Álitlegri hugmyndir en sveitarfélagið hefði getað gert betur
„Ég er þeirrar skoðunar að sveitarfélagið eigi í hvívetna að stunda góða stjórnsýslu og sjá til þess að leikreglur séu skýrar og greinilegar svo allir sitji við sama borð, í máli Tónatraðar hefði sveitarfélagið getað gert mun betur í þeim efnum,“ segir Hilda Jana Gísladóttir bæjarfulltrúi Samfylkingar.
Skipulagsráð Akureyrarbæjar hefur tekið fyrir tillögu að uppbyggingu við Tónatröð og samþykkt að hefja vinnu við breytingu á skipulagi svæðisins. Bæjarstjórn heimilaði verktakafyrirtækinu SS Byggi ehf í vor að vinna að breytingum á því skipulagi sem fyrir var og nú hefur verið lögð fram tillaga Yrki arkitekta að útfærslu byggðar. Tillagan felur í sér breytt fyrirkomulag lóða og húsa, aukið er við byggingamagn og fjölgun íbúða frá núverandi skipulagi. Breyta þarf bæði aðalskipulagi og deiliskipulagi vegna uppbyggingar á svæðinu. Skipulagsráð hefur tekið jákvætt í að skipulagi verði breytt, en sviðsstjóra er falið að skoða betur afmörkun svæðisins, umfang uppbyggingarinnar, áhrif hennar á nánasta umhverfi, umferð til og frá svæðinu, jarðvegsaðstæður og fleira.
Hilda Jana bendir á að í deiliskipulagi sé svæðið við Tónatröð skilgreint fyrir einbýlishús, en meirihluti bæjarstjórnar hafi engu að síður heimilað einu tilteknu fyrirtæki að vinna að gerð breytinga á skipulagi svæðisins á grunni umsóknar þess. Sú umsókn hafi miðað að uppbyggingu fjölbýlishúsa og heimildin veitt með ýmsum fyrirvörum.
Farsælast að allir hafi jöfn tækifæri
„Við, fimm fulltrúar í bæjarstjórn töldum hins vegar í anda góðrar stjórnsýslu og jafnræðis, eðlilegt að bæjarstjórn tryggði að allir áhugasamir fengju jöfn tækifæri til að sækjast eftir lóðum við Tónatröð á breyttum forsendum. Við lögðum til að svæðið yrði skipulagt sem almennur þróunarreitur og auglýst eftir samstarfaðilum vegna vinnu við skipulag hans, þó með þeim skilyrðum að uppbygging falli vel að nærliggjandi byggð. Ég er enn þeirrar skoðunar að sú leið hefði verið farsælust,“ segir Hilda Jana. Hún bætir við að þær hugmyndir sem nú liggja til grundvallar uppbyggingu á svæðinu séu að sínu mati mun álitlegri en þær sem fyrst voru lagðar fram.
/MÞÞ
Nýjast
-
Sigríður Örvarsdóttir nýr safnstjóri Listasafnsins
Sigríður Örvarsdóttir hefur verið ráðin nýr safnstjóri Listasafnsins á Akureyri. Sigríður er með MA gráðu í safnafræði frá Háskóla Íslands (2018), BA gráðu í textílhönnun frá Seminaret for Kunst og Haandværk í Danmörku (2001), ásamt meistaranámi í prjónahönnun frá Academie Royale des Beux-Arts (2014) og viðbótardiplómu í hagnýtri jafnréttisfræði frá Háskóla Íslands (2009). Auk þess er hún með kennsluréttindi í grunn- og framhaldsskóla (2001). Sigríður hefur starfað sem safnstjóri og forstöðumaður Menningarmiðstöðvar Þingeyinga frá árinu 2022 og veitir sem slík forstöðu Myndlistarsafni Þingeyinga en safneign þess telur um 1.900 verk. Í starfi sínu stýrir hún starfseminni og ber ábyrgð á öllum þáttum rekstrar, allri fjárhags- og verkefnaáætlanagerð, bókhaldi, mannauðsmálum, rekstri fasteigna og faglegu starfi sjö annarra safneigna og fjögurra sýningarstaða. Sigríður starfaði sem verkefnastjóri sýninga hjá Akureyrarbæ sumarið 2021. Í því starfi sinnti hún sýningagerð, rannsóknarvinnu og kynningarmálum. Árin 2019 til 2020 var hún sjálfstætt starfandi ráðgjafi við gerð safnastefnu Akureyrarbæjar. Hún gegndi starfi safnafulltrúa Listasafnsins á Akureyri árið 2012 og árin 2010 og 2012 starfaði hún sem verkefnastjóri samsýninga og ritstjóri safnahandbóka fyrir söfn á Norður- og Norðausturlandi. Árin 2008 til 2012 starfaði hún sem safnkennari við Minjasafnið á Akureyri. Sigríður hefur reynslu af kennslu í list- og hönnunargreinum á öllum skólastigum innan lands sem utan, m.a. hjá Listaháskóla Íslands og Marbella Design Academy á Spáni. Hún hefur tekið þátt í alheimsþingi ICOM, alþjóðaráðs safna og verið fulltrúi þess í Rannsóknarsetri í safnafræðum við Háskóla Íslands. Alls bárust 14 umsóknir um starfið. -
