Ríflega 1200 börn á aldrinum 5 til 11 ára bólusett á Akureyri
„Það gekk allt vonum framar, börnin voru mjög dugleg og foreldrar greinilega búnir að undirbúa börn sín vel,“ segir Ingibjörg Lára Símonardóttir yfirhjúkrunarfræðingur á Heilbrigðisstofnun Norðurlands á Akureyri
Bólusetningar barna á aldrinum 5 til 11 ára fóru fram á Slökkvistöðinni á Akureyri í gær og fyrradag og voru á þessum tveimur dögum alls 1217 börn bólusett sem er um 60% þátttaka en rétt um 2000 börn eru á þessum aldri á svæðinu.
Ingibjörg Lára segir að um sé að ræða mikið samvinnuverkefni heilsugæslunnar, slökkviliðs, lögreglu og björgunarsveitarinnar, en allir leggist á eitt til að útkoman verði sem best.
Hún segir að bólusetning barna verði boðnar á ný eftir þrjár viku, en þá fá börnin aðra sprautu. Á þeim tíma verður einnig í boði að fá fyrstu bólusetningu. „Hugsanlega verður í boði að fá bólusetningu eitthvað fyrr og geta þeir sem ekki gátu nýtt sér þessa bólusetningardaga í vikunni komi þá. En við munum þá auglýsa það á vef HSN,“ segir Ingibjörg Lára.
Athugasemdir