Rauna-launa-saga
Fyrir nokkrum árum skrifaði ég grein þar sem mér var tíðrætt um laun mín í sumarvinnu í leikskóla miðað við laun sonar míns sem í sinni sumarvinnu sló gras í kirkjugörðum okkar Akureyringa. Þá var munurinn 15.000 krónur mér í vil og ástæðan var aðallega sú að ég hafði verið heimvinnandi, var með stúdentspróf og búin með eitt ár í leikskólakennaranámi. Árið 2008 kláraði ég námið. Sökum aldurs og fyrri reynslu fór ég strax í hæsta þrep í launatöflunni öfugt við unga fólkið sem útskrifaðist með mér. Að ári liðnu hækkaði ég um launaflokk og að auki fékk ég, eins og annað launafólk, rúmlega 20.000 króna launahækkun með stöðugleikasáttmálanum. Laun mín í dag eru tæplega 269.000 kr. á mánuði. Þriggja ára háskólanám og rúmlega tuttugu ára reynsla við uppeldi og störf með börnum er metið á þessa upphæð.
Nú hefur kjarasamningur Félags leikskólakennara verið laus síðan í haust og ekkert gengur að ná sátt við sveitarfélögin sem bera við peningaleysi sökum kreppu. Þau hafa sparað með því að skera niður yfirvinnu og nú er svo komið að flestir leikskólakennarar þessa lands eru á berstrýpuðum taxtanum sem vel að merkja eru lágmarkslaun en fæst sveitarfélaganna telja sér fært að borga krónu hærra fyrir allt það frábæra fólk sem í leikskólunum kennir. Í raun fór það eins og ég óttaðist að þegar fengin var heimild til að samkeyra grunn- og leikskóla sem vel að merkja var gerð til að koma á móts við fámenn sveitarfélög, færu stóru sveitarfélögin að beita þessari heimild í sparnaðarskyni en ekki eins og tilgangurinn var, að greiða fyrir góðu skólastarfi.
Leikskólakennarar eru vel menntaðir og háskólagengnir. Leikskólakennarar leggja sig fram um að hlúa að æsku þessa lands, fræða og annast um hana. Leikskólakennarar eru með börnunum megnið af sínum vinnutíma meðal annars borða þeir alltaf með börnunum. Leikskólakennarar eru staðgenglar foreldra þeirra á meðan á skóladvölinni stendur. Leikskólakennarinn er sá sem mest áhrif hefur á þroska barnsins þegar foreldrunum sleppir fyrstu árin í lífi þess. Í stöður þeirra viljum við úrvalsfólk. Slíku fólki þarf að greiða mannsæmandi laun og gott betur en það.
Að lokum vil ég segja ykkur að sonur minn útskrifaðist sem iðnaðarmaður árið 2008 eins og ég. Hann er nú með rúmlega 60.000 krónum hærra kaup en ég á mánuði í fastakaup en að auki er hann yfirleitt með a.m.k. 20 tíma í yfirvinnu ofan á það. Hans vinnuveitandi telur hann vel þess virði.
Höfundur er leikskólakennari á fimmtugsaldri og í stjórn Félags leikskólakennara.
Nýjast
-
Sundlaug Akureyrar lokuð 18.-22. maí – opið lengur í Glerárlaug 18. maí
Sundlaug Akureyrar verður lokuð dagana 18.-22. maí eða frá sunnudegi til fimmtudags í næstu viku. -
Byggingaréttur á lóðum á Torfunefsbryggju boðin út í maí
Byggingaréttur á tveimur lóðum við Torfunefsbryggju þar sem eru til staðar fimm byggingareitir verður boðin út nú síðar í maí. -
Sumarið er komið!
Þetta dásamlega veður sem landsmenn njóta er gleðiefni og er þá vægt tekið til orða, á heimasíðu Þingeyjarsveitar er þessari blíðu fagnað. -
Skýr og lausnamiðuð afstaða Framsóknar til veiðigjalda
Framsókn hefur tekið skýra og málefnalega afstöðu í umræðunni um veiðigjöld. Við styðjum heilshugar réttmæta kröfu samfélagsins um að sameiginleg sjávarauðlind þjóðarinnar skili arði sem gagnast samfélaginu öllu. Hins vegar skiptir máli hvernig það er gert. Óvönduð skattheimta getur skaðað atvinnulíf, dregið úr nýsköpun og veikt byggðir sem byggja afkomu sína á sjávarútvegi. -
Farsæld í brennidepli – öll eru velkomin! Sjónaukinn 2025
Í heimi þar sem hraði breytinga og flókin samfélagsmál eru daglegt brauð, skiptir máli að staldra við og beina sjónum að því sem skiptir mestu máli: farsæld fólks. Ráðstefnan Sjónaukinn 2025, sem haldin verður við Háskólann á Akureyri dagana 19. og 20. maí, leitast við að varpa ljósi á fjölbreyttar leiðir til að efla samfélagslega velferð og vellíðan. Undirtónn ráðstefnunnar er skýr: Við höfum öll hlutverki að gegna – og með samvinnu getum við skapað samfélag þar sem enginn er skilinn eftir. -
Vel heppnaður Súpufundur atvinnulífsins haldinn á Múlabergi
Í hádeginu í gær fór fram vel heppnaður Súpufundur atvinnulífsins á Múlabergi, Hótel KEA, þar sem stjórnendur um fimmtíu fyrirtækja og stofnana komu saman til að ræða framtíð atvinnulífsins á svæðinu. -
Ársfundur HSN Jákvæð þróun þrátt fyrir áskoranir í rekstri
Ársfundur Heilbrigðisstofnunar Norðurlands (HSN) fór fram í Hofi á Akureyri þriðjudaginn 13. maí 2025. Þar voru kynntar niðurstöður fyrir rekstrarárið 2024. Þrátt fyrir áskoranir í rekstri varð þó mjög jákvæð þróun í starfsemi, þjónustu og mannauðsmálum sem gefur tilefni til bjartsýni fram veginn. -
Auðlindirnar í þjóðareign.
Margir biðu spenntir eftir því að Alþingi tæki til starfa eftir páskafrí þingmanna og ég var þeirra á meðal. Á dagskrá þingsins voru hugmyndir um að hækka talsvert skatta sem lagðir eru á sjávarútveginn umfram aðra atvinnuvegi. Mér fannst þetta áhugaverð hugmynd og hlakkaði til að hlusta á upplýsandi umræðu um auðlindir og auðlindanýtingu. Ég kom mér því notalega fyrir við sjónvarpsskjáinn áður en Silfrið byrjaði í sjónvarpi Ríkisútvarpsins fyrsta mánudag eftir frí þingmanna. -
Fimm tilboð í göngubrú
Fimm tilboð bárust í byggingu á nýrri steinsteyptri göngubrú í götustæði Borgarbrautar, auk stígagerðar að aðliggjandi stígum, uppsetningu á grjótkörfum, stoðveggjum og uppsetningu á lýsingu.