Erfiður vetur fram undan í atvinnumálum
Aðalsteinn Á. Baldursson, formaður Framsýnar stéttarfélags sagði í samtali við Vikublaðið að staðan væri mjög alvarleg og áhrifa væri þegar farið að gæta meðal fyrirtækja og verktaka sem þjónustað hafa kísilverið á Bakka. Hann segist óttast að 30-40 störf til viðbótar séu í hættu.
Slökkt var á ofnum kísilvers PCC á Bakka á mánudag en eins og fram hefur komið var um 80 starfsmönnum sagt upp fyrr í sumar vegna framleiðslustöðvunar. Ástæða stöðvunarinnar er sögð vera áhrif Covid-19 faraldursins á heimsmarkaðsverð á hrávörum en það hefur lækkað stöðugt allt frá því að verksmiðjan hóf framleiðslu.
Nú eru hafnar endurbætur á hreinsivirki verksmiðjunnar og vonast er til að framleiðsla hefjist á ný þegar markaðir glæðast.
Þá má nefna að ekki hefur verið ráðið í störf sem hafa losnað undan farin misseri. „Þetta fólk eru með mismunandi langan uppsagnarfrest. Þeir fyrstu hætta núna um mánaðamótin en þetta er frá einum og upp í þrjá mánuði sem fólk er með í uppsagnarfrest,“ segir Aðalsteinn og bætir við að fjölmennasti hópurinn missi vinnuna núna í lok mánaðarins.
Aðalsteinn segir að ekki séu komnar fram áreiðanlegar tölur um fjölda atvinnulausra á svæðinu, m.a. vegna sumarleyfa hjá Vinnumálastofnun en bendir á að undanfarið hafi verið um 300-400 atvinnulausir eða á hlutabótaleið stjórnvalda. Þessar tölur eigi eftir að hækka. „Það er undirliggjandi atvinnuleysi,“ segir hann.
Á sama tíma og atvinnuleysi er að aukast mikið á svæðinu kvarta atvinnurekendur á svæðinu um að illa gangi að ráða í störf. Sérstaklega er vöntun á starfsfólki í hótel og veitingageiranum og hafa margir gefist upp á því að auglýsa eftir fólki. „Að sjálfsögðu á enginn að vera á atvinnuleysisbótum bjóðist honum starf við sitt hæfi og við höfum verið að aðstoða þetta fólk sem er búið að missa vinnuna m.a. með því að bjóða því tímabundin störf hjá sláturhúsunum á svæðinu í sláturtíð,“ segir Aðalsteinn og kallar eftir því að starfsemi Vinnumálastofnunnar verði efld. Aðalsteinn bendir á að hann sé nú þegar búinn að skrifa upp á nokkur atvinnuleyfi hjá fólki utan Evrópska efnahagssvæðisins á sama tíma og hér sé bullandi atvinnuleysi.
Aðalsteinn bendir á að jákvæðir hlutir hafi verið að gerast í ferðaþjónustunni á svæðinu saman ber það sem að ofan er ritað um að ferðaþjónustuaðilar leiti að starfsfólki. Hann segir að Húsavík hafi hreinlega verið einn heitasti áfangastaður ferðamanna hér á landi það sem af er sumri og að veitingahús séu dag eftir dag full út úr dyrum. „En svo er hætt við að þetta detti niður í september, þá kemur höggið og við getum búið okkur undir erfiðan vetur. Við verðum bara að koma okkur í gegnum þetta með samtakamætti okkar,“ segir Aðalsteinn og tekur fram að hann sé bjartsýnn á að það takist.
Nýjast
-
Árangursrík sýning í Barcelona:
Sýningin tókst frábærlega. Það var stríður straumur gesta í básinn til okkar alla sýningardagana og mikill áhugi á okkar þjónustu og tæknilausnum," segir Hilmar Guðmundsson, sölu- og markaðsstjóri Slippsins Akureyri, um þátttöku fyrirtækisins í sjávarútvegssýningunni Seafood Expo Global í Barcelona á Spáni. Sýningin stóð í þrjá daga og lauk síðdegis í gær. -
Skemmdarverk unnin á rútum.
Hún var ekki skemmtileg aðkoma sem blasti við Jónasi Þór Karlssyni eigenda Sýsla Travel þegar hann kom, síðdegis í gær, til að líta til með bílakosti fyrirtækis hans sem staðsettar eru á nýju bílastæði við Laufásgötu 4 á Akureyri. Einhverjir lítt vandaðir höfðu farið um og brotið glugga í rútum Jónasar. Gluggar í svona bílum er sterkir svo nokkur fyrirhöfn hefur verið við að vinna þessi óskiljanlegu skemmdarverk. -
Ársfundur SSNE Skorar á stjórnvöld að tryggja nægt fé til löggæslu
„Lögreglan á Norðurlandi þarf að hafa þann styrk sem nauðsynlegur er ef upp koma alvarlegri mál í því skyni að geta sinnt hlutverki sínu og tryggt öryggi borgaranna,“ segir í ályktun sem samþykkt var á ársþingi SSNE sem haldið var í Þingeyjarsveit nýverið. Skorað var á stjórnvöld að tryggja nú þegar nauðsynleg fjárframlög til málaflokksins. -
Akureyri - Framkvæmdir við Torfunef
Framkvæmdir við stækkun Torfunefsbryggju ganga ágætlega um þessar mundir. Lóðir verða boðnar út á næstu vikum og gangi allt að óskum verður hafist handa við að reisa hús á svæðinu á næsta ári. -
Stöðugur straumur á bás Samherja og Ice Fresh Seafood í Barcelona - Aðsóknarmet slegið -
Alþjóðlegu sjávarútvegssýningunni Seafood Expo Global í Barcelona lauk í gær , fimmtudag. Samherji og Ice Fresh Seafood voru með veglegan bás á þessari stærstu sjávarútvegssýningu heims á sviði veiða, vinnslu og sölu sjávarafurða. 2.244 fyrirtæki taka þátt í sýningunni frá 87 þjóðlöndum. -
Lokaorðið - Sumardagurinn fyrsti.
Sumardagurinn fyrsti er ævaforn hátíðisdagur á Íslandi. Þó líði aldir og kynslóðir komi og fari er ekkert sem Íslendingar þrá heitar en vorið. Hjörtun slá þá í mildum samhljóma takti og loks er liðin vetrarþraut. Sumardagurinn er einnig þekktur sem barnadagurinn. Í þéttbýlinu gerði fólk sér dagamun og klæddist sparifötum. -
Mikil umferð um Akureyrarflugvöll s.l. daga
Mikil umferð hefur verið um Akureyrarflugvöll síðustu daga áætlunarflug, sjúkraflug, einkaþotur og töluverð þyrluumferð. -
Eik fasteignafélag vill byggja við Gleráreyrar
Á fundi skipulagsráðs Akureyrarbæjar í gær var tekin til umræðu tillaga frá Kollgátu, sem Ingólfur Guðmundsson og Andrea Sif Hilmarsdóttir kynntu f.h hönd Eikar fasteignafélags um uppbyggingu á lóðum 2-8 við Gleráreyrar og svæðis vestan þeirra. -
Sólarhringssund hjá Óðinskrökkum
Hið árlega sólarhringssund iðkenda í Óðni stendur nú sem hæst. Einn sundamaður syndir í einu og er þetta því nokkurs konar boðsund.
Athugasemdir