Um 36.000 manns komu í Íþróttahöllina á tveimur mánuðum
Aðalsteinn Sigurgeirsson forstöðumaður Íþróttahallarinnar á Akureyri.
Það er jafnan mikið líf í Íþróttahöllinni á Akureyri og reyndar mun meira en flestir gera sér grein fyrir, enda fer þar fram umfangsmikil starfsemi. Íþróttahöllin er miklu meira en bara íþróttahús og að sögn Aðalsteins Sigurgeirssonar forstöðumanns komu um 36.000 manns í Höllina nú í mars og apríl, eða ríflega tvöfaldur íbúafjöldi Akureyrar. Í Höllinni fer fram leikfimikennsla yfir vetrartímann fyrir nemendur í Brekkuskóla, MA og VMA, frá morgni og fram á miðjan dag en þá taka við æfingar hjá íþróttafélögunum fram til kl. 23.00. Aðalsteinn segir að þar fyrir utan séu Lyftingafélag Akureyrar, Skákfélag Akureyrar, Golfklúbbur Akureyrar, Mæðrastyrksnefnd, Akureyri handboltafélag og Heimahjúkrun með aðstöðu í Höllinni. Þá mun Skotfélag Akureyrar opna sína aðstöðu í húsinu næsta haust.
Það er jafnan mikið um að vera hér og á hverju ári er töluvert um fastar stórar uppákomur, frá mars og fram í júní segir Aðalsteinn. Ein stærsta árshátíð landsins, ef ekki sú stærsta, árshátíð Akureyrarbæjar, var haldin í Höllinni í mars og sóttu hana um 1.200 manns. Útgerðarfyrirtækið Samherji hélt einnig um 1.000 manna árshátíð á dögunum og komu gestir víða að úr heiminum. VMA heldur sína árshátíð í Höllinni og framundan eru svo stórar veislur í tengslum við brautskráningu MA og heimsókn eldri stúdenta til bæjarins. Aðalsteinn segir að hér sé um að ræða svo stóra viðburði, að þeir kæmust ekki fyrir í öðrum húsum í bænum. Ekki sé því verið að keppa við aðra aðila á þessum markaði en að þeir séu aftur á móti fjölmargir sem njóti góðs af þessum uppákomum og heimsóknum gesta til bæjarins í tengslum við þær.
Háskólinn á Akureyri verður með sína brautskráningu í Höllinni í júní og þá verður Höldur með stóra og mikla bílasýningu síðar í þessum mánuði. Hængsmótið, opið íþróttamót fyrir fatlaða, fór fram í Höllinni, um og eftir síðustu helgi. Keppendur voru um 230 talsins og fylgdi þeim stór hópur aðstoðarfólks. Verðlaunaafhendingar á Andrésar Andar leikunum fóru fram í Höllinni á dögunum. Keppendur voru um 660 og fylgdi þeim einnig mikill fjöldi fólks. Á Skólahreysti á dögunum var troðfullt hús og þá fór þar fram stórt öldungamót í blaki í mars sl, þar sem keppendur voru um 350 talsins. Þá verður vetrarstarfi Félags eldri borgara slitið í Höllinni síðar í þessum mánuði, með hádegisverði og skemmtun.
Húsfyllir var á undanúrslitaviðureign Akureyrar og FH á Íslandsmótinu í handknattleik á dögunum og reyndar var vel mætt á leiki Akureyrar í vetur. Í sumar verður sætum í Höllinni fjölgað um 500, með nýjum útdregnum bekkjum niðri á gólfi. Við breytinguna verða sæti fyrir alls 1.110 manns. Aðalsteinn segir að oft hafi verið fleiri í húsinu, eða allt að 2000 manns á tónleikum.
Íþróttahöllin verður 30 ára á þessu ári og hefur Aðalsteinn verið forstöðumaður frá upphafi. Hann segir það eintstaklega ánægjulegt að kynnast öllu því fólki sem hefur verið að standa fyrir viðburðum í húsinu. Það gerir þetta starf svo fjölbreytt og skemmtilegt. Auk Aðalsteins, vinna fjórir starfsmenn í Íþróttahöllinni og sjá þeir um öll þrif og annað í mannvirkinu.
