Einlægniæfingar leiðtoganna

Nýverið var Bjarni Benediktsson í viðtali í þættinum  „Forystusætið“ á RÚV. Eftir þáttinn er það umræðuefni hve einlægur hann hafi verið í svörum sínum. Vissulega má segja það, enda var hann tæpast spurður um stefnu flokks síns eins og þó hefur verið grunnstef þáttarins gagnvart leiðtogum framboðanna fyrir alþingiskosningarnar.

Jú, Bjarni var einlægur í svörum sínum. Sama gilti um Katrínu Jakobsdóttur þegar hún sat skömmu seinna fyrir svörum og ber flestum, sem hafa tjáð sig um frammistöðu hennar, saman um að hún hafi verið afar einlæg. Sumir telja það hennar helsta kost.

Einlægni þeirra er einmitt talin ein aðalástæða þess að fylgi flokka þeirra þokaðist upp ávið eftir viðtölin.

Þetta vekur upp spurningar hjá mér. Er það virkilega orðið svo að það veki alveg sérstaka athygli kjósenda, almennings í landinu, fjölmiðlafólks og allra sem fjalla um stjórnmál - að þeir sem atast á „vígvelli“ stjórnmálanna veki sérstaka athygli ef þeir sýna einlægni. Er ÞAÐ ekki sönnun þess, að við trúum leiðtogunum sjaldnast af því að við göngum út frá því að orð þeirra séu yfirleitt ekki sett fram í einlægni.

Þykir fólki ekkert athugavert við það að sá sem vill verða leiðtogi þjóðarinnar sé ekki trúverðugri en svo að það veki sérstaka athygli að hann sýnir einlægni, segi satt frá og eins og honum býr í brjósti? Viljum við hafa slíkan leiðtoga í framvarðarsveit íslenskra stjórnmála?

Leiðtogar gömlu flokkanna  eru hannaðir, mótaðir og smíðaðir af þar til gerðum meisturum sem leggja línurnar og ákveða hvað segja skal og hvað ALLS EKKI MÁ segja.

Þetta hlýtur að segja okkur að leiðtoginn býr ekkert endilega yfir leiðtogahæfileikum. Hann þarf að taka við ákveðinni „mötun“ og honum eru bókstaflega lögð orð í munn, er með æfðar rullur, sumar svo marg tuggnar að við vitum fyrirfram hvað hann mun segja og á hvaða hátt hann svarar spurningum.

Eru þetta þau stjórmál sem við viljum halda í heiðri? Viljum við ekki kjósa fólk sem hefur til að bera, þekkingu og er víða vel heima? Veit hverju er best að svara, hvenær sem er og hvar sem er - allsendis óundirbúið?

Dögun hefur á að skipa þannig fólki og svona þarf ekki hugsa eða láta. Við göngum hreint til verks. Segjum hlutina eins og þeir eru og segjum hvað við viljum gera til að breyta og bæta. Við ætlum okkur að lagfæra það sem ekki hefur ennþá verið lagfært: Skuldir heimilanna og afnema verðtrygginguna.

Dögun býður upp á hnitmiðaða kjarnastefnu, þar sem áhersla er lög á þrennt; alvöru aðgerðir í þágu heimilanna, uppstokkun í auðlindamálum og lýðræðisumbætur með nýrri stjórnarskrá. Þess utan hefur verið unnin ítarlega stefna í öllum helstu málaflokkum. Kjósendur mega ganga út frá því sem gefnu, að þessi stefnumótun Dögunar er bæði í senn, úthugsuð og einlæg – Í Dögun er fólk sem vill gagngerar umbætur hins nýja Íslands en ekki afturhald hins einlæga varðhunds sérhagsmunanna!

Hólmfríður Sólveig Haraldsdóttir skrifar.

Höfundur skipar 4. sætið á lista Dögunar í NA-kjördæmi.