Um 7.700 bílar í flotanum á komandi sumri og hafa aldrei verið fleiri
„Við eigum ekki von á öðru en að árið verði mjög gott, bókunarstaðan hefur aldrei verið betri miðað við árstíma. Árið í fyrra var það besta sem við höfum séð í okkar rekstri og við munum sennilega aldrei ná slíku ári aftur,“ segir segir Steingrímur Birgisson forstjóri Hölds- Bílaleigu Akureyrar. „Þetta ár lítur engu að síður vel út, en kostnaður hefur vaxið mjög mikið þannig að við náum ekki sama árangri í ár. Gangi áætlanir eftir og komi ekkert óvænt uppá þá verður árið mjög gott.“ Fleiri bílar en áður verða í flotanum sem þjónustar ferðalanga á ferðum þeirra um Ísland á komandi sumri, og verður heildarflotinn allt að 7.700 bílar.
Steingrímur segir að gríðarleg eftirspurn hafi verið eftir þjónustu félagsins á liðnu ári. „Það má segja að hafi komið okkur að sumu leyti á óvart, við áttum ekki von á því að yrði alveg svona mikið að gera. Við reiknuðum með góðu ári, en niðurstaðan fór fram úr okkar björtustu vonum. Við vorum á tímabili bara að troða marvaðann og bjarga okkur frá degi til dags. Sem betur fer tókst það ágætlega enda frábært fólk hjá okkur sem er öllu vant,“ segir hann.
Alls voru í boði um 7.500 bílar og höfðu þá ekki verið fleiri í flotanum, en dugði vart til á stærstu dögunum. Steingrímur gerir ráð fyrir að fleiri bílar verði í flotanum í sumar, allt að 7.700. „Í fyrra voru talsverðar tafir á afhendingu nýrra bíla en mér sýnist að svo verði ekki í sama mæli núna í ár, það lítur betur út í flestum bílaflokkum. Einna helst eru tafir á afhendingu húsbíla og smærri fólksbíla. Bílaframleiðendur voru í talsverðum vandræðum í fyrra en svo virðist sem þeir sér að mestu komnir fyrir vind og afhendingar fyrir komandi sumar muni að mestu standast.“
Góð bókunarstaða
Steingrímur segir bókunarstöðu hjá fyrirtækinu aldrei hafa verið eins góða og nú en það sem helst gæti sett strik í reikninginn er ef upp kemur skortur á gistirými fyrir ferðafólkið. „Það er víða farið að þrengjast verulega, en vonandi sleppur þetta til,“ segir hann. Nokkrir staðir skera sig úr, svæðið frá Klaustri að Höfn í Hornafirði, Egilsstaðir og svæði þar um kring og eins svæðið frá Mývatnssveit að Akureyri. Steingrímur segir áhuga fyrir Íslandi enn verulega mikinn og gerir ekki ráð fyrir að dragi úr á næstu árum, en bendir á að innviðir verði að vera í lagi, góð þjónusta, nægt gistirými meðal annars þannig að gott orðspor verði ekki fyrir skaða.
Yfir 500 rafbílar og fleiri á leiðinni
Höldur Bílaleiga Akureyrar tók á dögunum við fimmhundruðasta rafbílnum í bílaflota sinn, en hreinum rafbílum hefur fjölgað ört liðin ár sem er í takt við áherslur fyrirtækisins um að vera ávallt í fararbroddi í umhverfismálum og leiðandi í orkuskiptum. Steingrímur segir að á bilinu 3 til 400 nýir rafbílar hafi verið pantaðir og komi inn í reksturinn á næstu misserum.
Félagið hefur á liðnum árum unnið að uppbyggingu hleðsluinnviða með stækkun heimtauga og uppsetningu á 60 hleðslustöðvum á 6 starfsstöðvum víða um land. Höldur Bílaleiga Akureyrar hlaut nýverið viðurkenningu frá Europcar Group sem fyrirtækið er umboðsaðili fyrir, en þau voru veitt fyrir góðan árangur í sjálfbærri þróun. Var fyrirtækið verðlaunað fyrir framúrskarandi vinnu við uppbyggingu innviða er snúa að orkuskiptum sem og fjölda rafbíla í bílaflota sínum. Europcar á Íslandi er nú með flesta rafbíla af öllum aðildarlöndum þess fyrirtækis.
Steingrímur segir frábært að ná þeim árangri að vera komin yfir 500 rafbíla í flotanum, en með árunum hefur úrvalið aukist til muna og eru í boði rafbílar frá öllum helstu framleiðendum heims. Þá eru einnig í boði fjöldi vistvænna bíla, en raf- og vistvænir bílar eru 26% af heildarflota fyrirtækisins. Steingrímur segir viðurkenningu Europcar miklar viðurkenningu á góðu starfi fyrirtækisins þegar kemur að orkuskiptum bílaflotans og uppbyggingu innviða.
