Miðbærinn á Akureyri – einstöku tækifæri hent út um gluggann?
Jón Þorvaldur Heiðarsson
Nýtt metnaðarfullt miðbæjarskipulag á Akureyri var samþykkt í maí 2014. Í skipulaginu átti að nýta það óvenjulega og einstaka tækifæri að í miðbænum eru stór svæði óbyggð. Nýta átti plássið sem best, búa til austur vestur ása (götur), mjókka Glerárgötuna úr fjórum akreinum í venjulega tveggja akreina götu (1+1) og auka þannig plássið fyrir nýjar byggingar og tengja miðbæinn við sjóinn, Pollinn. Ég og fleiri vorum spennt, nú væri tækifærið til að gera stórkostlega hluti á Akureyri, byggja upp einn fallegasta miðbæ á norðurslóðum sem drægi fólk og fyrirtæki að Norðurlandi.
Nú, sjö árum síðar er afar lítið búið að gerast í miðbæ Akureyrar nema sunnan Kaupvangsstrætis. Enn er beðið eftir uppbyggingu. Fljótlega var farið að tala skipulagið niður af vissum hópum sem höfðu mestar áhyggjur af því að ekki væri hægt að bruna á bíl jafn hratt í gegnum miðbæjarsvæðið þegar akreinarnar væru orðnar tvær. Það er lítil umferð á Akureyri í alþjólegum samanburði, ein akgrein í hvora átt á stutta kaflanum milli miðbæjar og sjávar annar umferðinni þar fyllilega. A.m.k. í öll þau mörghundruð skipti sem ég hef ekið þessa leið.
Þau rök voru notuð að svo dýrt væri að mjókka Glerárgötuna vegna lagna undir henni að ekki væri neitt vit að fara eftir skipulaginu. Þegar farið var að reikna kom þó í ljós að gatnagerðargjöld og fasteignaskattur af auknu byggingarmagni borga færsluna í fyllingu tímans og vel það. Þannig að ekki er það kostnaðurinn sem aftrar.
Nú er búið að teikna upp nýtt miðbæajarskipulag þar sem akreinarnar fjórar eiga að ráða miðbæ Akureyrar næstu nokkur hundruð árin, þeirra er valdið, dýrð sé því heilaga malbiki. Þær lóðir sem þá blasa við eru ekki nema svipur hjá sjón. Allt of mikil þrengsli og afar erfitt að skapa austur vestur ása, tengslin við Pollinn lítil eins og áður.
Það er afar sorglegt að á tímum þar sem öll vestræn samfélög eru að reyna að auka miðbæjarvirkni og mannlíf í bæjum og borgum með því að láta bílinn ekki skera svæði í sundur að óþörfu og taka óþarfa pláss að þá skulum við ákveða að miðbæjarsvæðið á Akureyir skuli nýtt undir fjögurra akreina veg með umferðareyju á milli sem takmörkuð not eru fyrir.
Verði þetta reyndin verður einstöku tækifæri fyrir Akureyri varpað út um gluggann. Af hverju, má spyrja. Nú er verið að byggja upp miðbæ á Selfossi sem verður flottur, kannski stórkostlegur. Fyrir nokkrum dögum kynnti Reykjavíkurborg uppbyggingu 20 þúsund manna hverfis á Höfðanum. Á meðan þessi metnaður er annarsstaðar ætlum við ekki einu sinni að hafa kjark til að nýta verðmætasta byggingarland á Akureyri undir byggingar sem styrkja miðbæinn og þar með bæinn allan í leiðinni. Fallegur sterkari miðbær styrkir allt í kringum sig. Meðal annars Eyrina sem verður dýrasta hverfið á Akureyri í framtíðinni.
Ég tel að með því að láta akreinarnar fjórar ráða þá fari verðmætt tækifæri forgörðum. Það verði mistök sem marka muni Akureyri í meira en 100 ár.
-Jón Þorvaldur Heiðarsson
Nýjast
-
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt. -
Mörg þúsund manns árlega á faraldsfæti suður til lækninga
Þjónusta Sjúkrahússins á Akureyri hefur dregist saman undanfarin misseri. Því fer fjarri að SAK nái að uppfylla það hlutverk sem skilgreint er í lögum um heilbrigðisþjónustu, þar sem m.a. segir að sjúkrahúsið eigi að veita þjónustu í nær öllum sérgreinum lækninga og vera varasjúkrahús Landspítala -
Lögreglan á Norðurlandi eystra rannsakar andlát
Eftirfarandi tilkynningu sendi lögreglan á Norðurlandi eysta frá sér nú rétt í þessu. Klukkan 04:30 aðfaranótt mánudags var lögreglan á Norðurlandi eystra kölluð að fjölbýlishúsi á Akureyri. Fyrstu lögreglumönnum sem komu á vettvang var vísað á meðvitundarlausa konu í íbúðinni og hófust endurlífgunartilraunir þegar í stað. Læknir og sjúkraflutningamenn komu einnig á vettvang en tilraunir til endurlífgunar báru ekki árangur og var konan úrskurðuð látin á vettvangi. -
Svona er síminn hannaður til að stela athygli okkar
Af hverju er svona erfitt að leggja frá sér símann? Er efnið sem þar er að finna alltaf svo mikilvægt og áríðandi að það gengur fyrir þau samskipti sem við erum að eiga við fólkið í kringum okkur? Förum við í símann þegar að við erum undir stýri? (Já það telst líka með að gera það á rauðu ljósi). Lengjum við klósettferðirnar okkar til að vera lengur í símanum? Leggjum við símann alltaf á borðið á fundum, í kaffitímanum eða við matarboðið og leyfum þannig tilkynningunum á skjánum að stela athygli okkar? Setjum við börnin okkar fyrir framan skjá til þess að kaupa okkur sjálfum skjátíma? Leitum við í símann alltaf þegar að okkur leiðist? Erum við hrædd við að vera vandræðaleg á almannafæri og förum í símann til að þykjast vera að sinna einhverju mikilvægu frekar en að líta upp og leyfa huganum að reika? Dettum við út í samtölum við annað fólk því við ætluðum að fletta einhverju eldsnöggt upp en rákumst svo á eitthvað annað sem greip athygli okkar? Getum við átt gæðastundir með fjölskyldunni án þess að láta símann trufla okkur? -
Lokaorðið - Forgangslistinn
Eftir því sem ég eldist verð ég sífellt þakklátari fyrir að fá að ganga lífsins veg með fólkinu mínu. Við erum fámenn þjóð og höfum í gegnum tíðina staðið þétt saman. Við höfum lyft grettistaki í forvörnum vegna slysa á sjó og landi.
Athugasemdir