Fiskur frá smábátum dregur úr afköstum landvinnslunnar og bónusar starfsfólks lækka
Landvinnsla ÚA á Akureyri/ mynd Hörður Geirsson/samherji.is
Afköst í fiskvinnsluhúsum Samherja dragast verulega saman þegar keyptur er afli af strandveiðibátum til vinnslu. Starfsmaður sem hefur unnið í tæpa fimm áratugi hjá Útgerðarfélagi Akureyringa segir sláandi mun á gæðum hráefnis frá smábátum og togurum sem veiða á djúpslóð. Bónusar fiskvinnslufólks lækka þegar unninn er afli frá smábátum því mun tímafrekara er að verka fiskinn.
Frá því strandveiðitímabilið hófst í vor hefur hlutfall fisks frá smábátum hækkað verulega á mörkuðum. Fiskvinnsluhús Samherja á Dalvík og Akureyri vinna að jafnaði um 80 tonn af fiski á dag í hvoru húsi. Nærri lætur að um fimmtán prósent hráefnis til vinnslu séu keypt á mörkuðum til að tryggja vinnslu og afhendingu afurða allan ársins hring.
Minni afköst bitna á launum
Hrefna Þorbergsdóttir, sem hefur starfað í 48 ár hjá Útgerðarfélagi Akureyringa, segir hráefnið frá smábátum oft á tíðum fyrir neðan allar hellur.
„Það verður bara að segja hlutina eins og þeir eru. Hráefnið getur verið eins og svart og hvítt og handavinnan á flæðilínunum er miklu meiri þegar smábátafiskur er unninn. Auk þess er fiskurinn frá smábátum ekki nógu vel ísaður sem bitnar á geymsluþolinu. Lakari afköst koma eðlilega niður á laununum, því bónusinn hjá okkur starfsfólkinu lækkar. Það tapa flestir á þessu. Ríkið fær lægri skatta og sveitarfélög lægra útsvar, svo dæmi sé tekið,“ segir Hrefna.
Sláandi munur á gæðum
Hún segir að oft þurfi að skera í burtu stór stykki úr flökum vegna skemmda.
„Þunnildin eru oft ónýt og auðvitað erum við á vinnslulínunum pirraðar á ástandinu, en svona hefur þetta verið í gegnum tíðina þegar kaupa þarf fisk af smábátum til vinnslu. Það er ekki bara ég sem er pirruð vegna þessa, ég held að við séum það allar á vinnslulínunum. Handtökin vegna afla frá smábátum eru svo miklu fleiri miðað við fisk sem er veiddur af togara. Þar eru gæðin allt önnur og betri. Munurinn er sláandi,“ segir Hrefna.
Afurðir standist ítrustu gæðakröfur
Samherji leggur ríka áherslu á stöðugleika í afhendingu afurða til viðskiptavina. Þannig að gæði þeirra botnfiskafurða sem viðskiptavinurinn fær afhentar, hvort sem það er þorskur, ýsa eða ufsi, eru ávallt þau sömu. Engri afurð er pakkað sem ekki stenst ítrustu gæðakröfur. Þorskur frá smábátum kallar á miklu meiri tíma í snyrtingu og vinnslu sem leiðir til sóunar og lakari launa til starfsfólks.
Úr ellefu tonnum á klukkustund í sex tonn
Sunneva Ósk Guðmundsdóttir framleiðslustjóri ÚA segir vel fylgst með tölulegum upplýsingum á öllum stigum vinnslunnar.