Nýjast
-
Krummafótur á Grenivík 25 ára
Leikskólinn Krummafótur á Grenivík fagnaði 25 ára afmæli nýverið. Af því tilefni var opið hús í leikskólanum og var gestum og gangandi boðið upp á kaffi og afmælisköku. -
Sjúkrabílabangsar afhentir á Hlíð
Sigurbjörg Ingvadóttir notandi í dagþjálfun á Hlíð afhenti fullan poka af fallegum sjúkrabílaböngsum til sjúkraflutningamanna nú fyrir skemmstu. Sibba, eins og hún er -
B.Jensen vormòt Òðins Jón Ingi Einarsson sló 3 Akureyrarmet í flokki 13-14 ára
B.Jensen vormót Óðins var haldið í blíðskaparveðri í Sundlaug Akureyrar laugardaginn 17. Maí. Keppendur voru 62 frá Óðni auk 1 frá Sundfélaginu Rán á Dalvík. Yngstu keppendurnir voru fæddir 2016 og 2017 en þau fóru flest að taka þátt í fyrsta sinn. Það er skemmst frá því að segja að þau stóðu sig frábærlega vel þrátt fyrir að hafa velflest aldrei stungið sér af startpalli, þar sem enginn slíkur er í Glerársundlaug, þar sem grasrótarstarf Óðins fer fram. -
Ævintýragarðurinn við Oddeyrargötu 17 opnar á morgun
Í tilkynningu sem Hreinn Halldórsson, staðarhaldari, og listasmiður í Odddeyrargötu 17 sendi frá sér kemur fram að Ævintýragarðurinn hans sem er eitt að djánsum bæjarins opnar fyrir almenning 20. mai sem er á morgun þriðjudag. -
Þá er vorið loksins komið
Já vorið er sú árstíð sem ég elska mest. Sennilega er það líka ljótasta árstíðin. Allt skítugt, grasið gulbrúnt, tré og runnar berir. En svo breytist allt á augabragði. Og daginn sem sólgulur fífill brosir við mér, feit hunangsfluga flýgur framhjá, eða kónguló spásserar yfir borðið sem ég sit við, þá hellist þessi barnslega gleði og tilhlökkun vegna sumars sem er í vændum yfir mig. En besta vormerkið er án efa að það birtir. -
Íshokkí í aldarfjórðung 25 ár frá stofnun kvennaliðs SA í íshokkí
„Þetta er ein hraðasta íþrótt í heimi. Ég hef lýst henni á þann veg að leikmaður er í 100 metra hlaupi á fullum hraða, gefi allt í sprettinn, með 10-15 kg aukalega á sér ásamt því að tveir menn hangi á honum. Það þarf að huga að kylfu og hvar pökkurinn er auk þess sem farið er um á örmjóu blaði. Íshokkí reynir mjög mikið á leikmenn, þeir þurfa að vera í góðu formi, sterkir og hafa gott jafnvægi,“ segir Jónína Margrét Guðbjartsdóttir. Hún var ein af þeim konum sem tók þátt í að stofna kvennalið Skautafélags Akureyrar fyrir 25 árum og er enn að, spilar með og þjálfar að auki U16 kvenna hjá félaginu -
Einstök upplifun í Grobbholti
-Sauðfjárbúið á Húsavík sem dregur að sér hundruði gesta á hverju vori -
Gamla verslunin í Vaglaskógi jöfnuð við jörðu
„Það eiga margir góðar minningar um þessa verslun,“ segir Helen Jónsdóttir en gamla góða búðin í Vaglaskógi var jöfnuð við jörðu nýverið. Allt var tekið nema hellan fékk að vera og væntir Helen þess að eitthvað verði gert á staðnum. „Vonandi verður settur upp fallegur áningarstaður þarna, með borðum og bekkjum og jafnvel skilti sem greinir frá sögu verslunarinnar.“ -
Hamrastígur og Kirkjugarðsstígur Finnur ehf bauð lægst í stígagerðina
Gengið verður til samninga við lægstbjóðenda, Finn ehf í gerð tveggja stíga á Akureyri, Hamrastígs og Kirkjugarðsstígs, en fyrirtækið átti lægsta boð í bæði verkin.