Til hamingju „Stéttin“ á Húsavík
Katrín Sigurjónsdóttir skrifar
Föstudaginn 9. desember nk. fer fram formleg vígsla Stéttarinnar, nýrrar aðstöðu þekkingarklasans við Hafnarstéttina á Húsavík. Stéttin er samheiti samfélags stofnana sem þarna eru til húsa og starfa á sviði menntunar, rannsókna, atvinnuþróunar og nýsköpunar.
Á fundi sveitarstjórnar Norðurþings þann 1. desember sl. var samþykkt að ganga frá rekstrarsamningi til eins árs við Hraðið, miðstöð nýsköpunar á Stéttinni og var eftirfarandi bókað af því tilefni:
„Sveitarstjórn telur mikil samfélagsleg verðmæti felast í því samstarfi sem átt hefur sér stað á milli heimafjárfestis og stofnana sem byggðar hafa verið upp á síðustu árum og reknar eru fyrir rekstrarframlag frá ríkinu ásamt sjálfsaflafé. Þarna hefur tekist einstaklega vel til svo eftir er tekið. Nú þegar tekur Sveitarstjórn Norðurþings þátt í að fjármagna rekstur FabLab Húsavík.
Sveitarstjórn telur eðlilegt að Norðurþing taki virkan þátt og styðji við þessa mikilvægu innviði, sem líklegir eru til að auka enn aðdráttarafl Húsavíkur sem búsetukosts, ekki síst fyrir yngra fólk á vinnumarkaði og frumkvöðla á atvinnumarkaði svæðisins.“
Önnur fyrirtæki á Stéttinni sem njóta fjárframlaga eða styrktarsamninga við Norðurþing eru SSNE, Samtök sveitarfélaga á Norðausturlandi og Náttúrustofa Norðausturlands.
Mikilvægur þáttur þessa framsækna framtaks á Hafnarstéttinni á Húsavík er fjárfesting og uppbygging í húsnæðiskostinum á vegum heimafyrirtækisins Langaness ehf. í eigu Bjarna Aðalgeirssonar og fjölskyldu. Það er sérstaklega lofsvert þegar samvinna af samfélagslegum metnaði næst um framtak af þessu tagi.
Hrávörur eru takmörkuð auðlind í heiminum og því er nýsköpun og þekkingariðnaður grunnur að nýjum framtíðartækifærum. Í nýsköpun fara saman þekking, hugvit og nýjar uppgötvanir við lausnum á verkefnum nútímans og framtíðarinnar. Líklegt er að hugvit verði orðin stærsta útflutningsgrein þjóðarinnar innan ekki svo margra ára.
Samvinna og samtal innan klasans á Stéttinni er líkleg til að ýta undir samstarf ólíkra aðila um nýjar lausnir, uppgötvanir, hönnun, tækniþróun og lausnir. Þarna skapast betri aðgangur að sérhæfðri þekkingu, færni, samtali og aðstoð til að þróa hugmyndir í átt að veruleika. Tilvera Stéttarinnar styrkir þekkingarsamfélagið og eykur samkeppnishæfni sveitarfélagsins.
Það er ástæða til að þakka þeim sem hafa staðið í brúnni við uppbyggingu þekkingarklasans á Stéttinni. Uppbyggingin hefur verið jöfn og hröð og spannar um 20 ár, frá engu stöðugildi upp í um 30 stöðugildi í dag. Þróunin hefur verið dregin áfram af starfsfólki og frumkvöðlum þekkingarinnviðanna sjálfra og útkoman er þessi glæsilega heild, umgjörð og aðstaða sem er nú vígð undir nafninu Stéttin. Frábært starf sem horft er til alls staðar af landinu, sómi byggðarlagsins okkar, takk.
Við íbúar Norðurþings getum sannarlega verið stolt af starfsemin á Stéttinni, til hamingju öll.
Katrín Sigurjónsdóttir, sveitarstjóri Norðurþings.
Nýjast
-
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt. -
Mörg þúsund manns árlega á faraldsfæti suður til lækninga
Þjónusta Sjúkrahússins á Akureyri hefur dregist saman undanfarin misseri. Því fer fjarri að SAK nái að uppfylla það hlutverk sem skilgreint er í lögum um heilbrigðisþjónustu, þar sem m.a. segir að sjúkrahúsið eigi að veita þjónustu í nær öllum sérgreinum lækninga og vera varasjúkrahús Landspítala -
Lögreglan á Norðurlandi eystra rannsakar andlát
Eftirfarandi tilkynningu sendi lögreglan á Norðurlandi eysta frá sér nú rétt í þessu. Klukkan 04:30 aðfaranótt mánudags var lögreglan á Norðurlandi eystra kölluð að fjölbýlishúsi á Akureyri. Fyrstu lögreglumönnum sem komu á vettvang var vísað á meðvitundarlausa konu í íbúðinni og hófust endurlífgunartilraunir þegar í stað. Læknir og sjúkraflutningamenn komu einnig á vettvang en tilraunir til endurlífgunar báru ekki árangur og var konan úrskurðuð látin á vettvangi. -
Svona er síminn hannaður til að stela athygli okkar
Af hverju er svona erfitt að leggja frá sér símann? Er efnið sem þar er að finna alltaf svo mikilvægt og áríðandi að það gengur fyrir þau samskipti sem við erum að eiga við fólkið í kringum okkur? Förum við í símann þegar að við erum undir stýri? (Já það telst líka með að gera það á rauðu ljósi). Lengjum við klósettferðirnar okkar til að vera lengur í símanum? Leggjum við símann alltaf á borðið á fundum, í kaffitímanum eða við matarboðið og leyfum þannig tilkynningunum á skjánum að stela athygli okkar? Setjum við börnin okkar fyrir framan skjá til þess að kaupa okkur sjálfum skjátíma? Leitum við í símann alltaf þegar að okkur leiðist? Erum við hrædd við að vera vandræðaleg á almannafæri og förum í símann til að þykjast vera að sinna einhverju mikilvægu frekar en að líta upp og leyfa huganum að reika? Dettum við út í samtölum við annað fólk því við ætluðum að fletta einhverju eldsnöggt upp en rákumst svo á eitthvað annað sem greip athygli okkar? Getum við átt gæðastundir með fjölskyldunni án þess að láta símann trufla okkur? -
Lokaorðið - Forgangslistinn
Eftir því sem ég eldist verð ég sífellt þakklátari fyrir að fá að ganga lífsins veg með fólkinu mínu. Við erum fámenn þjóð og höfum í gegnum tíðina staðið þétt saman. Við höfum lyft grettistaki í forvörnum vegna slysa á sjó og landi.
Athugasemdir