Prinsar og prinsessur án konungsdæmis!
Sigurður Guðmundsson.
Það þótti sæta tíðindum í sl. viku að allir kjörnir fulltrúar hjá Akureyrarbæ skriðu undir sömu sængina og ætla að vera vinir næstu tvö árin eða svo. Allir sem einn ætla að taka þátt í því starfi, sem þarf til að bregðast við þeim vanda sem framundan er í fjármálum sveitarfélagsins. Það vekur furðu mína hvað menn og konur hafa þá verið að gera hingað til þessi rúmu tvö ár sem eru liðin af kjörtímabilinu. Lítil eru stórvirkin þessi rúmu tvö ár sem liðin eru frá kosningum nema þá helst að hafa skilað verkefnum aftur til ríkisvaldsins sem ber að hrósa fyrir.
Úr fjarlægð lítur þetta vel út. Allir að vinna saman að háleitum markmiðum. Skipta nokkrum bittlingum á milli sín og trúa í einlægni að verið sé að gera góða hluti. Allir vinir og olnboga hvert annað í taumlausri hamingju. Þar er fyrsta hættumerkið á lofti. Get ekki með nokkru móti skilið hvað bæjarfulltrúum gekk til með þessum nýja meirihluta. Það er ekki lengur nokkur minnihluti sem veitt getur meirihlutanum aðhald sem er nauðsynlegt í öllu pólitísku starfi. Ógn við lýðræðið og frjálsa umræðu. Enginn bæjarfulltrúi getur sagt að hann hafi ekki verið sammála þessu eða hinu enda í einhverju 100% meirihlutahlutasamstarfi sem er í ætt við kommúnisma frekar en lýðræðisleg stjórnmál.
Var lýðræðinu hafnað á Akureyri? Stjórnsýslan er hönnuð fyrir fulltrúalýðræði en ekki svona óskapnað. Þegar þessi kokteill er skoðaður nánar má velta sér fyrir hver græðir á þessum bræðingi 6 framboða á Akureyri. Það er reyndar allskonar svör við því. Tap bæjarins á þessu ári og hinu næsta verður líklega um 6 milljarðar fyrir þessu tvö ár. Nú þegar allt er komið í niðurfallið vaknar fólk við vondan draum, að með athafnaleysi sínu fyrri hluta þessa árs þarf meira en samstillt átak til að snúa skútunni upp í vindinn og festa stefnuna að höfn. Það er auðvitað bráðfyndið að enginn vildi Sjálfstæðismenn í meirihluta, nema þá kannski ég og nokkrir aðrir eftir síðustu kosningar. Menn og konur signdu sig, kveiktu á kertum og komu börnum í skjól þegar ég hafði uppi orð um það. Nú þykir það bara fínt að fá þá með í grautarpottinn enda eru allir svo æðislega góðir vinir. Það er örlítið snjallt hjá meirihlutanum að leyfa minnihlutanum að koma undir hlýja sængina.
Þar koma 5 bæjarfulltrúar sem gera sér ekki grein fyrir að um leið og allir brostu saman í meðvirkni voru viðkomandi bæjarfulltrúar komnir með vinstri eða hægri fótinn pikkfastann í það skuldafen sem bærinn er að falla í. Auðvelt verður að segja mánuði fyrir kosningar að bæjarstjórnin í heild sinni hafi klúðrað öllu sem hægt væri að klúðra. Þessir 5 halda á móti að með því að fá formennsku í einhverjum nefndum, færi það þeim völd, frægð og upphefð. Málið er einfaldlega þannig að svigrúmið er eiginlega ekkert nema með aukinni skuldsetningu bæjarins. Það vill enginn sjá enda vandinn gríðarlegur framundan. Lántaka er samt óumfrýjanleg og mikilvægt að sú lántaka fari ekki í gæluverkefni til að gera kjósendur glaða. Að auki þarf bæjarstjórinn að hlusta á 6 krakka í sandkassa sem koma til með að klaga hvorn annan fyrir að hafa verið leiðinleg og stilla til friðar.
