Ljúft er að láta sig dreyma
Um þessar mundir er bæjarstjórn Akureyrar að kynna skipulagslýsingu á svæði sem kennt er við Tónatröð. Með því er ætlunin að þar verði fjölbýlishús í stað einbýlishúsa sem gert var ráð fyrir í eldra skipulagi. Fyrir nokkrum misserum voru uppi miklar deilur um fyrstu hugmyndir að hærri fjölbýlishúsum þarna. Nú hefur bæjarstjórn opinberað nýjar útfærslur með lægri húsum og hvetur bæjarbúa til að kynna sér þær og koma með ábendingar og hugmyndir að breytingum ef þeim þykir ástæða til. Síðan verði þær skoðaðar og metnar í bæjarkerfinu og í framhaldi af því teknar lokaákvarðanir um skipulag á þessum bletti.
Þegar þarna var komið svelgdist undirrituðum svolítið á og hugsaði til þess þegar sama bæjarstjórn kynnti verulegar breytingar á skipulagi miðbæjarins og óskaði eftir athugasemdum við þær frá bæjarbúum. Ekki stóð upp á íbúa bæjarins enda komu fram fjölmargar athugasemdir, smáar og stórar. Til að mynda lagði undirritaður fram níu síðna, vel rökstudda greinargerð þar sem gerðar voru alvarlegar athugasemdir við ýmislegt sem bæjarstjórn stefndi að því að breyta frá því sem samþykkt hafði verið samhljóða árið 2014. Aðrir bentu á fjölmargt sem þeim lá á hjarta í þessu sambandi. Því miður hafði bæjarstjórn ekki einu sinni þrek til að leiðrétta misskilning eða vafasamar fullyrðingar sem fram komu í athugasemdum hvað þá að tjá sig um flóknari álitaefni svo sem skipan vega og gangbrauta og vistvæna umferð í miðbænum. Ekki vantaði þó að bæjarfulltrúar töluðu um þessar mundir fjálglega um nauðsyn þess að hafa gott og náið samráð við bæjarbúa um svona þýðingarmikið málefni og látið eins og álit þeirra skipti einhverju máli. Skemmst er frá því að segja að ekkert var gert með athugasemdir sem komu frá bæjarbúum hvort heldur þær voru vel ígrundaðar eða ekki. Hvorki bæjarstjórn í heild né einstakir bæjarfulltrúar svöruðu einni einustu fyrirspurn opinberlega um málið, útskýrðu heldur ekki tillögur sínar eða tóku þátt í opinberri umræðu um þær. Algjör þögn af þeirra hálfu. Þess í stað fékk bæjarstjórn verkfræðistofu úti í bæ til að tipla í greinargerð á nokkrum atriðum málsins og gerði það yfirklór að sínu með formlegri samþykkt í bæjarstjórn. Búið.
Nú hefur undirritaður síður en svo nokkuð á móti þessum nýjustu tillögum við Tónatröð en tek eftir að einhverjir hafa áhyggjur af þeim og vilja leggja orð í belg, spyrja og gera athugasemdir. Allt í góðu með það. En við það ágæta fólk vil ég segja þetta: Gerið ykkur ekki of miklar vonir um að á ykkur verði hlustað því fyrir liggur sú dapurlega reynsla að þetta svonefnda samráð er í besta falli bara grín. Satt að segja bendir allt til þess að bæjarfulltrúar muni að þessu aðlögunarferli loknu, loka sig af, ástunda hrossakaup innbyrðis og taka svo einhliða ákvarðanir án þess að taka tillit til ábendinga utan frá eins og gert var varðandi miðbæinn. Því er full ástæða til að vara fólk við að eyða miklum tíma, fé og fyrirhöfn í að leggja fram vandaðar athugasemdir við ríkjandi aðstæður. Hins vegar vekur athygli að flótti er brostinn á flesta bæjarfulltrúa og verða margir þeirra ekki í framboði næsta vor. Í því gætu falist áður óþekktir möguleikar þegar nýtt fólk kemur til leiks og treystir sér vonandi til að hlusta á og jafnvel ræða við bæjarbúa á jafnréttisgrundvelli. Þá aukast lýkur á að mörg málefni sem horfa til framfara í bænum okkar fái vængi og farsælan endi og komist jafnvel til framkvæmda sem mundi teljast til nokkurra tíðinda hér í bæ. Þegar allt er skoðað er bæði ljúft og gagnlegt að láta sig dreyma um betri tíð í þessum efnum enda mörg framfaramál átt rót sína að rekja til drauma sem svo rættust með samstilltu átaki.
Ragnar Sverrisson
kaupmaður
Nýjast
-
Samherji og Ice Fresh Seafood á stærstu sjávarútvegssýningu heims
Alþjóðlega sjávarútvegssýningin Seafood Expo Global í Barcelona á Spáni opnaði í gær, 23. apríl. Sýningin er sú stærsta sinnar tegundar í heiminum á sviði veiða, vinnslu og sölu sjávarafurða. Samherji og Ice Fresh Seafood eru að venju með stóran og vel útbúinn bás, þar sem tekið er á móti gestum frá öllum heimshlutum og afurðir kynntar. Ice Fresh Seafood sér um að selja afurðir Samherja og fleiri fyrirtækja. -
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt. -
Mörg þúsund manns árlega á faraldsfæti suður til lækninga
Þjónusta Sjúkrahússins á Akureyri hefur dregist saman undanfarin misseri. Því fer fjarri að SAK nái að uppfylla það hlutverk sem skilgreint er í lögum um heilbrigðisþjónustu, þar sem m.a. segir að sjúkrahúsið eigi að veita þjónustu í nær öllum sérgreinum lækninga og vera varasjúkrahús Landspítala -
Lögreglan á Norðurlandi eystra rannsakar andlát
Eftirfarandi tilkynningu sendi lögreglan á Norðurlandi eysta frá sér nú rétt í þessu. Klukkan 04:30 aðfaranótt mánudags var lögreglan á Norðurlandi eystra kölluð að fjölbýlishúsi á Akureyri. Fyrstu lögreglumönnum sem komu á vettvang var vísað á meðvitundarlausa konu í íbúðinni og hófust endurlífgunartilraunir þegar í stað. Læknir og sjúkraflutningamenn komu einnig á vettvang en tilraunir til endurlífgunar báru ekki árangur og var konan úrskurðuð látin á vettvangi. -
Svona er síminn hannaður til að stela athygli okkar
Af hverju er svona erfitt að leggja frá sér símann? Er efnið sem þar er að finna alltaf svo mikilvægt og áríðandi að það gengur fyrir þau samskipti sem við erum að eiga við fólkið í kringum okkur? Förum við í símann þegar að við erum undir stýri? (Já það telst líka með að gera það á rauðu ljósi). Lengjum við klósettferðirnar okkar til að vera lengur í símanum? Leggjum við símann alltaf á borðið á fundum, í kaffitímanum eða við matarboðið og leyfum þannig tilkynningunum á skjánum að stela athygli okkar? Setjum við börnin okkar fyrir framan skjá til þess að kaupa okkur sjálfum skjátíma? Leitum við í símann alltaf þegar að okkur leiðist? Erum við hrædd við að vera vandræðaleg á almannafæri og förum í símann til að þykjast vera að sinna einhverju mikilvægu frekar en að líta upp og leyfa huganum að reika? Dettum við út í samtölum við annað fólk því við ætluðum að fletta einhverju eldsnöggt upp en rákumst svo á eitthvað annað sem greip athygli okkar? Getum við átt gæðastundir með fjölskyldunni án þess að láta símann trufla okkur?
Athugasemdir