Á miðaldra, hreyfióða vagninum og er að fíla það
Eitt kvöldið vafraði ég um miðlana eins og oft áður, þeir voru uppfullir af fréttum um nýjan VIP næturkúbb í Reykjavík, partý í skútum og kynmök á búbbluhóteli og ég varð skyndilega ótrúlega þakklát fyrir að vera bara á miðaldra vagninum þar sem allir keppast um að vera úti að leika í náttúrunni. Þakklát fyrir að í mínu ungdæmi voru ekki til neinir áhrifavaldar eða nettröll, engir samfélagsmiðlar og aðalumhugsunarefnið var hvort það yrði sveitaball í Víkurröst eða Ýdölum um komandi helgi.
Þegar kom að klæðnaði voru hlutirnir einfaldir: Svartur Metallicu bolur, Levis gallabuxur, hermannaklossar og notaður leddari úr Spútnik. Fyrirmyndirnar bjuggu út í heimi og sáust helst í tónlistarmyndböndum ef þú varst svo heppin að vera fyrir framan sjónvarpið þegar þau voru sýnd eða á myndum í Bravó.
Nú eru fyrirmyndirnar mun sýnilegri og selja okkur hugmyndir um það hvernig við eigum að líta út og hvers við eigum að neyta allan liðlangan daginn. Áhugaverður heimur fyrir mig sem kennara í markaðsfræðum en þar sem ég vinn með ungu fólki alla daga þá hræðist ég þennan heim líka og þau áhrif sem hann hefur á þau.
En aftur að miðaldra, hreyfióða vagninum sem nú sýnist svo einfaldur og þægilegur. Þegar við hjónin vöknum þessa dagana þá hefst rekistefna um hreyfingu dagsins: fjallahjól, götuhjól, fjallganga, brautarskíði eða utanbrautarskíði. Ég geri grín að manninum mínum og kalla hann Garðbæinginn þegar hann er kominn í götuhjólaspandexið. Hvert fóru rokkararnir?
Ég hef alltaf átt erfitt með að sætta mig við að vera eins og allir hinir og hoppa ekki svo glatt á það vinsælasta í hvert skiptið. Ég fór ekki upp að gosinu fyrr en í lok maí því ég ætlaði ekki að vera eins og allir hinir, ég ætlaði aldrei á Facebook, var lengi með gerviaðgang í nafni hundsins okkar, og vissar húsbúnaðarvörur munu ekki fá að koma inn á mitt heimili.
Aldrei aftur mun ég reyna að koma því að að ég hafi stundað gönguskíði og fjallgöngur síðan elstu menn muna og sé sko ekkert að elta æðið. Kannski er bara fínt að vera pínu hallærislegur og elta æðið sem grípur okkur miðaldra fólk og jú ég keyri um á Mitsubishi Outlander. Ég ætla meira að segja að ganga svo langt að auglýsa eftir hópi af fólki sem langar að hjóla saman á órafmögnuðum fjallahjólum um fjöll og firnindi (samt aðallega dali). Tek það samt skýrt fram að ég ætla ekki að fá mér rafmagnshjól á næstunni en þarf líklega að éta það ofan í mig eins og svo margt annað.
Skora á vin minn Axel Grettisson, oddvita Hörgársveitar til margra ára, til að taka við pennanum.
Sunna Hlín Jóhannesdóttir
Nýjast
-
Mikil aukning á hótunum og beitingu á ofbeldi gagnvart lögreglu á Norðurlandi eystra.
,,Það er ljóst að það að hér er um grafalvarlega stöðu að ræða. Svar dómsmálaráðherra við fyrirspurninni sýnir okkur að þróunin á starfssvæði lögreglustjórans á Norðurlandi eystra er með þeim hætti að það er nauðsynlegt að bregðast við. Það er mikilvægt að greina þessa stöðu. Hver er ástæðan fyrir þessari miklu fjölgun á brotum gegn lögreglumönnum og opinberum starfsmönnum á þessu landsvæði það er Norðurlandi eystra“ segir Njáll Trausti Friðbertsson þingmaður og oddviti Sjálfstæðisflokksins í Norðausturkjördæmi. -
Boðskapur frá forsetaframbjóðanda
Það hafa kannski margir klórað sér í hausnum yfir þátttöku minni í forsetakosningunum þar sem ég stíg nú eins og landkönnuður á nýjum slóðum og tek með mér ný og fersk sjónarhorn, smá húmor og djúpstæða trú á mátt hins ómögulega. Ég er eflaust ekki hinn hefðbundni frambjóðandi en ég er án efa ferskur blær inn í flokk frambjóðenda og það er einmitt það sem gerir þetta stóra verkefni svo skemmtilegt og hvetjandi. -
Líf að færast í Holtahverfi
Líf er að færast í nýtt Holtahverfi norður, svæði á milli Krossanesbrautar og smábátahafnar í Sandgerðisbót. Húsin rísa hvert á fætur öðru og fyrstu íbúarnir hafa komið sér fyrir í nýjum íbúðum. Enn er eitthvað eftir af lóðum og er Akureyrarbær um þessar mundir að auglýsa par- og raðhúsalóðir lausar til úthlutunar, en m.a. eru nokkrar lóðir lausar við Álfaholt, Hulduholt og Þursaholt. -
Frú Ragnheiður - Færri í nálaskiptaþjónustu en fleiri komu í bílinn
Fjöldi einstaklinga sem leitaði til Frú Ragnheiðar árið 2023 var 51 í 584 heimsóknum en árið 2022 voru einstaklingarnir 46 í 412 heimsóknum. Af þessum fjölda voru 10 viðbragðsaðilar og einstaklingar sem leituðu til verkefnisins til að fá Nyxoid nefúðann. Ekki er því um fjölgun skjólstæðinga í nálaskiptaþjónustu að ræða en þeim fækkaði um fimm milli ára, úr 46 í 41. -
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á. -
Goblin opnar á Glerártorgi
„Eins leitt og okkur þykir að yfirgefa fallega miðbæinn okkar, erum við afar spennt fyrir þessum flutningum og hlökkum til að bjóða viðskiptavini okkar velkomna á Glerártorgi,“ segja þau Þorsteinn Marinósson og Ásta Hrönn sem eiga Goblin. Starfsemin hefur verið við Brekkugötu undanfarin ár en flyst nú í rýmra húsnæði á Glerártorgi. -
Lystigarðurinn - Kostar meira að pissa
Gjald fyrir afnot af salernisaðstöðu í Lystigarðinum á Akureyri hækkar 1. maí næstkomandi, út 150 krónum eins og áður var í 300 krónur. Gjaldið verður endurskoðað við gerð gjaldskrár Umhverfis- og mannvirkjaráðs Akureyrarbæjar árlega.
Athugasemdir