Tækifæri á nýju ári

Kristján Þór Júlíusson

Mikilvæg mál voru á dagskrá Alþingis síðustu vikurnar fyrir jól. Þar má nefna, stjórnarskrána, rammaáætlun og fjárlög ársins 2013.

Mikil umræða varð um þessi stærstu verkefni vetrarins á Alþingi. Til þess ber að líta að þetta eru mikil grundvallarmál og það væri langt seilst að segja að þessi mál væru þannig úr garði gerð að þau þyldu ekki talsverða gagnrýni.

Rammaáætlun og stjórnarskrá
Við gerð áætlunar um nýtingu orkulinda Íslands halda stjórnarflokkarnir því til streitu að ganga fram hjá faglegu mati og margra ára vinnu og varpa þannig fyrir róða mjög vænlegum virkjunarkostum.  Í umsögn Orkustofnunar um þingmálið segir að vikið sé frá faglegri niðurstöðu verkefnisstjórnar um rammaáætlun varðandi nokkra virkjanakosti, þ.á m. þrjár vatnsaflsvirkjanir í Þjórsá á Suðurlandi; Hvammsvirkjun, Holtavirkjun og Urriðafossvirkjun.  „Tillagan gerir þannig ráð fyrir að hagkvæmustu og best rannsökuðu virkjanakostirnir séu fluttir úr orkunýtingarflokki í biðflokk.“  Þetta er meðal þess sem þingflokkur Sjálfstæðisflokksins gagnrýndi við umræðu málsins.

Sjónarmið sjálfstæðismanna í stjórnarskrármálinu byggja á því að vilja vanda til verka, að markmið breytinga séu skýr og þau atriði sem breyta á vel afmörkuð. Við höfum að auki viljað leggja til grundvallar vinnu og þekkingu okkar færustu sérfræðinga á þessu sviði. Þessar áherslur okkar hafa því miður ekki verið vel séðar hjá forsætisráðherra og helstu meðreiðarsveinum hans.

Ríkisfjármálin í ólestri

Á fjárlögum næsta árs eru svo margir gallar, bæði á tekju- og gjaldahlið, að það væri að æra óstöðugan að ætla að telja þá alla upp.  Þar er m.a. að finna hluta skýringa þess uppnáms sem því miður er í samskiptum ríkisstjórnar og aðila vinnumarkaðarins.  Traust og heilbrigð samskipti stjórnvalda, atvinnurekenda og launþegahreyfingarinnar eru þó ein helsta forsenda nýs vaxtarskeiðs og stöðugleika. 

Undir lok kjörtímabilsins blasir eftirfarandi við:

1. Ríkisstjórnin hefur hækkað skatta um 90 milljarða.
2. Fjárlög      ársins 2013 munu hækka lán heimilanna um 4-5 milljarða. Skattahækkanir      ríkisstjórnarinnar hafa þá hækkað lán heimilanna um 30 milljarða á      kjörtímabilinu, eða yfir hátt í 250.000 kr. að meðaltali á hvert      heimili. 
3. Aðhaldsaðgerðir      eru mun minni en samið var um í stöðugleikasáttmála aðila vinnumarkaðarins      og leiða m.a. af sér að lítið sem ekkert er framkvæmt. Opinber fjárfesting er nú hin minnsta í 70 ár. Raunverulegur sparnaður er af skornum skammti.
4. Skuldir ríkissjóðs hafa aukist ár frá ári, vaxtagjöld ríkisins eru komin í 90 milljarða á ári.
5. Stefnt að sölu á eignum ríkisins til að standa undir útgjöldum í stað þess að nýta andvirðið til að greiða niður skuldir. 

Tækifæri á nýju ári
Það verður að gera betur - svo miklu betur – og það er vel hægt. Tækifærin eru fyrir hendi.  Með hvetjandi umhverfi og raunverulegum stuðningi stjórnvalda er hægt að snúa vörn í sókn.  Lægri skattar, skynsamleg nýting auðlindanna, ábyrg ríkisfjármál og aukið frelsi til athafna. Stjórnvöldum ber að leiða þjóðina saman á framfarabraut  - til sóknar fyrir bættum lífskjörum

Ég þakka fyrir ánægjuleg samskipti á árinu og óska lesendum Vikudags farsældar og allra heilla á nýju ári. 

Kristján Þór Júlíusson

Alþingismaður

Ásvegi 23

Akureyri