Virðist sem skorti pólitískan vilja
Stjórn og trúnaðarráð Framsýnar kom saman til fundar í gær. Mörg mikilvæg mál voru til umræðu á fundinum m.a. samgöngumál. Ákveðið var að hvetja Vegagerðina og stjórnvöld til að styðja við áætlunarflug um Húsavíkurflugvöll auk þess styðja betur við Loftbrúna sem skiptir íbúa á landsbyggðinni verulega miklu máli. Fjölga þarf ferðum sem menn geta nýtt sér á þessum sérstöku kjörum -
Vantraust og kerfishrun í málefnum fólks með ADHD
Aðalfundur ADHD samtakanna fta, haldinn 16. apríl 2024 skorar á Heilbrigðisráðherra að grípa nú þegar til aðgerða vegna þess kerfishruns sem blasir við í þjónustu hins opinbera við fólk með ADHD. Vegna aðgerðarleysis stjórnvalda á liðnum árum hafa biðlistar eftir greiningu og meðferð meira en tvöfaldast og nú bíða um fjögur þúsund einstaklingar eftir að komast í greiningarferli. Biðtími fullorðinna eftir ADHD greiningu og meðferð verður að óbreyttu vel á annan áratug hjá þeim sem nú hefja ferlið samkvæmt tilvísun Heilsugæslulæknis – vel á annan áratug!! -
SAk - Sumarmönnun vel á veg komin
Líkt og hjá öðrum heilbrigðisstofnunum hefur mönnun verið mikil áskorun fyrir Sjúkrahúsið á Akureyri. Herferðin „Komdu í lið með okkur!” sem miðaði að því að kynna SAk sem eftirsóknarverðan vinnustað og gefa innsýn í störf hjúkrunarfræðinga og ljósmæðra á Sjúkrahúsinu á Akureyri hitt í mark og er sumarmönnun nú vel á veg komin. -
Húsavík - Vilja koma á tengiliðaverkefni fyrir nýja íbúa
Helena Eydís Ingólfsdóttir, fulltrúi D lista og formaður fjölskylduráðs Norðurþings lagði til á fundi ráðsins í síðustu viku að hafinn verði undirbúningur að því að koma á tengiliðaverkefni fyrir nýja íbúa í samstarfi sveitarfélagsins, vinnustaða og félagasamtaka. Með verkefninu er átt við að þegar nýir íbúar flytja í sveitarfélagið Norðurþing taki samfélagið höndum saman og greiði leið þeirra inn samfélagið. -
Listamannaspjall með Gunnari Kr. Jónassyni í Listasafninu á Akureyri n.k. laugardag
Laugardaginn 20. apríl kl. 15 verður listamannaspjall með Gunnari Kr. Jónassyni um verk hans á samsýningunni Sköpun bernskunnar, sem nú stendur yfir í Listasafninu á Akureyri. Stjórnandi er Heiða Björk Vilhjálmsdóttir, sýningarstjóri. Aðrir þátttakendur sýningarinnar eru Ingunn Fjóla Ingþórsdóttir og nemendur úr leikskólanum Naustatjörn og grunnskólunum Glerárskóla og Naustaskóla. -
Norðurorka fær umhverfisverðlaun Terra
Norðurorka hlaut umhverfisverðlaun Terra á landsbyggðinni fyrir árið 2023. Norðurorka hefur sett fordæmi fyrir því hversu vel má flokka allt sem til fellur hjá stóru fyrirtæki. Hlutfall sem urðað er eða sent í brennslu er í algjör lágmarki og samræmist það mjög vel stefnu Terra um að skilja ekkert eftir. Norðurorka hefur tileinkað sér þær nýjungar sem Terra býður upp á og hefur fyrirtækið verið reiðubúið að prófa nýjar lausnir og gefið álit sitt á virkni þeirra. Forsvarsmenn Terra segir að ansi mörg fyrirtæki sem séu í viðskiptum við félagið hafi bætti sig á milli ára þegar kemur að flokkun, sem aftur skili hreinni straumum og hærra hlutfalli heildarúrgangs sem fer í endurvinnslu. -
Nýr Kjalvegur – Hraðbraut í gegnum hálendið
Á Alþingi liggur nú fyrir þingsályktunartillaga um endurnýjun vegar yfir Kjöl með einkaframkvæmd en nokkrum sinnum hefur verið reynt að mæla fyrir málinu í gegnum tíðina án árangurs. -
Hefur myndað báta frá barnsaldri
Hafþór Hreiðarsson, ljósmyndari og nú myndlistamaður
Athugasemdir