Rafhjólafólk skapar útvistarperlur á Húsavík

Hvað er betra en hjólatúr í sólarlaginu. Myndir/Aðsendar.

Hjólafélagið 640MTB á Húsavík hefur staðið fyrir ótrúlegri uppbyggingu á útivistarsvæðum í landi Húsavíkur undanfarin ár með gerð hjóla og í einhverjum tilfellum göngustígum. Meðlimir félagsins hafa unnið hörðum höndum í sjálfboðavinnu svo eftir sé tekið og notið stuðnings, sveitarfélagsins og fyrirtækja í bænum.

Hvergi nærri hættir

Nýverið samþykkti skipulags og framkvæmdaráð Norðurþings beiðni frá félaginu um leyfi til að gera nýjan stíg í landi Húsavíkur. Stígurinn liggur frá bílastæði við Botnsvatn, inn við skógrækt og yfir á Þeistareykjaveg á móts við annan stíg sem liggur niður að Katlavelli, alls um 1000 metra leið.

Hugmyndin að stígagerðinni að þessu sinni er að sögn Aðalgeirs Sævars Óskarssonar úr stjórn 640 MTB; að nýta og samtengja núverandi slóða sem fyrir eru í landi Húsavíkur. „Með þessari viðbót verður hægt að komast á slóða frá Botnsvatni, niður í bæ í gegnum Sprænugil eða golfvöll og öfugt,“ útskýrir Aðalgeir og bætir við að slóðinn yrði í fyrstu bara sleginn og snyrtur og gerður göngu og hjólafær.

„Hann verður öllum opinn, og yrði opinn öllum til göngu, hlaupa eða hjólreiða sem vilja nýta sér hann til útivistar, sem sagt ekki ætlaður eingöngu til hjólreiða,“ útskýrir hann.

Nýta áratugagamla slóða

Hjólaklúbburinn hefur eins og fyrr segir staðið fyrir umfangsmikilli stígagerð um árabil, m.a. frá Reykjaheiði niður að Botnsvatni og á gamla skíðasvæðinu í stöllunum. Hjóla og gönguleiðirnar hafa verið nýttar mjög vel, bæði af heimafólki og gestum sem sækja Húsavík heim.

„Það er það sem við erum í og með að reyna gera með þessari vinnu okkar, að auka almenna útivistarfjölbreytni og ekki síður að nýta gamla stíga í bæjarlandinu. Það eru gamlir stígar úti um allt sem er hægt að tengja við þessar leiðir með mislöngum köflum til þess að búa til einhverja samfellu. Það er hægt að búa til ótrúlega flotta flóru af útivistarstígum á svæðinu með tiltölulega lítilli vinnu með því að nota það sem er til nú þegar og hefur verið til staðar í áratugi,“ segir Aðalgeir og bætir við að hjólreiðar á rafmagnshjólum séu sífellt að verða vinsælli.

Sífellt fleiri leita í þessa útivistarparadís

„Það er gríðarlegur fjöldi fólks sem er að nýta sér þessi svæði. Ég til dæmis veit ekki hversu mörg hjól er búið að selja bara hér á Húsavíkursvæðinu undanfarin ár, það er eflaust eitthvað á annað hundrað. Það er ótrúlegur fjöldi fólks sem er að nýta sér þessa slóða,“ segir Aðalgeir og bendir á að það sé ekki bara hjólafólk sem nýtir stígana.

„Utanvegahlaupin eru líka að verða mjög vinæl. Þar af leiðandi er fólk farið að vilja hlaupa á stígum úti um allar trissur og þetta sport parast ótrúlega vel við okkar hugsjón í hjólaklúbbnum. Rafmagnsreiðhjól og utanvegahlaup geta alveg farið fram á sömu stígum,“ útskýrir Aðalgeir.

Ekki síður vinsælt meðal ferðamanna

Húsavík dregur að sér fjölda innlendra og erlendra ferðamanna á hverju sumri og það hefur færst mjög í aukana að sjá ferðafólk taka hjólin með sér í ferðalagið. Aðalgeir segir að hann hafi séð mikla aukningu á því að ferðafólk sé að nýta þessar útivistarperlur sem félagið hans hefur verið að byggja upp á umliðnum árum

„Þetta er að verða afar vinsælt hjá ferðafólki og alltaf að verða vinsælla á okkar svæði til útivistar eftir því sem það spyrst út hvað svæðið býður uppá,“ segir Aðalgeir en í stígagerðinni felst ekki bara að troða niður slóða heldur er vandað mjög til verka við allar merkingar.

Merkingar til fyrirmyndar

„Það hefur verið okkar hugmynd alla tíð að gera þetta aðgengilegt og vel merkt. Þannig að alls staðar þar við gerum slóða, er merkt hvað sé ætlað til almennrar útivistar og hverjir hafa styrkt okkur við vinnuna, svo er leiðin merkt inn á kort og annað slíkt. Á hjólabrautunum eru númeraðar stikur á hundrað metra fresti. Það er gert til þess að hægt sé að gefa nákvæmar upplýsingar til viðbragðsaðila ef einhver lendir í slysi. Björgunarsveitin er með kort af brautinni og veit nákvæmlega hvert á að fara ef t.d. kemur útkall að stiku             númer 33,“ útskýrir Aðalgeir og bætir við að draumurinn sé að koma hjólaleiðunum á rafrænt form í náinni framtíð.

„Það eina sem vantar upp á hjá okkur núna er að annað hvort sveitarfélagið eða Húsavíkurstofa myndi taka þátt í því með okkur að útbúa rafrænt kort sem er aðgengilegt á netinu, sem ferðamenn gætu farið inn á og séð nákvæmlega hvar helstu útivistarsvæði Húsavíkur er að finna. Þetta er eitthvað sem önnur sveitarfélög hafa verið að gera og fólk sækir mikið í. Þetta vantar enn hjá okkur en ég vona að það breytist fljótlega í framtíðinni,“ segir Aðalgeir að lokum.