Úr vörn í sókn á nýju ári

Flest hin síðari ár hefur íslenska þjóðarskútan haft góðan byr í seglin - kannski svo góðan að sprunga var komin í siglutréð og seglin lúin og trosnuð. Því miður greip ótti um sig meðal skipshafnarinnar og fólkið í brúnni ákvað í óðagoti að rífa seglin, leita vars og vill nú helst sigla kútternum upp í fjöru. Þetta óðagot hefur leitt til þess að sú sókn til betra lífs og betri kjara sem áður einkenndi íslenskt lundarfar og íslenskt framtak, hefur snúist upp í hreina vörn og algjöra kyrrstöðu þegar menn ættu að sjálfsögðu að spýta í lófana og heyja kraftmikla varnarbaráttu með breiðri samstöðu allra landsmanna. Þess í stað er alið á vanmætti og sundrungu.

Það er með ólíkindum að verða vitni að hverri atlögunni  á fætur annarri sem íslensk stjórnvöld hafa gert á síðustu 2-3 árum að flestum grunnstoðum góðra bústetuskilyrða á landsbyggðinni. Sífelld óvissa um lagaumhverfi sjávarútvegsins og gríðarleg skattheimtan bitnar hvað harðast á fólki og fyrirtækjum á Norður- og Austurlandi. Það sama hefur gríðarleg andstaða við orkunýtingu og stóriðnað í Þingeyjarsýslum í för með sér og flestum er ljóst hvað leiða mun af aukinni skattheimtu  ferðaþjónustuna.

Því er svo við að bæta að skattahækkanir ,,hinnar norrænu velferðarstjórnar“ hafa á síðustu 3 árum bætt 28 þúsund milljónum við verðtryggðar skuldir heimilanna og ekkert lát er á stjórnarliðum í því efni að styrkja áfram ,,gjaldborgina“ um heimili landsins. Síðasta útspilið í þá átt birtist svo í fjárlögum næsta árs þar sem þingmenn samfylkingar, vinstri grænna með stuðningi utanflokka þingmanna hækka áfram skatta og gjöld sem velta út í vísitöluna. Þær ákvaðanir einar munu hækka skuldir heimilanna um 4 þúsund milljónir króna!

Það er algert grundavallar atriði fyrir góðum búsetuskilyrðum víðast hvar um landið að stjórnvöld vinni með grunnatvinnuvegum landsmanna, sjávarútvegi, fiskvinnslu og tengdum greinum, landbúnaði, ferðaþjónustu og iðnaði. Íbúar Norðausturkjördæmis eiga afkomu sína mun meir en íbúar annarra kjördæma undir því að vel ári í þessum atvinnugreinum. Hér eru mörg öflug og framsækin fyrirtæki sem byggja á langri hefð og sterkum grunni, og leggja með starfsemi sinni mikið til þeirrar þjónustu sem ríki og sveitarfélög halda úti.

Starfsfólk og stjórnendur þessara fyrirtækja hafa með dugnaði sínum og eljusemi í áranna rás lagt grunn að góðum búsetuskilyrðum í kjördæminu til hagsbóta fyrir landsmenn alla.

Það ber að nýta hvert það tækifæri sem gefst til sóknar fyrir íbúa kjördæmisins. Samstaða í þá veru hefur skilað og mun áfram skila landsmönnum öllum ríkulegum ávöxtum.

Vonandi verður nýja árið Íslendingum hagfelldara en það sem nú er senn að baki. Við eigum allt undir því að hagur heimila og fyrirtækja verði sem bestur og því betur sem þar árar þeim mun betur siglir þjóðarskútan. Grundvallaratriði til að svo megi verða sem víðast liggja í atvinnu-, samgöngu- og mennta- og heilbrigðismálum.

Á nýju ári gefst okkur jafnframt tækifæri til að skipta um fólkið í brúnni. Nýtum það tækifæri og kjósum til góðra verka þá sem standa vörð um hagsmuni kjördæmisins og þjóðarbúsins alls. Látum ekki úrtöluraddir kæfa niður allt framtak og hneppa stórhuga fólk í hlekki hafta og doða. Horfum björtum augum fram á veg og vinnum saman að því að veita brýnustu hagsmunamálum kjördæmisins brautargengi.

Ég óska lesendum Vikudags gleðilegra jóla, árs og friðar.

Kristján Þór Júlíusson.

Höfundur er þingmaður Sjálfstæðisflokksins í Norðausturkjördæmi.