Brotamálum fækkar í umdæmi lögreglunnar á Akureyri
Kynferðisbrotum og fíknaefnamálum fjölgaði á milli ára en umferðarlagabrotum fækkaði mikið.
Hegningarlagabrotum, sérrefsilagabrotum og umferðarlagabrotum í málaskrá umdæmis lögreglunnar á Akureyri, heldur áfram að fækka á millli ára, samkvæmt bráðabirgðatölum fyrir síðasta ár. Alls voru skráð 1.807 mál í þessum brotaflokkum í fyrra en fjöldi slíkra mála var 1.882 árið 2010. Brotum hefur fækkað árlega frá árinu 2007, þegar fjöldinn var rúmlega 4.250 mál. Daníel Guðjónsson yfirlögregluþjónn segir að fækkun brota skýrist að mestu leyti af mikilli fækkun umferðarlagabrota frá árinu 2007. Hann segir megin ástæðurnar vera minnkandi umferð, hægari akstur vegna hárra sekta og umtalsvert minna eftirlit lögreglu á vegum, vegna minni fjárheimilda. Þannig hefur akstur lögreglubíla minkað um þriðjung síðustu ár og færri lögreglumenn eru að jafnaði á vakt þannig að minni tími er til umferðareftirlits, segir Daníel.
Auðgunarbrotum fækkaði á milli áranna 2011 og 2010, voru 263 í fyrra en 292 árið áður. Kynferðisbrotum fjölgaði hins vegar og hafa ekki verið fleiri frá árinu 2007. Í fyrra voru kynferðisbrotin 24 en 19 árið 2010. Líkamsárásarmálum fækkaði á milli ára, sem og mál tengd innbrotum og þjófnaði.
Hins vegar fjölgaði fíkniefnamálum nokkuð á milli ára, fíkniefnabrotin voru 137 í fyrra en 115 árið áður. Árið 2007 voru fíkniefnabrotin 78, 118 árið 2008 og 120 árið 2009. Töluvert hefur verið um að ökumenn hafi verið teknir fyrir akstur undir áhrifum fíkniefna og fjölgaði slíkum brotum nokkuð á milli ára. Árið 2011 voru slík brot 91 en árið áður 68. Árið 2007 voru slík mál aðeins 26.
Daníel segir að reynt hafi verið að verja þann þátt sem snýr að fíkniefnamálum eins og kostur er fyrir niðurskurði og að reynt hafi verið að leggja áherslu á þann málaflokk. Fíkniefnaneysla virðist síst fara minkandi og mikil aukning hefur orðið á akstri undir áhrifum ávana og fíkniefna og er það hluti af skýringunni. Akstur undir áhrifum áfengis hefur á móti lækkað mikið, segir Daníel.
Mun fleiri ökumenn voru teknir fyrir að kitla pinnan ógætilega á síðasta ári en árið áður. Í fyrra voru brot á ökuhraða alls 381 en 328 árið 2010. Slíkum málum hefur þó fækkað umtalsvert frá árinu 2007, þegar þau voru 1494. Árið 2008 voru brot á ökuhraða 956 og árið 2009 alls 760. Heldur færri voru teknir fyrir ölvun við akstur í fyrra en árið 2010 eða 55 í fyrra á móti 60 árið áður. Þá voru skráð 262 umferðaróhöpp í umdæmi lögreglunnar á Akureyri á síðasta ári á móti 319 árið 2010. Eitt mannslát varð í umferðinni í fyrra, þegar ekið var á mann á Eyjafjarðarbraut vestari í byrjun árs. Líkamstjón vegna slysa voru 173 og vinnuslys, þar sem meiðsli urðu voru 17 í fyrra. Þá eru skráðir 29 brunar, 4 sjóslys og tvö flugslys á síðasta ári.
Nýjast
-
Þá er vorið loksins komið
Já vorið er sú árstíð sem ég elska mest. Sennilega er það líka ljótasta árstíðin. Allt skítugt, grasið gulbrúnt, tré og runnar berir. En svo breytist allt á augabragði. Og daginn sem sólgulur fífill brosir við mér, feit hunangsfluga flýgur framhjá, eða kónguló spásserar yfir borðið sem ég sit við, þá hellist þessi barnslega gleði og tilhlökkun vegna sumars sem er í vændum yfir mig. En besta vormerkið er án efa að það birtir. -
Íshokkí í aldarfjórðung 25 ár frá stofnun kvennaliðs SA í íshokkí
„Þetta er ein hraðasta íþrótt í heimi. Ég hef lýst henni á þann veg að leikmaður er í 100 metra hlaupi á fullum hraða, gefi allt í sprettinn, með 10-15 kg aukalega á sér ásamt því að tveir menn hangi á honum. Það þarf að huga að kylfu og hvar pökkurinn er auk þess sem farið er um á örmjóu blaði. Íshokkí reynir mjög mikið á leikmenn, þeir þurfa að vera í góðu formi, sterkir og hafa gott jafnvægi,“ segir Jónína Margrét Guðbjartsdóttir. Hún var ein af þeim konum sem tók þátt í að stofna kvennalið Skautafélags Akureyrar fyrir 25 árum og er enn að, spilar með og þjálfar að auki U16 kvenna hjá félaginu -
Einstök upplifun í Grobbholti
-Sauðfjárbúið á Húsavík sem dregur að sér hundruði gesta á hverju vori -
Gamla verslunin í Vaglaskógi jöfnuð við jörðu
„Það eiga margir góðar minningar um þessa verslun,“ segir Helen Jónsdóttir en gamla góða búðin í Vaglaskógi var jöfnuð við jörðu nýverið. Allt var tekið nema hellan fékk að vera og væntir Helen þess að eitthvað verði gert á staðnum. „Vonandi verður settur upp fallegur áningarstaður þarna, með borðum og bekkjum og jafnvel skilti sem greinir frá sögu verslunarinnar.“ -
Hamrastígur og Kirkjugarðsstígur Finnur ehf bauð lægst í stígagerðina
Gengið verður til samninga við lægstbjóðenda, Finn ehf í gerð tveggja stíga á Akureyri, Hamrastígs og Kirkjugarðsstígs, en fyrirtækið átti lægsta boð í bæði verkin. -
Alþjóðaflugvöllur á Akureyri verði byggður upp
Sveitarfélögin á Norðurlandi vestra og Norðurlandi eystra skora á ríkisstjórn Íslands og Alþingi að koma rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi, sem hefur það að markmiði að alþjóðaflugvöllurinn sé byggður upp og kynntur sem ein af gáttum Íslands -
Grafalvarleg staða í rekstri PCC Bakka rædd í atvinnuveganefnd Alþingis.
Atvinnuveganefnd Alþingis hefur verið upplýst um grafalvarlega stöðu í rekstri PCC Bakka við Húsavík, þar sem stefnt gæti í rekstrarstöðvun undir lok sumars ef ekki tekst að snúa vörn í sókn. -
Listasafnið á Akureyri Nýjar sýningar opnaðar
Sýningar Heimis Hlöðverssonar, Samlífi, og Þóru Sigurðardóttur,Tími – Rými – Efni, verða opnaðar í Listasafninu á Akureyri á laugardag 17. maí kl. 15. Á opnunardegi verður leiðsögn með Heimi kl. 15.45. -
Orkey fyrst á Íslandi með sjálfbærni- vottaða framleiðslu á lífeldsneyti
Orkey hefur fengið alþjóðlega kolefnis- og sjálfbærnivottun, ISCC EU, á lífdísilframleiðslu sína á Akureyri fyrst fyrirtækja sem framleiða lífeldsneyti hérlendis.