Kaffistofan: Dularfullar sveiflur í sölu á undanrennu
Hér vantar sko ekki undanrennu
Á Kaffistofu Skarps ræða starfsmenn og gestir alls konar málefni, stór og smá af mismikilli alvöru. Nú gefst lesendum loks tækifæri til að vera flugur á vegg kaffistofunnar.
Einn af starfsmönnum fjölmiðilsins var í öngum sínum yfir morgunkaffinu. Ástæðan ku vera sú að nýlega tók þessi umræddi starfsmaður það ábyrgðarfulla hlutverk að sér; að koma við í einni af verslunum bæjarins og kaupa undanrennu fyrir aldraðan föður sinn. Og eins og allir vita er nýlenduverslanaflóran æði fjölbreytt á Húsavík um þessar mundir.
Þar sem starfsmaðurinn er lítt gefinn fyrir ys, þys og almennt öngþveiti valdi hann að fara fyrst í Krambúðina. Ekki fann hann undanrennuna þar sem hann taldi að hún ætti að vera og vatt sér því að afgreiðslustarfsmanni og bað um aðstoð. Þá var honum tjáð að enginn undanrenna væri til, hún væri hreinlega uppseld.
Lúpulegur hafði starfsmaður Skarps sig á brott og þótti þetta undarlegt í meira lagi. Hann hafði síðar á orði að það kæmi varla nokkurn tíma fyrir að sæist til viðskiptavina leggja leið sína inn í þessa ágætu verslun – hvernig gæti nokkuð orðið uppselt þar?
Hann lét sig hafa það að stökkva inn í Netto, enda þótt þar séu jafnan heljarinnar biðraðir við kassana og almennt öngþveiti. Í Netto var heldur enga undanrennu að finna – þar var hún einnig uppseld. Hann fékk þær upplýsingar að ástæðan fyrir undanrennuskortinum væri helst sú að sveifla í sölu á undanrennu er mjög mikil á Húsavík. Þannig hefur það oft og iðulega komið fyrir að henda þurfi miklu magni af þessum guðaveigum. Þar sem mikil vakning hefur orðið í þjóðfélaginu um matarsóun hefur verið brugðist við þessum afföllum með því að panta minna inn af vörunni. En þá fyrirvaralaust verður sprenging í sölunni og engar vísindalegar rannsóknir liggja fyrir um hvað orsaki þessar sveiflur.
Starfsmanni Skarps tókst að lokum að verða sér úti um undanrennu fyrir föður sinn suður í Olís en það var jafnframt síðasta fernan í versluninni og væntanlega í öllum bænum. Var honum talsvert létt en þó gat hann ekki hætt að hugsa um dularfullar undanrennusölusveiflurnar og tók sem sé málið upp á kaffistofu Skarps í morgunsárið. Niðurstaða þeirra vangaveltna varð sú að Bakkus væri líklega sökudólgurinn í þessu sem mörgu öðru.
Allir vita auðvitað að fátt er betra en undanrenna til að losna við eða milda erfiða þynku. Nú er einmitt tími þorrablótanna og bæjarbúar og nærsveitungar því mikið mun tíðar þunnir en gengur og gerist.
Þá vita verslunaraðilar á Húsavík það, að panta inn aukabyrðir af undanrennu hvenær sem þorrablót eða aðrar svallveislur eru auglýstar í bænum.
Nýjast
-
Alþjóðaflugvöllur á Akureyri verði byggður upp
Sveitarfélögin á Norðurlandi vestra og Norðurlandi eystra skora á ríkisstjórn Íslands og Alþingi að koma rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi, sem hefur það að markmiði að alþjóðaflugvöllurinn sé byggður upp og kynntur sem ein af gáttum Íslands -
Grafalvarleg staða í rekstri PCC Bakka rædd í atvinnuveganefnd Alþingis.
Atvinnuveganefnd Alþingis hefur verið upplýst um grafalvarlega stöðu í rekstri PCC Bakka við Húsavík, þar sem stefnt gæti í rekstrarstöðvun undir lok sumars ef ekki tekst að snúa vörn í sókn. -
Listasafnið á Akureyri Nýjar sýningar opnaðar
Sýningar Heimis Hlöðverssonar, Samlífi, og Þóru Sigurðardóttur,Tími – Rými – Efni, verða opnaðar í Listasafninu á Akureyri á laugardag 17. maí kl. 15. Á opnunardegi verður leiðsögn með Heimi kl. 15.45. -
Orkey fyrst á Íslandi með sjálfbærni- vottaða framleiðslu á lífeldsneyti
Orkey hefur fengið alþjóðlega kolefnis- og sjálfbærnivottun, ISCC EU, á lífdísilframleiðslu sína á Akureyri fyrst fyrirtækja sem framleiða lífeldsneyti hérlendis. -
Heyrn er ekki munaður – hún er þátttaka
Það var ánægjulegt að sækja fund hjá Félagi eldri borgara á Akureyri (EBAK) síðastliðinn föstudag. Rétt rúmlega hundrað manns mættu – áhugasamir, upplýstir og málefnalegir. Þar skapaðist gott samtal um þau mál sem brenna mest á eldra fólki í dag. Ábendingar komu víða að og spurningarnar voru margar og skýrar. Það var sérstaklega áberandi að umræðan snerist ítrekað að sömu kjarnamálunum: skerðingum, lífeyrissjóðum en einnig að heilbrigðisþjónustu. -
Sundlaug Akureyrar lokuð 18.-22. maí – opið lengur í Glerárlaug 18. maí
Sundlaug Akureyrar verður lokuð dagana 18.-22. maí eða frá sunnudegi til fimmtudags í næstu viku. -
Byggingaréttur á lóðum á Torfunefsbryggju boðin út í maí
Byggingaréttur á tveimur lóðum við Torfunefsbryggju þar sem eru til staðar fimm byggingareitir verður boðin út nú síðar í maí. -
Sumarið er komið!
Þetta dásamlega veður sem landsmenn njóta er gleðiefni og er þá vægt tekið til orða, á heimasíðu Þingeyjarsveitar er þessari blíðu fagnað. -
Skýr og lausnamiðuð afstaða Framsóknar til veiðigjalda
Framsókn hefur tekið skýra og málefnalega afstöðu í umræðunni um veiðigjöld. Við styðjum heilshugar réttmæta kröfu samfélagsins um að sameiginleg sjávarauðlind þjóðarinnar skili arði sem gagnast samfélaginu öllu. Hins vegar skiptir máli hvernig það er gert. Óvönduð skattheimta getur skaðað atvinnulíf, dregið úr nýsköpun og veikt byggðir sem byggja afkomu sína á sjávarútvegi.