Akureyrardætur hjóla til góðs - Samhjól til styrktar Hjartavernd Norðurlands og Krabbameinsfélagi Akureyrar n.k laugardag

Hjartavernd Norðurlands.  

 Miklar framfarir hafa orðið í hjartalækningum síðustu áratugi og sú bragarbót sem orðið hefur á lífsstíl þjóðarinnar, einkum með minni tóbaksreykingum, hefur leitt til færri dauðsfalla og örkumla af völdum hjartasjúkdóma en áður var. Mikið verk er þó óunnið og mun hækkandi meðalaldur þjóðarinnar, innöndun nikótíngufu og  þyngdaraukning birta nýjar áskoranir í forvörnum, lækningum og umönnun hjartasjúklinga á komandi árum. 

Hjartavernd Norðurlands er almannaheillafélag stofnað árið 1965. Fyrstu áratugina gekk félagið undir nafninu Hjarta- og æðasjúkdómavarnarfélag Akureyrar og nágrennis og lýsir heitið ágætlega þeim tilgangi að berjast gegn þeim sjúkdómum sem nefndir voru í heiti þess. Sjúkdómar í blóðrásarkerfi, eins og hjarta- og æðasjúkdómar eru kallaðir í dánarmeinaskrá landlæknisembættisins, hafa flest undanfarin ár verið algengasta dánarorsök kvenna á Íslandi. Árið 2022 létust 178 konur á hverjar 100 þúsund konur í landinu af þessum orsökum. Fjórum áratugum fyrr voru það 221 kona sem lést af völdum hjarta- og æðasjúkdóma á hverjar 100 þús. konur. Tölurnar gefa hugmynd um þær miklu framfarir sem orðið hafa í forvörnum, lækningum og eftirfylgni með hjarta- og æðasjúkdómum á tímabilinu. Lækkunin hefur þó verið minni hjá konum en körlum þar sem tíðnin 2022 var aðeins 57% af því sem hún var 1982 hjá körlum en 80% hjá konum. Einkenni hjartasjúkdóma eru önnur hjá konum en körlum og því er gagnlegt að leita sér upplýsinga um vernd hjartans á netinu. 

Hjartavernd Norðurlands hefur beitt sér fyrir aukinni þjónustu í hjartalækningum og að bættri þjónustu við sjúklinga og fjölskyldur þeirra. Félagið hefur haldið vakningarfundi og reynt að stuðla að heilsueflingu með því að mæla blóðsykur bæjarbúa á förnum vegi. Félagið tók þátt í stofnun HL-stöðvarinnar á sínum tíma. Það hefur úthlutað styrkjum til rannsókna og til tækjakaupa á heilsugæslur og sjúkrahús, allt í þágu þeirra markmiða að berjast gegn hjarta- og æðasjúkdómum, útbreiðslu þeirra og afleiðingum, eins og segir í stofnskrá félagsins. 

Hreyfing er lykilatriði í því að vinna gegn aukningu hjarta- og æðasjúkdóma. Göngutúrar, sund eða hjólreiðar bæta líf og heilsu allra, karla og kvenna á öllum aldri. Hreyfing styrkir hjartað og því fylgir bæði gleði og þægileg þreyta að hreyfa sig umfram brýna nauðsyn. Hjartavernd Norðurlands hvetur alla til þess. 

Krabbameinsfélag Akureyrar og nágrennis 

Akureyrar og nágrennis veitir fólki sem hefur greinst með krabbamein og aðstandendum þeirra fjölbreytta þjónustu. 

Félagið býður upp á stuðning og ráðgjöf í formi viðtala, skjólstæðingum að kostnaðarlausu. Boðið er upp á fræðslu, fjölbreytt námskeið, málþing, heilsueflingu, jafningjastuðning í karla- og kvennahópum, Eirbergs þjónustu og ýmsa aðra viðburði. 

 Á hverju ári greinast 916 konur með krabbamein hér á landi (Krabbameinsskrá) en það er hægt að koma í veg fyrir 4 af hverjum 10 krabbameinum með heilsusamlegum lífsstíl. 

 Félagið leggur því áherslu á að hvetja fólk til hreyfingar og minna á forvarnargildi hennar. 

 Við bjóðum okkar skjólstæðingum upp á regluleg Yoga nidra námskeið í samstarfi við Sjálfsrækt. Eins er hægt að sækja um styrk fyrir korti í líkamsræktarstöðvar, Minningarsjóður Baldvins fjármagnar það.  Göngum saman hópurinn fer í vikulegar göngur og við hvetjum okkar félagsmenn til að nýta sér það. Einnig eru hóptímar á Bjargi líkamsrækt og sundhópur sem ætlaðir eru fyrir fólk sem er í meðferð eða í uppbyggingu eftir meðferð. Frekari upplýsingar má finna á heimasíðunni okkar: https://www.kaon.is/is/thjonusta/heilsuefling 

 Við erum Akureyrardætrum þakklát fyrir að hugsa til félagsins og aðstoða okkur við að hvetja konur til að hreyfa sig. Það er líka svo mikilvægt að fólk finni sér hreyfingu sem því finnst skemmtileg, hreyfing þarf ekki bara að vera það að fara í ræktina og djöflast í klukkutíma! Öll hreyfing gerir gagn og það er aldrei of seint að byrja. Svo við hvetjum allar konur sem hafa áhuga á að kynna sér starfsemi Akureyrardætra og skella sér í hjólatúr með þeim.