„Þegar unninn er fiskur frá togurum eru afköstin gjarnan í kringum ellefu tonn á klukkustund en falla niður í sex tonn þegar smábátafiskur er unninn. Það segir sig sjálft að þessi mikli munur hefur margvísleg áhrif, meðal annars á launin, því bónusinn lækkar þegar afköstin dragast saman. Ég skil vel að starfsfólkið sé ekki sátt við stöðuna en þetta er óhjákvæmilegt því við erum háð því að kaupa hráefni á mörkuðum til að vinna afurðir allan ársins hring og um þessar mundir er hlutfall hráefnis frá smábátum miklu hærra á mörkuðum.“
Það er heimasíða Samherja sem fyrst segir frá
Nýjast
-
Kjarnafæði Norðlenska kaupa B Jensen
Kjarnafæði Norðlenska gekk frá kaupum á sláturhúsi, kjötvinnslu og verslun B. Jensen í seinustu viku. -
Framkvæmdir að hefjast við nýtt svæði á Torfunefsbryggju Samið um fyrstu bygginguna
Samningur milli HN og verktakafyrirtækisins Húsheildar/Hyrnu um byggingu fyrsta hússins á Torfunefssvæðinu hefur verið undirritaður og markar ákveðin skref í uppbyggingu svæðisins. -
Hinsegin hátíð á Norðurlandi eystra
Hinsegin hátíð á Norðurlandi eystra verður haldin í fyrsta skiptið dagana 18.–22. júní 2025. Öll sveitarfélög á Norðurlandi eystra standa að hátíðinni og stefnt er að því að viðburðir fari fram sem víðast í öllum landshlutanum. -
Magnaði Mendelssohn
Felix Mendelssohn (Bartholdy) er talinn hafa verð einn mesti tónsnillingur allra tíma. Undrabarn sem á sinni stuttu 38 ára æfi samdi eina fallegustu tónlist veraldar. Jafnvel önnur tónskáld kölluð hann "hinn nýja Bach" m.a. Liszt, Schumann og Berlioz. -
Glæsileg A-álma tekin í notkun í Glerárskóla
Ný og endurbætt A-álma hefur verið tekin í notkun í Glerárskóla. Gestum bauðst að líta á þær heilmiklu breytingar sem gerðar hafa verið á álmunni, en húsnæðið hefur verið endurnýjað á þann hátt að miklar breytingar hafa verið gerðar á vinnuumhverfi nemenda og starfsfólks. -
Fiskur frá smábátum dregur úr afköstum landvinnslunnar og bónusar starfsfólks lækka
Afköst í fiskvinnsluhúsum Samherja dragast verulega saman þegar keyptur er afli af strandveiðibátum til vinnslu. Starfsmaður sem hefur unnið í tæpa fimm áratugi hjá Útgerðarfélagi Akureyringa segir sláandi mun á gæðum hráefnis frá smábátum og togurum sem veiða á djúpslóð. Bónusar fiskvinnslufólks lækka þegar unninn er afli frá smábátum því mun tímafrekara er að verka fiskinn. -
Af slúbbertum og svörtum sauðum
Vísir birti nýlega frétt um nýútkomna skýrslu Viðskiptaráðs þar sem fjallað er um uppsagnarvernd opinberra starfsmanna. Sá sem fréttina ritar kýs að reyna að fá fleiri „smelli“ með því að leggja skýrsluhöfundi orð í munn eins og að kalla opinbera starfsmenn „slúbberta“. -
Félag eldri borgara á Akureyri sækir um lóðir við Þursaholt Hafnað því ekki er búið að ákveða hvernig á að úthluta lóðunum
Akureyrarbær hefur ekki tekið ákvörðun um hvernig lóðum við Þursaholt verður úthlutað. Umsókn Félags eldri borgara á Akureyri, EBAK sem sótti um lausar lóðir á svæðinu var því hafnað. -
Ofurþéttingarárátta samtímans
Skipulagsráð Akureyrarbæjar hefur lagt til að bæjarstjórn samþykki tillögu að breytingu á aðalskipulagi 2018-2030. Í greinargerð segir að gert sé ráð fyrir að uppbygging hefjist fyrst á svokölluðum Tjaldsvæðisreit auk þess sem unnið verði að undirbúningi uppbyggingar til blandaðrar landnotkunar á Akureyrarvelli.