Einnig þykir mér líklegt að 1 eða 2 bæjarfulltrúar stefni á þingmennsku á næsta kjörtímabili og sé það ástæða þess að bæjarstjóri eigi að hleypa kjörnum fulltrúm meira að þegar kemur að viðtölum og umfjöllunum um bæjarmál. Nú hlýtur að blasa við að uppsagnir séu í farvatninu hjá Akureyrarbæ. Skerðing á þjónustu og gjaldskrár mögulega hækkaðar. Verður því fróðlegt að fylgjast með hversu mikil samstaða í þessari bæjarstjórn verður við slík verkefni. Það eru mestmegnis vondar ákvarðanir sem þarf að taka á næstunni og ég held að kjörnir fulltrúar hafi ekki dug í sér til að taka þær nema þá í skjóli nafnleyndar.
-Sigurður Guðmundsson, höfundur er fyrrum bæjarfulltrúi á Akureyri
Nýjast
-
Stöðug aukning í blóð- og krabbameinsmeðferðum hjá SAk
Krabbameinsfélag Akureyrar og nágrennis afhenti formlega á dögunum almennu göngudeildinni á SAk þrjá meðferðarstóla og þrjú hliðarborð. Mikil aukning hefur orðið í blóð- og krabbameinsmeðferðum undanfarin ár og stefnir í að svo verði áfram. -
Formannaskipti í Sjálfsbjörg, félagi fatlaðara á Akureyri og nágrenni
Formannaskipti urðu í Sjálfsbjörg, félagið fatlaðra á Akureyri og nágrenni á aðalfundi nýverið. Herdís Ingvadóttir lét af formennsku eftir 24 ár. Hún getur að sögn gengið stolt frá borði eftir farsæla setu í stól formanns. Hún hafði um 6 ára skeið þar á undan setið í stjórn félagsins eða í allt í þrjá áratugi. -
Mikil aukning á hótunum og beitingu á ofbeldi gagnvart lögreglu á Norðurlandi eystra.
,,Það er ljóst að það að hér er um grafalvarlega stöðu að ræða. Svar dómsmálaráðherra við fyrirspurninni sýnir okkur að þróunin á starfssvæði lögreglustjórans á Norðurlandi eystra er með þeim hætti að það er nauðsynlegt að bregðast við. Það er mikilvægt að greina þessa stöðu. Hver er ástæðan fyrir þessari miklu fjölgun á brotum gegn lögreglumönnum og opinberum starfsmönnum á þessu landsvæði það er Norðurlandi eystra“ segir Njáll Trausti Friðbertsson þingmaður og oddviti Sjálfstæðisflokksins í Norðausturkjördæmi. -
Boðskapur frá forsetaframbjóðanda
Það hafa kannski margir klórað sér í hausnum yfir þátttöku minni í forsetakosningunum þar sem ég stíg nú eins og landkönnuður á nýjum slóðum og tek með mér ný og fersk sjónarhorn, smá húmor og djúpstæða trú á mátt hins ómögulega. Ég er eflaust ekki hinn hefðbundni frambjóðandi en ég er án efa ferskur blær inn í flokk frambjóðenda og það er einmitt það sem gerir þetta stóra verkefni svo skemmtilegt og hvetjandi. -
Líf að færast í Holtahverfi
Líf er að færast í nýtt Holtahverfi norður, svæði á milli Krossanesbrautar og smábátahafnar í Sandgerðisbót. Húsin rísa hvert á fætur öðru og fyrstu íbúarnir hafa komið sér fyrir í nýjum íbúðum. Enn er eitthvað eftir af lóðum og er Akureyrarbær um þessar mundir að auglýsa par- og raðhúsalóðir lausar til úthlutunar, en m.a. eru nokkrar lóðir lausar við Álfaholt, Hulduholt og Þursaholt. -
Frú Ragnheiður - Færri í nálaskiptaþjónustu en fleiri komu í bílinn
Fjöldi einstaklinga sem leitaði til Frú Ragnheiðar árið 2023 var 51 í 584 heimsóknum en árið 2022 voru einstaklingarnir 46 í 412 heimsóknum. Af þessum fjölda voru 10 viðbragðsaðilar og einstaklingar sem leituðu til verkefnisins til að fá Nyxoid nefúðann. Ekki er því um fjölgun skjólstæðinga í nálaskiptaþjónustu að ræða en þeim fækkaði um fimm milli ára, úr 46 í 41. -
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á.
Athugasemdir