Lokaorðið-Dómari ertu blindur
Tryggvi Gunnarss., átti Lokaorðið i blaðinu s.l. fimmtudag
Útlit mitt í dag ber því kannski ekki vitni að ég hafi fyrir nokkrum áratugum verið svo til ofvirkur á íþróttasviðinu. Brjóstvöðvarnir eru að síga niður að belti, antilópuhraðinn sem var mitt aðalsmerki er svo til horfinn. Ég var æði oft réttur maður á réttum stað, er það nú ekki alltaf lengur að mati fjölskyldumeðlima. Leikgleðin farin en ég get enn talað hratt og þar með er það upptalið sem áður prýddi minn stælta íþróttalíkama.
Ég var svo ofvirkur í öllu sem tengdist íþróttum hér á árum áður að ég tók dómarapróf með sæmd bæði í handbolta og fótbolta. Blessunarlega reyndi aldrei á þessa hæfileika mína, hvorki í hand- né fótbolta, íþróttunum báðum til heilla. Nú í dag sit ég oft uppi í stúku og horfi á fótboltaleiki og skemmti mér misvel eðli málsins samkvæmt. Sumir leikir eru skemmtilegir og aðrir hundleiðinlegir. Þessir leikir eiga a.m.k. eitt sameiginlegt, leikmenn gera mistök og dómarar gera mistök.
Þetta er það sem gerir þessa íþrótt svo fallega.
En fúkyrðunum er misskipt, einhvern veginn finnst mér dómararnir fá þau flest yfir sig eftir að hafa gert mistök. Þegar það byrjar þá sperri ég eyrum og bíð eftir að heyra einhver misgáfuleg orð úr stúkunni sem koma mér til brosa út í annað. „Ertu blindur fíflið þitt?“, „þú ert að eyðileggja leikinn, mannfjandi“, og „taktu þér tak, þú ert að klúðra leiknum“, eru setningar sem ég hef margoft heyrt í stúkunni.
Dómarar geta gert afdrifarík mistök sem kosta annað liðið sigurinn. En leikmenn gera líka mistök. Undantekningarlaust þegar það gerist þá er klappað fyrir leikmanninum og hann hvattur áfram til dáða.
Meira að segja þó að hann hafi verið að brenna af dauðafæri.
Ég bíð því spenntur eftir að áhorfendur fari nú að láta uppáhaldsleikmanninn sinn hafa það óþvegið þegar hann brennir af dauðafæri og hreinlega lesi honum pistilinn með orðum eins og t.d.,
„Ertu blindur?“, „þú ert að eyðileggja leikinn, mannfjandi“, og „hvernig fórstu af því að brenna af þessu færi, fíflið þitt?“
Nýjast
-
Lokaorðið-Dómari ertu blindur
Útlit mitt í dag ber því kannski ekki vitni að ég hafi fyrir nokkrum áratugum verið svo til ofvirkur á íþróttasviðinu. Brjóstvöðvarnir eru að síga niður að belti, antilópuhraðinn sem var mitt aðalsmerki er svo til horfinn. Ég var æði oft réttur maður á réttum stað, er það nú ekki alltaf lengur að mati fjölskyldumeðlima. Leikgleðin farin en ég get enn talað hratt og þar með er það upptalið sem áður prýddi minn stælta íþróttalíkama. -
Sólarhringssund Óðins
Í sólarhringssundi Óðins syntu iðkendur félagsins samtals 122,5 km. Sundið hófst miðvikudaginn 22.apríl klukkan 15:00 og lauk fimmtudaginn 23.apríl kl 15:00. Sólarhringssundið er fastur liður í starfi félagsins og mikilvægur fjáröflunarviðburður þar sem iðkendur safna áheitum og styrkjum og rennur allur ágóðinn í sameiginlegan ferðasjóð. Ferðasjóðurinn er nýttur í æfingaferð erlendis sem eldri keppnishópar fara í annað hvert ár. Þá er stefnt að æfingarferð innanlands með alla keppnishópa á hverju ári. Ferðakostnaður á Vit-Hit leikana sem fara fram á Akranesi er einnig greiddur úr ferðasjóðnum en langflestir keppnishóparnir fara á það mót. -
Fræðaflakkarinn sem hlustar bara á tónlistarfólk sem byrjar á B
Vísindafólkið okkar – Sunna Símonardóttir Vísindafólkið okkar er mánaðarleg kynning á rannsakendum Háskólans á Akureyri. Sunna Símonardóttir, lektor í félagsfræði við Félagsvísindadeild, er vísindamanneskja aprílmánaðar. -
Kjarnafæði Norðlenska óskar eftir 2,5 ha lóð við Týsnes
Kjarnafæði Norðlenska ehf. hefur áhuga á því að byggja nýjar höfuðstöðvar, sláturhús og kjötvinnslu á Akureyri. Starfsemin við Eyjafjörð hefur verið á þremur stöðum, við Grímseyjargötu á Akureyri, Fjölnisgötu á Akureyri og á Svalbarðseyri. -
Eyjafjarðarsveit og Skógræktarfélag Eyfirðinga Samningur endurnýjaður
Sveitarstjórn Eyjafjarðarsveitar samþykkti á dögunum að endurnýja samning við Skógræktarfélag Eyfirðinga til næstu tveggja ára og gildir hann út árið 2027. -
Lífsgæði fyrir fólkið sem lagði grunninn
Eldri borgarar hafa lagt grunn að þeirri velferð sem við búum við í dag og eiga skilið að njóta þess. -
Mönnunarvandi sem kallar á aðgerðir
Góð heilbrigðisþjónusta er ein af grunnforsendum þess að fólk ákveði að búa, starfa og ala upp fjölskyldu á hverjum stað. Ef aðgengi að sérfræðingum og nauðsynlegri þjónustu utan höfuðborgarsvæðisins veikist, þá veikjast byggðirnar líka. -
Bjarg íbúðarfélag 16 íbúðir í Langamóa
Bjarg íbúðafélag er að byggja 16 leiguíbúðir við Langamóa 1 og 3 í Móahverfi á Akureyri. -
Að verða Akureyringur
„Er ekki gott að búa á Íslandi?“ spyr samstarfsmaður minn mig. Ég svara samstundis; „Jú, annars væri ég ekki hér!“ og skipa mér þar með í hóp fjölmargra einstaklinga af erlendum uppruna sem hafa fundið sér heimili á Akureyri.
