Katrín nýr sveitarstjóri Þingeyjarsveitar
Knútur Emil Jónasson, oddviti Þingeyjarsveitar og Katrín Sigurjónsdóttir, nýr sveitarstjóri.
Sveitarstjórn Þingeyjarsveitar hefur ráðið Katrínu Sigurjónsdóttur í starf sveitarstjóra Þingeyjarsveitar. Alls bárust 15 umsóknir um starfið en sex umsækjendur drógu umsóknir sínar til baka á meðan á ráðningarferlinu stóð. Þetta kemur fram í tilkynningu frá sveitarfélaginu.
Katrín er Borgfirðingur, fædd árið 1968, og hefur víðtæka reynslu af sveitarstjórnarmálum og stjórnun. Hún hefur áður gegnt stöðu sveitarstjóra hjá Dalvíkurbyggð og Norðurþingi auk þess að hafa verið kjörinn fulltrúi í sveitarstjórn Dalvíkurbyggðar. Þá vann hún um árabil við stjórnunar- og útflutningsstörf hjá Sölku-Fiskmiðlun hf.
Katrín er stúdent frá Samvinnuskólanum og hefur lokið námi í rekstrar- og viðskiptafræðum frá Háskólanum á Akureyri. Þá hefur hún lokið námi í markþjálfun frá Evolvia og er viðurkenndur stjórnarmaður frá Akademias. Katrín er gift Hauki Snorrasyni og eiga þau þrjú uppkomin börn.
„Ég er afskaplega þakklát fyrir það traust sem sveitarstjórn Þingeyjarsveitar sýnir mér með því að fela mér starf sveitarstjóra. Það eru forréttindi að fá að vinna að uppbyggingu samfélagsins með kjörnum fulltrúum, frábæru starfsfólki og íbúum sveitarfélagsins og ég hlakka mikið til að hefja störf,“ segir Katrín, en hún tekur til starfa í byrjun ágúst.
„Ég þekki ágætlega til Þingeyjarsveitar. Hér er einstæð náttúrufegurð og gríðarleg orka, bæði í fólki og í jörðu. Fram undan eru mörg spennandi verkefni, stór sem smá, og ég mun leggja mig alla fram um að verða góður sveitarstjóri og öflugur málsvari fyrir samfélagið allt.“
„Sveitarstjórn Þingeyjarsveitar er afar ánægð með þann mikla áhuga sem sýndur var starfi sveitarstjóra og metur mikils það traust sem umsækjendur sýndu með umsóknum sínum. Sveitarstjórn Þingeyjarsveitar er samstíga um niðurstöðu ráðningarinnar og býður Katrínu innilega velkomna til starfa. Við höfum fulla trú á að fram undan sé traust og farsælt samstarf í fjölbreyttum verkefnum á kjörtímabilinu,“ segir Knútur Emil Jónasson, oddviti Þingeyjarsveitar.
Nýjast
-
Katrín nýr sveitarstjóri Þingeyjarsveitar
Sveitarstjórn Þingeyjarsveitar hefur ráðið Katrínu Sigurjónsdóttur í starf sveitarstjóra Þingeyjarsveitar -
Fyrirhuguð stækkun lóðar atNorth
Tillaga um breytingu á deiliskipulagi athafnasvæðis sunnan Hlíðarfjallsvegar er nú auglýst og kostur gefin á að senda inn athugasemdir til og með 5. ágúst 2026. Um er að ræða stækkun á skipulagssvæðinu vegna uppbyggingar gagnavers atNorth. -
Veganestið – Gunnþóra Elín Erlingsdóttir
Veganestið er greinaflokkur á vegum Góðvina Háskólans á Akureyri þar sem tekin eru viðtöl við útskrifaða stúdenta Háskólans á Akureyri -
Eignasafn félagslegra íbúða á Akureyri Stefnt að sölu allt að 15 óhentugra íbúða
Selja á allt að 15 íbúðir í eignasafni félagslegra leiguíbúða Akureyrarbæjar, en þær þykja óhentugar. Bæjarráð hefur samþykkt að skoða eignasafnið í samhengi við það að fjölga íbúðum af þeirri stærð sem mest eftirspurn er eftir, huga betur að félagslegri blöndun í hverfum og endurnýjun á íbúðum í lyftulausu og óhentugu húsnæði. -
Fjölmenni við vígslu nýja eldaskálans í Vaglaskógi
Nýr eldaskáli í Vaglaskógi var formlega tekinn í notkun föstudaginn 26. júní. Fjöldi manns lagði leið sína í Vaglaskóg milli klukkan tvö og fjögur og kveikt var upp í nýja eldaskálanum sem verið hefur í smíðum í skóginum undanfarin misseri. -
Lokaorðið - Vinátta
Nù þegar sumarið stendur sem hæðst og Reynitréin skarta svo miklum blómum að kona fer að gleðjast yfir yfir komandi litríku hausti, þá er henni hugsað til vináttunnar. -
Menningarhátíðin Mannfólkið breytist í slím
Menningarhátíðin Mannfólkið breytist í slím verður haldin dagana 16.–18. júlí í iðnaðarhúsnæði við Dalsbraut á Akureyri. Listasamsteypan MBS stendur að hátíðinni, sem hefur verið haldin frá 2018. -
Leikskólinn Hagasteinn Framkvæmdum flýtt
Samþykkt hefur verið að flýta framkvæmdum við seinni áfanga leikskólans Hagasteins og er það gert vegna óska verktakans, Húsheildar Hyrnu. Fyrirtækið hefur lagt fram breytta framkvæmdaáætlun sem gerir ráð fyrir að seinni áfangi verði tilbúinn í janúar 2027 og fullnaðarfrágangur lóðar þá um vorið. -
Tækifæri fyrir ungt fólk að skapa tónlist saman í faglegu hljómsveitarumhverfi
Lionshreyfingin tekur þátt mörgum norrænum samstarfsverkefnum og er Orkester Norden eitt þeirra. Anna Fr. Blöndal fyrrverandi fjölumdæmisstjóri Lions á Íslandi segir söguna ná aftur til ársins 1986 þegar þáverandi alþjóðaforseta var falið að finna samnorrænt verkefni fyrir fólk á aldrinum 15 til 25 ára. Forsetinn sem var skólastjóri tónlistarskóla réri strax á þau mið að sameina ungt fólk í tónlist með því að koma á laggirnar sinfóníuhljómsveit í hæsta gæðaflokki. Hljómsveitin var formlega stofnuð fáum árum síðar eða 1993.
