Ágóði af minningar- tónleikum Í minningu Sissu afhentur í dag
Nafnarnir Pétur Broddason t.h. og Guðjónsson, afhentu Jóhannesi Kr. Kristjánssyni ágóðann í dag. Á veggnum er mynd af Sissu.
Meðferðarheimilið á Laugalandi í Eyjafjarðarsveit hélt í haust tónleika til þess að styrkja minningarsjóð Sigrúnar Mjallar Jóhannesdóttir. Sigrún Mjöll eða Sissa eins og hún var oftast kölluð var í meðferð á Laugalandi og átti góða tíma þar. Hún lést í júní 2010 vegna fíkniefnaneyslu, aðeins 17 ára gömul. Við andlát Sissu stofnaði faðir hennar, Jóhannes Kr. Kristjánsson, minningarsjóð. Hlutverk sjóðsins er að styrkja skapandi verkefni ungmenna sem lent hafa út af sporinu og eru á meðferðarheimilum landsins.
Þann 30.september sl. stóð Meðferðarheimilið á Laugalandi fyrir tónleikunum Í minningu Sissu í Hofi á Akureyri. Fjölmargir listamenn komu fram sem gerðu tónleikana að bestu skemmtun. Það voru: Hvanndalsbræður, Karlakór Akureyrar-Geysir, Rúnar Eff, Júlí Heiðar, Bjartur Elí, Friðrik Dór, Kór Glerárkirkju, Óskar Pétursson, Eyþór Ingi Jónsson, Friðrik Ómar, Ágústa Eva og Páll Óskar. Allur ágóði tónleikana skyldi renna í minningarjóð Sigrúnar Mjallar. Góð mæting var á tónleikana og söfnuðust 820 þúsund af miðasölu og styrkjum. Margir aðila sýndu málefninu stuðning á einn eða annann hátt. Það voru m.a. samfélags-og mannréttindarnefnd Akureyrarbæjar, Strikið og N4 sem veittu stuðning en sérstaklega ber þó að nefna stuðning frá Braga Guðbrandssyni og hans fólki hjá Barnaverndarstofu, sem studdi vel við verkefnið.
Styrkurinn var afhentur að Laugalandi í dag og tók Jóhannes Kr. Kristjánsson, faðir Sissu, við styrknum, úr hendi þeirra Péturs Broddasonar forstöðumanns og Péturs Guðjónssonar starfsmanns þar. Jóhannes var að vonum ánægður með þetta framtak en þetta mun vera í fyrsta skipti sem meðferðarheimili hér á landi ræðst að svona verkefni. Fram kom í dag að unnið væri að því að endurtaka leikinn í Reykjavík, þ.e. að halda aðra styrktartónleika. Á Laugalandi eru að jafnaði 6 stúlkur í einu og dvelja þar að meðaltali í 8-10 mánuði. Það mátti heyra á þeim stúlkum sem þar dvelja nú, að þær eru ánægðar með dvölina og nefndu sérstaklega traust og kærleika starfsfólks í því sambandi. Einnig kom fram að það vantaði eftirmeðferð fyrir þær stúlkur sem dvalið hafa á Laugalandi. Pétur forstöðumaður hefur m.a. gengið með þá hugmynd í maganum að sett verði á fót starfsemi á Akureyri, þar sem stúlkur sem útskrifast frá Laugalandi, gætu dvalið í framhaldinu og m.a. farið í nám í VMA. Mikilvægt væri að halda stúlkum og drengjum frá óæskilegum félagsskap, að lokinni meðferð.
Nýjast
-
Þá er vorið loksins komið
Já vorið er sú árstíð sem ég elska mest. Sennilega er það líka ljótasta árstíðin. Allt skítugt, grasið gulbrúnt, tré og runnar berir. En svo breytist allt á augabragði. Og daginn sem sólgulur fífill brosir við mér, feit hunangsfluga flýgur framhjá, eða kónguló spásserar yfir borðið sem ég sit við, þá hellist þessi barnslega gleði og tilhlökkun vegna sumars sem er í vændum yfir mig. En besta vormerkið er án efa að það birtir. -
Íshokkí í aldarfjórðung 25 ár frá stofnun kvennaliðs SA í íshokkí
„Þetta er ein hraðasta íþrótt í heimi. Ég hef lýst henni á þann veg að leikmaður er í 100 metra hlaupi á fullum hraða, gefi allt í sprettinn, með 10-15 kg aukalega á sér ásamt því að tveir menn hangi á honum. Það þarf að huga að kylfu og hvar pökkurinn er auk þess sem farið er um á örmjóu blaði. Íshokkí reynir mjög mikið á leikmenn, þeir þurfa að vera í góðu formi, sterkir og hafa gott jafnvægi,“ segir Jónína Margrét Guðbjartsdóttir. Hún var ein af þeim konum sem tók þátt í að stofna kvennalið Skautafélags Akureyrar fyrir 25 árum og er enn að, spilar með og þjálfar að auki U16 kvenna hjá félaginu -
Einstök upplifun í Grobbholti
-Sauðfjárbúið á Húsavík sem dregur að sér hundruði gesta á hverju vori -
Gamla verslunin í Vaglaskógi jöfnuð við jörðu
„Það eiga margir góðar minningar um þessa verslun,“ segir Helen Jónsdóttir en gamla góða búðin í Vaglaskógi var jöfnuð við jörðu nýverið. Allt var tekið nema hellan fékk að vera og væntir Helen þess að eitthvað verði gert á staðnum. „Vonandi verður settur upp fallegur áningarstaður þarna, með borðum og bekkjum og jafnvel skilti sem greinir frá sögu verslunarinnar.“ -
Hamrastígur og Kirkjugarðsstígur Finnur ehf bauð lægst í stígagerðina
Gengið verður til samninga við lægstbjóðenda, Finn ehf í gerð tveggja stíga á Akureyri, Hamrastígs og Kirkjugarðsstígs, en fyrirtækið átti lægsta boð í bæði verkin. -
Alþjóðaflugvöllur á Akureyri verði byggður upp
Sveitarfélögin á Norðurlandi vestra og Norðurlandi eystra skora á ríkisstjórn Íslands og Alþingi að koma rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi, sem hefur það að markmiði að alþjóðaflugvöllurinn sé byggður upp og kynntur sem ein af gáttum Íslands -
Grafalvarleg staða í rekstri PCC Bakka rædd í atvinnuveganefnd Alþingis.
Atvinnuveganefnd Alþingis hefur verið upplýst um grafalvarlega stöðu í rekstri PCC Bakka við Húsavík, þar sem stefnt gæti í rekstrarstöðvun undir lok sumars ef ekki tekst að snúa vörn í sókn. -
Listasafnið á Akureyri Nýjar sýningar opnaðar
Sýningar Heimis Hlöðverssonar, Samlífi, og Þóru Sigurðardóttur,Tími – Rými – Efni, verða opnaðar í Listasafninu á Akureyri á laugardag 17. maí kl. 15. Á opnunardegi verður leiðsögn með Heimi kl. 15.45. -
Orkey fyrst á Íslandi með sjálfbærni- vottaða framleiðslu á lífeldsneyti
Orkey hefur fengið alþjóðlega kolefnis- og sjálfbærnivottun, ISCC EU, á lífdísilframleiðslu sína á Akureyri fyrst fyrirtækja sem framleiða lífeldsneyti hérlendis.