Tap hjá Þór

Þór mátti sætta sig við tap á heimavelli gegn ÍR þegar liðin mættust á Akureyrarvelli í kvöld í 1. deild karla í knattspyrnu. Lokatölur leiksins urðu 2-1 sigur gestanna sem hefði þó hæglega getað orðið stærri.  

Heimamenn hófu leikinn vel, voru mun meira með boltann og pressuðu gestina stíft án þess þó að ná að skapa sér marktækifæri. Það voru hinsvegar gestirnir í ÍR sem skoruðu fyrsta mark leiksins og það gegn gangi leikisins. Markið kom á 10. mínútu eftir hornspyrnu og var þar að verki Erlingur Jack Guðmundsson.

Heimamenn virtust slegnir útaf laginu og eftir markið komust gestirnir meira inn í leikinn. Heimamenn spýttu í lófana og á 32. mínútu tókst þeim að jafna metin. Þar var að verki Einar Sigþórsson er hann fékk boltann fyrir lappirnar eftir hornspyrnu og afgreiddi boltann í netið og staðan 1-1. ÍR-ingar voru nálægt því að bæta við öðru marki sínu í leiknum á 34. mínútu þegar þeir fengu dauðafæri inn í teig heimamanna. Tveimur mínútum síðar sluppu heimamenn aftur með skrekkinn er gestirnir áttu góðan skalla rétt framhjá markinu eftir hornspyrnu.

Staðan í hálfleik 1-1 og máttu heimamenn þakka fyrir að vera ekki mörkum undir.

Jafnræði var með liðunum í byrjun seinni hálfleiks. Á 53. mínútu fékk Atli Sigurjónsson ágætis færi fyrir heimamenn en skot hans fór framhjá markinu. Fjórum mínútum síðar fengu gestirnir úrvalsfæri þegar Guðfinnur Þórir Ómarsson komst einn í gegn en Atli Már Rúnarsson markvörður Þórs varði vel í markinu. Nokkrum mínútum síðar þurfti Atli aftur að taka á honum stóra sínum þegar hann varði vel skot gestanna sem voru sloppnir í gegnum vörn Þórs.

Stíf pressa ÍR- inga skilaði marki á 65. mínútu þegar Árnir Freyr Guðnason stakk sér á milli tveggja varnarmanna Þórs og skoraði framhjá Atli í marki heimamanna og kom gestunum í 2-1.

Heimamenn reyndu hvað þeir gátu til þess að jafna leikinn. Hreinn Hringsson fékk ágætis færi á 71. mínútu þegar hann fékk fína sendingu inn í teig en hitti boltann skelfilega og skotið fór framhjá markinu. Hreinn fékk svo aftur ágætis færi á 90. mínútu en inn vildi boltinn ekki og lokatölur á Akureyrarvelli í kvöld 2-1 sigur ÍR.

Eftir þrjár umferðir hafa Þórsarar þrjú stig og sitja í 6. sæti deildarinnar.

  

Nýjast