Hjalti Jón Sveinsson, skólameistari VMA og formaður umhverfisnefndar Akureyrar, sagði að staðreyndin væri sú að fólk tæki bílinn fram yfir heilsuna. Hann nefndi sem dæmi yfirfull bílastæði við framhaldsskólana VMA og MA. Alls hefur um 400 tonnum af sandi verið dreift á götur bæjarins í vetur og hefur um 3% af salti verið blandað í sandinn og allt orðið vitlaust vegna þess, að sögn Hjalta Jóns. "Þetta eru trúarbrögð hjá Akureyringum að ekki megi blanda salti í sandinn og svo eiga starfsmenn bæjarins að hreinsa sandinn upp um leið og hlánar."
Jón Birgir Gunnlaugsson, verkefnastjóri umhverfismála hjá framkvæmdadeild Akureyrarbæjar, sagði að þrátt fyrir alla þessa sanddreifingu hefði aldrei orðið annað eins tjón á umferðarljósum, ljósastaurum og umferðarskiltum og í vetur. Á málþinginu var því jafnframt velt upp hvort sátt myndi nást um að eingöngu yrði notað salt til hálkuvarna á Akureyri einn vetur og málið svo gert upp að því loknu. Fram kom að nauðsynlegt væri að gera tilraun með saltið en menn höfðu ekki mikla trú á að sátt yrði um það í bænum.
Sigurður Friðleifsson framkvæmdastjóri Orkuseturs sagði að það væri almennur og heilagur metnaður að eiga bíl á Íslandi og það væri í raun glapræði að ætla að fá fólk til að eiga ekki bíl. Leggja ætti áherslu á að fá fólk til að nota orkunýtnustu bílana í hverjum stærðar- og gerðarflokki og jafnframt draga úr bílanotkun. Hann sagði að hægt væri að byrja á því að skipta yfir í díselbíla. Einnig nefndi Sigurður að um 4.000 bílar gætu keyrt á metan og með því að opna metanstöð á Akureyri myndi markaðurinn galopnast. Hann sagði að opinberar stofnanir gætu farið fyrir þessari þróun og að metan væri ódýrasta eldsneytið í dag.