Hætt að mynda dagblöð og tímarit á Amtsbókasafninu og starfsfólki sagt upp
Nú um mánaðamótin var starfsstöð sem verið hefur á Amtsbókasafninu á Akureyri lokað, en þar fór fram skönnun á dagblöðum og tímaritum. Samningur var á milli safnsins og Landsbókasafns um starfsemina, en síðarnefnda safnið á tækin sem notuð voru. Síðastliðin ár hafa þrír starfsmenn verið að störfum á stöðinni og var á tímabili unnið við verkefnið frá kl. 8 á morgnana til 20 á kvöldin. Um 30 þúsund blaðsíður voru myndaðar í hverjum mánuði að jafnaði.
Það er virkilega sorglegt að þurfa að hætta þessari starfsemi, hér hefur verið unnið mikið starf, starfsmenn hafa staðið sig einstaklega vel, bæði hvað varðar afköst og gæði. Fyrir liggja mörg mikilvæg verkefni á þessu sviði, en því miður er okkur tjáð að ekki séu til peningar í þetta verkefni," segir Hólmkell Hreinsson amtsbókavörður. Amtsbókasafnið lagði í töluverðan stofnkostnað vegna verkefnisins á sínum tíma auk þess að leggja til húsnæði undir starfsemina og greiða laun starfsfólks, en það var gert samkvæmt samningi við Landsbókasafnið sem greiddi kostnað við verkefnið.
Við höfum myndað íslensk dagblöð, öll stærstu blöðin og það gekk mjög vel framan af, en eftir hrun hvarf fjárveiting frá ríkinu til þessa verkefnis og undanfarin misseri höfum við unnið að einstökum verkefnum fyrir ýmsa aðila," segir Hólmkell og nefnir m.a. að allt upplag Æskunnar, Samvinnunnar, Fiskifrétta og fleiri sérblaða hafi verið mynduð og kostnaður greiddur af hagsmunafélögum sem tengjast málefninu. Þannig hafi t.d. Muninn, skólablað Menntaskólans á Akureyri, verið myndað á kostnað gamalla stúdenta. Öll blöð sem hafa verið mynduð eru aðgengileg á rafrænan hátt öllum þeim sem hafa nettengingu á vefsíðunni timarit.is.
Starfsfólki hefur nú verið sagt upp og búnaðurinn mun væntanlega liggja óhreyfður á safninu fram að áramótum og verður þá sendur suður á Landsbókasafn. Við gerum okkur auðvitað vonir um að fá verkefni og ætlum þess vegna að hafa búnaðinn hér nokkra mánuði í viðbót. Það eru næg verkefni fyrir hendi á þessu sviði, þetta er ekki allt saman búið," segir Hólmkell, en að hans mati er t.d. mikilvægt að mynda héraðsfréttablöð og gera þau þannig aðgengileg almenningi á vefnum. Auðvitað er gremjulegt að þurfa nú að pakka öllu saman og hætta þegar ærin verkefni eru fyrirliggjandi, starfsfólk og búnaður til staðar og það er hætt við að áralöng reynsla og þekking glatist," segir Hólmkell.
Nýjast
-
Göngugatan lokuð frá og með morgundeginum
Bæjarstjórn samþykkti 18. mars sl. að sá hluti Hafnarstrætis sem gengur jafnan undir heitinu „göngugatan“ verði lokaður frá 1. maí til 30. september eða í fimm mánuði. Þetta er umtalsvert lengri lokun en var síðasta sumar en þá var lokað í þrjá mánuði frá 3. júní til ágústloka. -
Guðmundur Ármann opnar sýningu laugardaginn 3. til 31. maí í Bergi, menningarhúsi Dalvíkinga
Á sýningunni, sem ber yfirskriftina Yrkja II, verða um 19 málverk máluð á árunum 2021 til 2025. Einnig nokkrar teikningar. Þessi sýning er í beinu framhaldi af sýningu minni á Bergi 2022 um sama yrkisefni. -
Bernskuheimilið mitt eftir Ólöfu Sigurðardóttur frá Hlöðum
Flóra Menningarhús í Sigurhæðum á Akureyri hefur hafið söfnun á Karolina Fund fyrir útgáfu á bókinni Bernskuheimilið mitt eftir Ólöfu Sigurðardóttur frá Hlöðum (1857-1933). Árið 1906 fékk Ólöf birta grein í tímaritinu Eimreiðinni undir heitinu Bernskuheimilið mitt sem telst vera fyrsti sjálfsævisögulegi þáttur íslenskrar konu. Greinin vakti á sínum tíma mikla athygli. Það að kona fjalli opinberlega og opinskátt um líf sitt og fjölskyldu sinnar má kalla uppreisn á þessum tíma "þegar konur áttu að standa vörð um heiður fjölskyldunnar, meðal annars með þagmælsku um eigin hagi og með því að þegja alltaf um það sem fór úrskeiðis" (Raghneiður Richter, Íslenskar konur-ævisögur, s. 11). Verkið hefur aldrei verið gefið út á bók en nú verður bætt úr því. Hægt er að styðja verkefnið og kaupa bækur í forsölu hér: https://www.karolinafund.com/project/view/6459 -
Metfjölda notaðra snjalltækja skilað inn hjá Elko
Með tilliti til sjálfbærni var árið 2024 sögulegt fyrir ELKO – sérstaklega á Akureyri þar sem viðskiptavinir skiluðu inn og keyptu alls 400 notuð snjalltæki. Þetta gerir árið að metári í viðskiptum með notuð raftæki í versluninni þar í bæ. -
Kostuleg klassík með Sinfóníuhljómsveit Westmont-háskóla í Kaliforníu
Sinfóníuhljómsveit Westmont-háskóla í Kaliforníu er væntanleg til landsins á vormánuðum. Hún leikur á þrennum tónleikum í maí. Aðgangur er ókeypis á þá alla en sækja þarf miða á tix.is: -
Opið fyrir umsóknir í Slipptöku Driftar EA 2025
Drift EA hefur opnað fyrir umsóknir í Slipptökuna (e. Test Drive) 2025. Í Slipptökunni felast fjórar kraftmiklar vinnustofur fyrir frumkvöðla og teymi með hugmyndir sem eru tilbúnar á næsta stig. Slipptakan endar á formlegri kynningu verkefnanna þar sem valin verkefni komast áfram í Hlunninn. -
Þorsteinn Kári gefur út Skuggamynd
Lagið var hljóðritað að mestu leyti á Akureyri síðla árs 2023, en trommurnar voru hljóðritaðar í Berlín. Upptöku á Akureyri stjórnaði Þorsteinn Kári sjálfur, en tökum á trommum stjórnuðu Jón Haukur Unnarsson ásamt Nirmalya Banerjee. -
Fjármögnun lokið á nýrri landeldisstöð Samherja
Samherji fiskeldi ehf., dótturfélag Samherja hf., hefur lokið fjármögnun fyrsta áfanga Eldisgarðs, nýrrar landeldisstöðvar við Reykjanesvirkjun, með útgáfu nýs hlutafjár og sambankaláni. Fjármögnun fyrsta áfanga nemur 235 milljónum evra, jafnvirði 34 milljarða króna. Eitt hundrað ný störf verða til í stöðinni og annar eins fjöldi afleiddra starfa. Stefnt er að því að taka stöðina í notkun á fyrsta ársfjórðungi 2027. -
Ný bók frá Gunnari J. Straumland
Út er komin hjá bókaútgáfunni Sæmundi ný bók eftir Húsvíkinginn Gunnar J. Straumland.
