Fyrsta frumsýning vetrarins hjá LA á föstudaginn
Leikfélag Akureyrar frumsýnir gamanleikinn Svörtu kómedíuna föstudaginn 14. október kl. 20.00 í Samkomuhúsinu. Um er að ræða verk eftir Peter Shaffer, skrifað árið 1965 og eitt af fáum gamanleikjum sem hann samdi. Frægustu verk hans eru AMADEUS og EQUUS sem bæði hafa verið sýnd á leiksviðum hér á landi. Síðar gerði Peter Shaffer sjálfur kvikmyndahandrit eftir verkunum og Amadeus í leikstjórn Milos Forman varð mjög vinsæl og hefur hlotið fjölmörg verðlaun.
Sýning LA á Svörtu kómedíunni er önnur uppfærsla verksins á Íslandi, leikritið var sýnt hjá Leikfélagi Reykjavíkur í Iðnó árið 1973 og var mjög vinsælt og uppselt á sýninguna í tvö leikár. Vigdís Finnbogadóttir þýddi verkið fyrir LR á sínum tíma, en hjá LA er notuð ný þýðing eftir Eyvind Karlsson. Svarta kómedían gerist í London árið 1965. Ungur, fátækur listamaður og unnusta hans fá ríkulega antíkhúsmuni að láni án leyfis til að ganga í augun á föður hennar, uppskrúfuðum og stífum offursta, og þýskum auðkýfingi sem er væntanlegur til að skoða verk listamannsins unga. Fyrirvaralaust fer rafmagnið af. Eigandi húsgagnanna kemur óvænt heim, fyrrverandi ástkona mætir óboðin og heimspekilegur rafvirki reynir að bjarga málunum. Eins og við er að búast er útkoman skelfilegur og sprenghlægilegur glundroði.
Leikarar í sýningunni eru: Anna Gunndís Guðmundsdóttir, Árni Pétur Guðjónsson, Einar Aðalsteinsson, Gestur Einar Jónasson, Guðmundur Ólafsson, Ívar Helgason, Sunna Borg og Þóra Karitas Árnadóttir. Leikstjóri sýningarinnar er María Sigurðardóttir, leikhússtjóri LA, leikmynd hannar Þórarinn Blöndal, búningahönnun er í höndum ODDdesign, lýsingu hannar Lárus H. Sveinsson og hljóðmynd og hljóðstjórn er í höndum Gunnars Sigurbjörnssonar. Það má segja að sýningin sé norðlensk í húð og hár, en allir listrænir stjórnendur koma af Akureyrarsvæðinu. Svarta kómedían á eftir að koma á óvart og skemmta ungum sem öldnum.
Nýjast
-
Guðmundur Ármann opnar sýningu laugardaginn 3. til 31. maí í Bergi, menningarhúsi Dalvíkinga
Á sýningunni, sem ber yfirskriftina Yrkja II, verða um 19 málverk máluð á árunum 2021 til 2025. Einnig nokkrar teikningar. Þessi sýning er í beinu framhaldi af sýningu minni á Bergi 2022 um sama yrkisefni. -
Bernskuheimilið mitt eftir Ólöfu Sigurðardóttur frá Hlöðum
Flóra Menningarhús í Sigurhæðum á Akureyri hefur hafið söfnun á Karolina Fund fyrir útgáfu á bókinni Bernskuheimilið mitt eftir Ólöfu Sigurðardóttur frá Hlöðum (1857-1933). Árið 1906 fékk Ólöf birta grein í tímaritinu Eimreiðinni undir heitinu Bernskuheimilið mitt sem telst vera fyrsti sjálfsævisögulegi þáttur íslenskrar konu. Greinin vakti á sínum tíma mikla athygli. Það að kona fjalli opinberlega og opinskátt um líf sitt og fjölskyldu sinnar má kalla uppreisn á þessum tíma "þegar konur áttu að standa vörð um heiður fjölskyldunnar, meðal annars með þagmælsku um eigin hagi og með því að þegja alltaf um það sem fór úrskeiðis" (Raghneiður Richter, Íslenskar konur-ævisögur, s. 11). Verkið hefur aldrei verið gefið út á bók en nú verður bætt úr því. Hægt er að styðja verkefnið og kaupa bækur í forsölu hér: https://www.karolinafund.com/project/view/6459 -
Metfjölda notaðra snjalltækja skilað inn hjá Elko
Með tilliti til sjálfbærni var árið 2024 sögulegt fyrir ELKO – sérstaklega á Akureyri þar sem viðskiptavinir skiluðu inn og keyptu alls 400 notuð snjalltæki. Þetta gerir árið að metári í viðskiptum með notuð raftæki í versluninni þar í bæ. -
Kostuleg klassík með Sinfóníuhljómsveit Westmont-háskóla í Kaliforníu
Sinfóníuhljómsveit Westmont-háskóla í Kaliforníu er væntanleg til landsins á vormánuðum. Hún leikur á þrennum tónleikum í maí. Aðgangur er ókeypis á þá alla en sækja þarf miða á tix.is: -
Opið fyrir umsóknir í Slipptöku Driftar EA 2025
Drift EA hefur opnað fyrir umsóknir í Slipptökuna (e. Test Drive) 2025. Í Slipptökunni felast fjórar kraftmiklar vinnustofur fyrir frumkvöðla og teymi með hugmyndir sem eru tilbúnar á næsta stig. Slipptakan endar á formlegri kynningu verkefnanna þar sem valin verkefni komast áfram í Hlunninn. -
Þorsteinn Kári gefur út Skuggamynd
Lagið var hljóðritað að mestu leyti á Akureyri síðla árs 2023, en trommurnar voru hljóðritaðar í Berlín. Upptöku á Akureyri stjórnaði Þorsteinn Kári sjálfur, en tökum á trommum stjórnuðu Jón Haukur Unnarsson ásamt Nirmalya Banerjee. -
Fjármögnun lokið á nýrri landeldisstöð Samherja
Samherji fiskeldi ehf., dótturfélag Samherja hf., hefur lokið fjármögnun fyrsta áfanga Eldisgarðs, nýrrar landeldisstöðvar við Reykjanesvirkjun, með útgáfu nýs hlutafjár og sambankaláni. Fjármögnun fyrsta áfanga nemur 235 milljónum evra, jafnvirði 34 milljarða króna. Eitt hundrað ný störf verða til í stöðinni og annar eins fjöldi afleiddra starfa. Stefnt er að því að taka stöðina í notkun á fyrsta ársfjórðungi 2027. -
Ný bók frá Gunnari J. Straumland
Út er komin hjá bókaútgáfunni Sæmundi ný bók eftir Húsvíkinginn Gunnar J. Straumland. -
Hvatningarverðlaun BSE vegna ársins 2024
Fátt er mikilvægara fyrir íslenskan landbúnað en hafa baráttufólk sem berst með oddi og egg fyrir framtíð og starfsskilyrðum greinarinnar.