Nýjast
-
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á. -
Goblin opnar á Glerártorgi
„Eins leitt og okkur þykir að yfirgefa fallega miðbæinn okkar, erum við afar spennt fyrir þessum flutningum og hlökkum til að bjóða viðskiptavini okkar velkomna á Glerártorgi,“ segja þau Þorsteinn Marinósson og Ásta Hrönn sem eiga Goblin. Starfsemin hefur verið við Brekkugötu undanfarin ár en flyst nú í rýmra húsnæði á Glerártorgi. -
Lystigarðurinn - Kostar meira að pissa
Gjald fyrir afnot af salernisaðstöðu í Lystigarðinum á Akureyri hækkar 1. maí næstkomandi, út 150 krónum eins og áður var í 300 krónur. Gjaldið verður endurskoðað við gerð gjaldskrár Umhverfis- og mannvirkjaráðs Akureyrarbæjar árlega. -
Bókakynning á Amtsbókasafninu á Akureyri á morgun.
Kristín Guðmundsdóttir höfundur bókarinnar Tólf lyklar verður með kynningu á bókinni á Amtsbókasafninu á morgun og hefst kynningin klukkan 15:30. Bókin er fyrir fólk af erlendum uppruna sem er búið með grunninn í íslensku. -
Barnamenningarhátíð á Akureyri
Barnamenningarhátíð á Akureyri er nú haldin í sjöunda sinn og hefur vaxið ár frá ári. Hátíðin teygir sig yfir allan aprílmánuð með það að markmiði að hvetja börn og fjölskyldur þeirra til að taka virkan þátt í menningarlífi bæjarins sér að kostnaðarlausu.Á dagskrá eru fleiri en 50 viðburðir af ýmsu tagi. -
Sigríður Örvarsdóttir nýr safnstjóri Listasafnsins
Sigríður Örvarsdóttir hefur verið ráðin nýr safnstjóri Listasafnsins á Akureyri. Sigríður er með MA gráðu í safnafræði frá Háskóla Íslands (2018), BA gráðu í textílhönnun frá Seminaret for Kunst og Haandværk í Danmörku (2001), ásamt meistaranámi í prjónahönnun frá Academie Royale des Beux-Arts (2014) og viðbótardiplómu í hagnýtri jafnréttisfræði frá Háskóla Íslands (2009). Auk þess er hún með kennsluréttindi í grunn- og framhaldsskóla (2001). Sigríður hefur starfað sem safnstjóri og forstöðumaður Menningarmiðstöðvar Þingeyinga frá árinu 2022 og veitir sem slík forstöðu Myndlistarsafni Þingeyinga en safneign þess telur um 1.900 verk. Í starfi sínu stýrir hún starfseminni og ber ábyrgð á öllum þáttum rekstrar, allri fjárhags- og verkefnaáætlanagerð, bókhaldi, mannauðsmálum, rekstri fasteigna og faglegu starfi sjö annarra safneigna og fjögurra sýningarstaða. Sigríður starfaði sem verkefnastjóri sýninga hjá Akureyrarbæ sumarið 2021. Í því starfi sinnti hún sýningagerð, rannsóknarvinnu og kynningarmálum. Árin 2019 til 2020 var hún sjálfstætt starfandi ráðgjafi við gerð safnastefnu Akureyrarbæjar. Hún gegndi starfi safnafulltrúa Listasafnsins á Akureyri árið 2012 og árin 2010 og 2012 starfaði hún sem verkefnastjóri samsýninga og ritstjóri safnahandbóka fyrir söfn á Norður- og Norðausturlandi. Árin 2008 til 2012 starfaði hún sem safnkennari við Minjasafnið á Akureyri. Sigríður hefur reynslu af kennslu í list- og hönnunargreinum á öllum skólastigum innan lands sem utan, m.a. hjá Listaháskóla Íslands og Marbella Design Academy á Spáni. Hún hefur tekið þátt í alheimsþingi ICOM, alþjóðaráðs safna og verið fulltrúi þess í Rannsóknarsetri í safnafræðum við Háskóla Íslands. Alls bárust 14 umsóknir um starfið. -
Virðist sem skorti pólitískan vilja
Stjórn og trúnaðarráð Framsýnar kom saman til fundar í gær. Mörg mikilvæg mál voru til umræðu á fundinum m.a. samgöngumál. Ákveðið var að hvetja Vegagerðina og stjórnvöld til að styðja við áætlunarflug um Húsavíkurflugvöll auk þess styðja betur við Loftbrúna sem skiptir íbúa á landsbyggðinni verulega miklu máli. Fjölga þarf ferðum sem menn geta nýtt sér á þessum sérstöku kjörum
Athugasemdir