Langstærsta kosningamálið

Okkar færustu læknar og vísindamenn hafa sýnt fram á þá nöturlegu staðreynd með viðurkenndum rannsóknum og vísindagreinum að verði ekkert að gert mun íslenska hagkerfið sligast undan heilbrigðiskostnaði og eiga þar lífstílssjúkdómar langstærstan hlut að máli. Íslendingar eru feitasta þjóð í Evrópu. Lífsumhverfi barna og unglinga hefur breyst svo hratt á síðasta áratug vegna hinna fjölmörgu möguleika skjávæðingarinnar. Rannsóknir sýna að hreyfing barna og ungmenna hefur minnkað um 50% á síðastliðnum áratug. Stjórnvöld hafa á engan hátt brugðist við þessari breytingu og á það jafnt við um bæjarstjórn Akureyrar sem og alþingi Íslendinga.

Hreyfingarleysi er stærsti þátturinn í þeirri skelfilegu þróun sem er að eiga sér stað mótspyrnulaust í þessum töluðu orðum. Börn og unglingar rýna á skjái af öllum gerðum og afþreyingin hefur færst úr hreyfileikjum í undraheim skjáveraldarinnar. Að óbreyttu munu hellast yfir þjóðina sjúkdómar s.s. hjarta- og æðasjúkdómar, lungnasjúkdómar, krabbamein og sykursýki.

Til marks um fullkomið andvaraleysi stjórnvalda gerir ný aðalnámskrá ekki ráð fyrir fjölgun hreyfistunda í grunnskóla. Ráðuneytum hafa verið sendar vísindagreinar,  vandaðar skýrslur og rannsóknir þar sem bent er á hvernig hægt er að bregðast við þessari afleitu þróun. Öll þau gögn sem send hafa verið heilbrigðisyfirvöldum benda á svipuð úrræði þ.e. lýðgrundaðar aðgerðir sem beint er að öllum grunn- og framhaldsskólanemum í formi aukinnar hreyfingar undir stjórn íþróttakennara.

Akureyrarbær á að taka frumkvæði á landsvísu þannig að eftir verði tekið og hefja hreyfinguna á hæsta stall. Grunnskólanemar eiga að leggja sömu áherslu á líkamsrækt og þekkingu á eigin líkama líkt og bóklegar greinar. Skólayfirvöld á Akureyri, þ.á.m. skólanefnd og fræðslustjóri, eru rígbundin við bóknámið og útkomur úr PISA könnunum en láta sig það litlu varða þó skjákynslóðin hreyfi sig minna og minna ár frá ári. Við erum jú, feitasta þjóð í Evrópu.

Ég skipa 13. sæti á lista Framsóknarflokksins í komandi sveitarstjórnarkosningum og hef sett saman heildstætt lýðheilsuátak sem spannar aldurinn frá leikskóla til aldraðra. Í þessari stuttu grein get ég ekki greint í smáatriðum frá útfærslu lýðheilsuátaksins en sem dæmi má nefna að allir grunnskólar verða að fjölga íþróttatímum og hreyfistundum þar sem fléttað er saman bóklegri kennslu og hreyfingu. Einnig er í burðarliðnum stofnun íþróttafélags aldraðra sem mun bjóða upp á fjölbreytilega möguleika til líkamsræktar við hæfi hvers og eins. Íþróttafélögin verða að koma til móts við bæjarbúa með stofnun göngu- og skokkhópa ásamt annarri hreyfiafþreyingu.

Heilu ári hef ég varið í útfærslu þessa átaks og komist Framsóknarflokkurinn til áhrifa í næstu bæjarstjórn mun átakinu verða hrint af stað. Þó svo að aðrir flokkar myndi meirihluta er ég boðinn og búinn til að aðstoða við útfærslu átaksins.

Það sem e.t.v. er ótrúlegast við þetta allt saman að þetta kostar fyrst og fremst hugarfarsbreytingu ekki fjármuni.

Jóhannes Gunnar Bjarnason er íþróttafræðingur og skipar 13. sæti á lista Framsóknarflokksins á Akureyri.