra, 434 karlar og 341 kona. Þrátt fyrir að hlutfallslegt atvinnuleysi sé minna í fjórðungnum en á landinu öllu eru tölurnar allt of háar og mikið áhyggjuefni,” segir á ályktun fundarins. Þar segir ennfremur: “Aðalfundurinn bendir á að á Norðurlandi eru margir álitlegir fjárfestingarkostir, sem nánast bíða þess að verða hrint í framkvæmd. Félagið minnir stjórnvöld á að við gerð síðustu kjarasamninga var mjög rætt um að stuðla að auknum fjárfestingum til þess að leggja grunn að auknum hagvexti og atvinnu. Í þingeyjarsýslum eru virkjunarkostir fyrir orkufrekan iðnað og Bakki við Húsavík er raunhæfur kostur fyrir slíkan iðnað.  Aðalfundurinn skorar á ríkisstjórn Íslands, sveitarfélög, samtök atvinnulífsins og samtök launþega að snúa bökum saman og sigrast á atvinnuleysinu hér á landi. Því fyrr, því betra.

Aðalfundurinn ályktaði einnig um Reykjavíkurflugvöll og  beinir því eindregið til stjórnvalda og borgaryfirvalda að núverandi staðsetning Reykjavíkurflugvallar verði tryggð til frambúðar. “Verði hugmyndir um að flytja miðstöð innanlandsflugs frá Reykjavíkurflugvelli að veruleika er einsýnt að mikil afturför verður í bráðaþjónustu við þá landsmenn sem þurfa að komast til Landsspílana- háskólasjúkrahúss, með sjúkraflugi.  Mikilvægi nálægðar flugvallarins og sjúkrahússins er ótvírætt og getur skipt sköpum, auk þess sem flugvöllurinn gegnir lykilhlutverki í öryggisneti landsins. Aðalfundurinn minnir á að í höfuðborginni eru staðsettar höfuðstöðvar stjórnsýslu landsins, auk flestra opinberra stofnana landsins á sviði viðskipta-, mennta-, menningar- og heilbrigðismála. Sú staðreynd kallar á greiðar samgöngur til og frá höfuðborginni, eigi Reykjavík að geta staðið undir nafni sem höfuðborg allra landsmanna. Flutningur á miðstöð innanlandsflugs frá Reykjavíkurflugvelli er því óviðunandi  afturför,” segir í ályktunni.

Aðalfundur Félags málmiðnaðarmanna styður eindregið gerð Vaðalheiðarganga og telur fundurinn mikilvægt að framkvæmdir hefjist sem fyrst, enda ljóst að gerð ganganna styrki  atvinnulífið við Eyjafjörð og í Þingeyjarsýslum og bæti þar með búsetuskilyrði til muna. “Aðalfundurinn hvetur stjórnvöld til að standa við bakið á heimaaðilum, enda liggi fyrir fullnægjandi gögn um kostnað og rekstur ganganna. Bent er sérstaklega á að Vaðlaheiðargöng koma til með að auka til muna öryggi vegfarenda og verða góð samgöngubót. Aðalfundurinn fagnar samstöðu sveitarfélaga og stofnana á svæðinu um fjárhagslegan stuðning við verkefnið  og óskar jafnframt eftir málefnalegum umræðum um þetta brýna hagsmunamál allra lansmanna,” segir í ályktuninni.

Þá skorar aðalfundur Félags málmiðnaðarmanna Akureyri á stjórnvöld að standa vörð um Sjúkrahúsið á Akureyri. “Í kjölfar skertra fjárframlaga hins opinbera til stofnunarinnar á undanförnum árum er ljóst að veruleg þjónustuskerðing er staðreynd, sem bitnar fyrst og fremst á sjúklingum sem búsettir eru á norður- og austurlandi. Ekki er hægt að tala um hagræðingu í þessu samhengi. Hætta er á að í kjölfar stórlega skertra fjárveitinga glatist sérhæfing og sérþekking, auk þess sem niðurskurðurinn rýrir augljóslega búsetuskilyrði og veltir auknum kostnaði yfir á sjúkinga. Aðalfundurinn minnir stjórnvöld á mikilvægi Sjúkrahússins á Akureyri sem þjónustustofnunar fyrir Norðausturland, kennslusjúkrahuss og aðalvarasjúkrahúss fyrir landið allt. Aðalfundurinn dregur í efa að mikill niðurskurður í heilbrigðiskerfinu skili tilætluðum árangri til lengri tíma litið. Því þurfi stjórnvöld að marka sér nýja stefnu í heilbrigðismálum, þar sem tillit verði tekið til fleiri þátta en fjárhagslegra,” segir í ályktunni.

Aðalfundurinn ályktaði einnig um björgunarþyrlur og skorar á ríkisstjórn Íslands að efla nú þegar þyrlukost Landhelgisgæslu Íslands og telur nayuðsynlegt að keyptar verði tvær þyrlur til viðbótar núverandi flota. “Samkvæmt samantekt Landhelgisgæslu Íslands fyrir tímabilið 1994 til 2010 hefur 1513 einstaklingum verið bjargað með flugförum LHG. Þar af var 361 einstaklingi bjargað á sjó og 1152 í landi. Í yfir 70 % tilvika er talið að þyrla hafi skipt sköpum. Aðalfundurinn telur nauðsynlegt að þyrlukostur LHG sé það öflugur og traustur að ávallt séu tvær þyrlur til reiðu annan sólarhringinn er sinni leit og björgun, sjúkraflutningum og öðrum verkefnum til lands og sjós. Til að hafa tvær þyrlur til reiðu allan sólarhringinn hring þarf minnst 4 þyrlur í rekstri og tvær vaktir. Fyrir landsmenn alla er það lífsspursmál að tækjakostur Landshelgisgæslu Íslands sé viðunandi.”

Loks samþykkti aðalfundurinn að fela stjórn félagsins að kanna í samstarfi við vinnuveitendur félgsmanna hvort ekki sé hægt í samstarfi við Rauðakrossinn að halda skyndihjálparnámskeið fyrir félagsmenn. Tilgangur verkefnisins sé að gera félagsmenn hæfari til að bregðast við ef óhapp ber að höndum.