Þegar Kalli Gloría tryggði Þingeyingum ódýrustu fótanuddtækin á landinu
Karl Hálfdanarson, gjarnan nefndur Kalli Gloría, starfrækti um árabil á Húsavík verslunina Radíóver, sem var einnig viðgerðarverkstæði með meiru.
Kalli var auðvitað í mikilli og frjálsri samkeppni við granna sína við Garðarsbrautina, Kaupfélag Þingeyinga og Bókaverslun Þórarins Stefánssonar, en Radíóver var til húsa í gömlu Klemmu sem nú er horfin af yfirborði jarðar. Þessir aðilar voru þátttakendur í einhverju ógurlegasta kaupæði Íslandssögunnar, því allir seldu þeir hin alræmdu fótanuddtæki sem voru „Jólagjöfin“ með stórum staf á sínum tíma.
Kalli hafði selt þetta furðulega fjölmúlavíl svo grimmt, að þegar Þorláksmessa, aðalsöludagurinn rann upp, átti hann aðeins tvö tæki eftir og engin von um að fá fleiri. En það sem verra var, hann vissi að bæði KÞ og Ingvar bóksali áttu miklar birgðir af þessum plastdöllum.
Uppkomin staða hugnaðist Karli afar illa, að samkeppnisaðilarnir tveir ættu eftir að stórgræða á sölu hundruða fótanuddtækja á lokasprettinum fyrir jólin á meðan hann ætti aðeins tvö eftir. Þá datt honum í hug snilldarbragð, sem að vísu tryggði honum sjálfum engan gróða, en kæmi alltént í veg fyrir að Ingvar og KÞ græddu svo mjög sem allt útlit var fyrir. Hann setti upp stóreflis auglýsingu í gluggann á Klemmu og auglýsti 50% afslátt af fótanuddtækjum fram til jóla.
Að sjálfsögðu seldi hann strax tækin tvö sem til voru, en af einhverjum ástæðum tók hann auglýsinguna ekki niður. Og að sögn Kalla brugðust bæði Ingvar og KÞ snarlega við og í sönnum samkeppnisanda lækkuðu þeir verðið á sínum tækjum um sömu prósentu og seldu þau öll langt undir kostnaðarverði.
„Vissulega tapaði ég á þessum tveimur fótanuddtækjum sem ég seldi á hálfvirði, en Ingvar og Kaupfélagið töpuðu auðvitað margfalt meira á þeim fjölmörgu tækjum sem þeir seldu. En það var auðvitað ekki aðalatriðið, heldur hitt, að með þessu trixi tókst mér að gleðja fjölda Þingeyinga sem eignuðust langódýrustu fótanuddtæki á landinu fyrir þessi jól!“
Sagði Kalli Glor. JS
Nýjast
-
Kirkjutröppurnar og gangstétt í Listagilinu
Framkvæmdir við kirkjutröppurnar eru hafnar að nýju eftir talsvert hlé og er búið að byggja yfir neðsta hluta trappanna, en þar er verið að vinna í húsnæði sem er undir tröppunum. Að því loknu verður hægt að hefja vinnu við sjálfar kirkjutröppurnar, þeirri vinnu hefur seinkað m.a. sökum þess að erfiðlega gekk að fá verktaka í verkefnið og það var umfangsmeira en var ráð fyrir gert. -
Hefur allt sem þarf
Fyrstu kynni mín af Höllu Tómasdóttur voru í tengslum við vinnustað þar sem hún kom einn dag og ræddi við hópinn. Þessi dagur breytti svolítið lífi mínu því þarna uppgötvaði ég í raun hvernig ég get tekið stjórn á eigin lífi. Halla varpaði á skjá mynd af vatnsglasi sem í var vökvi um það bil að miðju glasi. Hún talaði um viðhorf okkar og hvernig við tökumst á við það sem lífið færir okkur. -
Söngveisla í Glerárkirkju á sumardaginn fyrsta
Tíunda kóramót eldri borgara á Norðurlandi fer fram á morgun sumardaginn fyrsta. Fyrsta kóramót eldri borgara var haldið á Húsavík á lokadaginn 11 maí 2002 með þátttöku fimm kóra sem komu frá Húsavík, Akureyri, Dalvík, og Hrísey, Siglufirði og Skagafirði. -
Samherji og Ice Fresh Seafood á stærstu sjávarútvegssýningu heims
Alþjóðlega sjávarútvegssýningin Seafood Expo Global í Barcelona á Spáni opnaði í gær, 23. apríl. Sýningin er sú stærsta sinnar tegundar í heiminum á sviði veiða, vinnslu og sölu sjávarafurða. Samherji og Ice Fresh Seafood eru að venju með stóran og vel útbúinn bás, þar sem tekið er á móti gestum frá öllum heimshlutum og afurðir kynntar. Ice Fresh Seafood sér um að selja afurðir Samherja og fleiri fyrirtækja. -
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt.
Athugasemdir