„Þyrnum stráð ganga á sviði dægrastyttingar“
Ingólfur Sverrisson skrifar
Eftir fyrstu bíóferð mína með Herði bróður, sem sagt hefur verið frá á þessum vettvangi, hófst þyrnum stráð ganga á sviði dægrastyttingar vegna þess að við sem komum frá barnmörgum heimilum fengum sjaldan peninga til að fara í bíó. Frekar en að gefast upp stóð ykkar einlægur stundum við dyrnar í Nýja bíó og hallaði sér að dyrastafnum þar sem „Stjáni í bíó” reif af miðum þeirra sem höfðu ráð á að kaupa þá. Sem ég stóð þarna gafst öðru hvoru tækifæri til að kíkja löngunaraugum inn í salinn, jafnvel eftir að búið var að slökkva ljósin þar og hreyfimyndirnar komnar í gang á tjaldinu hvíta. Að lokum stóðum við Stjáni einir eftir við innganginn og sögðum ekki orð. Oftast lauk þráteflinu með því að hann opnaði dyrnar, greip í öxl mér, ýtti mér inn og ég kominn í bíó! Síðan leit ég á Stjána sem göfugmenni og einn besta son Akureyrar fyrr og síðar.
Á þessum tímum var enginn texti við bíómyndirnar og þurftu því flestir að kaupa „prógramm” í miðasölunni þar sem söguþráðurinn var rakinn og með því opnaður möguleiki á að skilja eitthvað af því sem fram fór á hinu hvíta tjaldi. Hinir sem kunnu eitthvað í útlensku lögðu sig jafnan fram um að hlægja á réttum stöðum og það svo hátt að ekki færi fram hjá nokkrum manni í salnum að þeir væru vel að sér í viðkomandi tungumáli! Við það jókst hróður þeirra til muna.
Við krakkarnir, sem kunnum ekkert í útlensku og urðum að bíða eftir að masinu í fólkinu á bíómyndunum linnti, fórum þá gjarnan að ræða saman um okkar áhugamál og hnoðast hvert í öðru til að lífga upp á samkvæmið. Sérstaklega þótti okkur strákunum leiðinlegt þegar fólkið á tjaldinu var að kyssast og láta vel hvert að öðru enda töldum við það fullkomlega tilgangslausa athöfn og tímaeyðslu frá alvöru hasar. Einn okkar orðaði það svona: „Ótrúlega leiðinlegt þegar fólkið er alltaf sjúga magasýrurnar hvert upp úr öðru.” Ekki var rómantíkin kominn lengra hjá okkur strákunum í þá daga.
Því meiri tíma sem fólkið á hvíta tjaldinu eyddi í þá þarfleysu að kyssast eða tala saman varð það til þess að óróinn jókst hjá okkur í sætunum og þróaðist stundum upp í töluverðan hávaða og tilfæringar sem gátu borist út á gólf og upp að senunni. Þegar kossum og masi slotaði loks á hvíta tjaldinu settumst við öll með það sama hver í sitt sæti steinþegjandi og horfðum opinmynnt í taumlausri aðdáun á Tarzan apabróður svífa milli trjánna, Roy Rogers á færleiknum Trigger út um víðan völl eða Lone Ranger með grímuna dularfullu að vega mann og annan. Hvílíkar hetjur og hvílík afrek sem þessi goð okkar frömdu fyrirhafnarlaust og af svo mikilli íþrótt að við stóðum á öndinni af hrifningu. Við þurftum ekkert prógramm til að átta okkur á því hvað var að gerast; allt var deginum ljósara og óskiljanleg tungumál skiptu nákvæmlega engu máli. Aðeins hetjudáðir átrúnaðargoða okkar sem þurftu engra útskýringa við enda voru þau af öðrum heimi.
Ingólfur Sverrisson
Nýjast
-
Banaslys í Eyjafjarðarsveit
Alvarlegt umferðarslys varð á Eyjafjarðabraut eystri , skammt norðan við Laugaland skömmu eftir kl. 13:00 í dag. Þarna hafði bíll lent út af og voru tveir aðilar sem í honum voru úrskurðaðir látnir á vettvangi. Lögreglan á Norðurlandi eystra fer með rannsókn málsins og er hún á frumstigi og ekki frekari upplýsingar að hafa að sinni. -
Umferðarslys á Eyjafjarðarbraut eystri
Alvarlegt umferðarslys varð á Eyjafjarðabraut eystri , skammt norðan við Laugaland skömmu eftir kl. 13:00 í dag. Þarna hafði bíll lent út af og í honum voru tveir aðilar. Rannsókn á tildrögum slyssins stendur yfir á vettvangi og getur lögreglan ekki veitt frekari upplýsingar á þessu stigi málsins. -
Kirkjutröppurnar og gangstétt í Listagilinu
Framkvæmdir við kirkjutröppurnar eru hafnar að nýju eftir talsvert hlé og er búið að byggja yfir neðsta hluta trappanna, en þar er verið að vinna í húsnæði sem er undir tröppunum. Að því loknu verður hægt að hefja vinnu við sjálfar kirkjutröppurnar, þeirri vinnu hefur seinkað m.a. sökum þess að erfiðlega gekk að fá verktaka í verkefnið og það var umfangsmeira en var ráð fyrir gert. -
Hefur allt sem þarf
Fyrstu kynni mín af Höllu Tómasdóttur voru í tengslum við vinnustað þar sem hún kom einn dag og ræddi við hópinn. Þessi dagur breytti svolítið lífi mínu því þarna uppgötvaði ég í raun hvernig ég get tekið stjórn á eigin lífi. Halla varpaði á skjá mynd af vatnsglasi sem í var vökvi um það bil að miðju glasi. Hún talaði um viðhorf okkar og hvernig við tökumst á við það sem lífið færir okkur. -
Söngveisla í Glerárkirkju á sumardaginn fyrsta
Tíunda kóramót eldri borgara á Norðurlandi fer fram á morgun sumardaginn fyrsta. Fyrsta kóramót eldri borgara var haldið á Húsavík á lokadaginn 11 maí 2002 með þátttöku fimm kóra sem komu frá Húsavík, Akureyri, Dalvík, og Hrísey, Siglufirði og Skagafirði. -
Samherji og Ice Fresh Seafood á stærstu sjávarútvegssýningu heims
Alþjóðlega sjávarútvegssýningin Seafood Expo Global í Barcelona á Spáni opnaði í gær, 23. apríl. Sýningin er sú stærsta sinnar tegundar í heiminum á sviði veiða, vinnslu og sölu sjávarafurða. Samherji og Ice Fresh Seafood eru að venju með stóran og vel útbúinn bás, þar sem tekið er á móti gestum frá öllum heimshlutum og afurðir kynntar. Ice Fresh Seafood sér um að selja afurðir Samherja og fleiri fyrirtækja. -
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára.
Athugasemdir