Lokaorðið - Óvinafagnaður
Heiðrún E Jónsdóttir átti Lokaorðið í blaðinu s.l. fimmtudag
Í vetur las ég sagnabálk Einars Kárasonar, Óvinafagnað. Hef áður lesið Óvinafagnað, en rétt eins og með Sölku Völku og Sjálfstætt fólk eftir Halldór Laxness þá er ekki síður gaman að lesa þær aftur og fá meiri dýpt.
Og af hverju er ég að velta þessu fyrir mér? Byrjun sumarsins var sú leiðinlegasta í manna minnum, a.m.k. í mínu minni, þegar horft er til samfélagsumræðunnar. Sumarið varð þó mun spennuþrungnara þegar líða tók á það, þannig að mörgum fannst nóg um.
Átök, mannvíg, skáld og höfðingjar Sturlungaraldarinnar
„Þjóðin er klofin í herðar niður“ var fullyrt og minnti það óneitanlega á þá Sturlunga og aðrar kempur sem stráfelldu hvern annan auk fylgdarsveina. Þar féllu margir glæstir ættarlaukar og trúlega værum við Íslendingar mun fleiri og glæstari ef þessi óþarfa víg hefðu ekki verið svona blóðug.
Í sumar var vissulega ekki riðið um sveitir, menn klofnir í herðar niður en það var sannarlega verið að vega að fólki í ræðu og riti.
Í mörgum vinahópum og fjölskyldum myndaðist gjá. Sumir höfðu vit á því að minnast bara alls ekki á kosti eða galla ESB meðan aðrir gátu ekki hitt fólk án þess að ausa visku sinni yfir mann og annan. Og næg eru skáldin, ekki bara í fjölmiðlum heldur ekki síður á samfélagsmiðlum. Sumir vissulega með skáldsögur með sannsögulegu ívafi en aðrir með hreinan hugarburð, en oft með skemmtilegum þræði.
Verk að vinna
En nú er mál að linni. Við verðum að snúa bökum saman og vinna að þeim verkefnum sem eru mikilvæg, sum þeirra hafa beðið of lengi.
Forgangsmálin
Fyrir síðustu kosningar var mikið rætt um verðbólgu og lækkun vaxta. Nú þurfa stjórnvöld að fara á sveif með Seðlabankanum og aðilum vinnumarkaðarins að lækka verðbólgu og þ.m.t. vexti. Það verður ekki gert nema stjórnvöld komi sterk inn, hagræði í ríkisrekstri, fara í skattalækkanir frekar en skattahækkanir og leggi sitt af mörkum til að koma ró á vinnumarkaðinn.
Sýnum hvort öðru virðingu
Í þessari deilu, sem klauf þjóðina, í það minnsta tímabundið, var í raun ekkert rétt eða rangt. Það eru kostir og gallar sem þarf að vega og meta við flestar ákvarðanir. Við verðum að bera virðingu fyrir skoðunum annarra, jafnvel þótt maður skilji ekkert í þeim. Þetta eru þeirra ákvarðanir teknar á þeirra forsendum.
Hættum að tala samfélagið niður
Ísland trónir á toppi allra helstu lífskjaramælikvarða. Hér er almenn hagsæld, hátt menntunarstig, mesta jafnrétti á byggðu bóli og ójöfnuður með því lægsta sem þekkist. Verum stolt af því samfélagi sem eldri kynslóðir byggðu upp og tryggjum að sá árangur glutrist ekki niður.
Hvetjum unga fólkið til dáða,
Á Íslandi eru ótal tækifæri, t.d. í nýsköpun eins og dæmin sanna. Þá erum við rík af náttúruauðlindum, sem við verðum að verja.
Við þurfum sameinuð að vinna upp traust okkar á milli og horfa fram á veginn. Gera samfélag okkar enn betra á morgun en í gær.
Við getum þetta, við höfum yfirstígið mun meiri erfiðleika en nú blasa við, við gerum þetta sjálf.
Áfram gakk.
Nýjast
-
Lokaorðið - Óvinafagnaður
Í vetur las ég sagnabálk Einars Kárasonar, Óvinafagnað. Hef áður lesið Óvinafagnað, en rétt eins og með Sölku Völku og Sjálfstætt fólk eftir Halldór Laxness þá er ekki síður gaman að lesa þær aftur og fá meiri dýpt. -
Kókómjólkurferna undir steini í nær hálfa öld
„Ég kem alltaf við af og til og vitja fernunnar,“ segir Guðlaugur Benedikt Aðalsteinsson hárskeri á Akureyri. Hann ólst upp á Húsavík. Í einum hjóltúr frá bænum og að Tröllakoti skildi hann eftir kókómjólkurfernu vel skorðaða undir steini. Síðan er liðin nær hálf öld og enn eru leifar af fernunni undir steininum. -
Listasafnið á Akureyri Fjórar nýjar sýningar
Fjórar nýjar sýningar voru opnaðar í Listasafninu á Akureyri og Lystigarðinum á dögunum. Sýningarnar standa yfir til 7. mars á næsta ári. -
Gleði, lærdómur og annríki í víðfemasta sveitarfélagi landsins
Katrín Sigurjónsdóttir tók við starfi sveitarstjóra Þingeyjarsveitar í byrjun ágúst. Hún segir móttökurnar hafa verið einstaklega góðar og er þegar farin að setja sig inn í fjölbreytt verkefni þessa víðfeðma sveitarfélags. Katrín vill vinna að framförum og farsælum lausnum – en ætlar líka að finna tíma til að kynnast berjalöndunum, ganga um Mývatnssveit og heimsækja Flatey. -
Glæsileg skólalóð við Glerárskóla
Skólalóðin við Glerárskóla hefur formlega verið tekin í notkun. Framkvæmdir hafa staðið yfir um nokkurt skeið en nú er þeim loksins að mestu lokið og leiktækin tilbúin til notkunar. -
Fincafresh flytur í Garðabæ
Starfsemi Fincafresh mun á næstu vikum verða flutt il Garðabæjar. Félagið hóf sína starfsemi á Dalvík en flutti til Akureyrar fyrir fáeinum misserum. Nú verður enn á ný lagt upp í ferðalag. Fincafresh selur ferska ávexti beint frá Spáni til áskrifenda. -
Mikil eftirspurn eftir herbergjum á Heimavistinni
Hafna þurfti tugum umsókna sem bárust um Heimavist MA og VMA nú á þessu hausti. Vistin er fullsetin, en þar búa nú um 330 nemendur sem stunda ýmist nám í Menntaskólanum á Akureyri eða Verkmenntaskólanum á Akureyri. Yfir 400 umsóknir bárust um vist á þessu hausti, en pláss er fyrir 330. -
Man varla eftir því að hafa fundið upp nafnið
Norðurþing fagnar 20 ára afmæli á þessu ári -
Litríkt starfsfólk Norðurorku
Starfsfólk Norðurorku tók þátt í Treyjudeginum í dag og mætti í sínum uppáhalds íþróttatreyjum til stuðnings börnum með krabbamein og fjölskyldum þeirra.
