Vikudagur kemur út í dag
Vikudagur kemur út í dag, fimmtudag. Í blaðinu má finna efni af ýmsu tagi. Sjónum er beint að Háskólanum á Akureyri, rætt er við Eyjólf Guðmundsson rektor um helstu málefni sem í brennidepli eru um þessar mundir. Viðburðarríku afmælisári er lokið og nýjar áskoranir blasa við starfsfólki. Aldrei hafa fleiri umsóknir um skólavist borist og nú á liðnu vori. Mest er aukning á hug- og félagsvísindasviði, en margir sækja um í lögreglufræði, vinsældir þess náms hafa farið fram úr björtustu vonum. Eyjólfur ræðir aðgangstakmarkanir sem grípa hefur þurft til. Háskólinn á Akureyri hefur vaxið og dafnað frá því til hans var stofnað haustið 1987, námsframboð aukist og starfsfólki fjölgað. Staðan er sú nú að ekki er stefnt að auknum nemendafjölda né heldur að auknu framboði háskólanáms umfram tæknigreinar.
Fram kemur einnig í blaði dagsins að miklar rakaskemmdir sem leiddu til myglu og sveppagróðurs komu upp í eldra skrifstofuhúsnæði Háskólans á Akureyri. Búið er að loka húsinu, en kostnaður við viðgerð er áætlaður um 200 milljónir króna. Viðhald sat á hakanum eftir efnahagshrunið fyrir áratug og kemur með þessu hætti harkalega í bakið á mönnum.
Þá er fjallað um heilmiklar framkvæmdir sem Norðurorka stendur í og vart hafa farið fram hjá vegfarendum um Akureyri. Fyrsti áfangi í lagningu Hjalteyrarlagnar stendur yfir, en Akureyringar sækja í meira mæli en áður sitt hitaveituvatn á svæði umhverfis Hjalteyri.
Það vantar 80 milljónir króna upp á að ljúka megi uppsetningu aðflugsbúnaðar á Akureyrarflugvelli. Búið var að tryggja 100 milljónir í það verkefni, en kostnaður reyndist meiri en fyrstu áætlanir gera ráð fyrir. Tafir á uppsetningu geta haft ófyrirsjáanlegar afleiðingar fyrir ferðaþjónustu fjórðungsins í för með sér.
Íþróttirnar eru á sínum stað, matarhornið sömuleiðis, fjallað er um nýjan barnasöngleik sem sýndur verður í tengslum við Handverkshátíð í næsta mánuði og glænýtt fjós á Syðri-Bægisá. Þá er og greint frá því að bæta á við tveimur nýjum tjaldflötum við Hamra, ferðafólki fjölgar og það er með æ stærri vagna af ýmsu tagi með í för. Tjaldsvæðið við Þórunnarstræti stenst ekki lengur nútímakröfur um aðbúnað og því þarf að ákveða innan tíðar hvort byggja eigi þar upp eða loka svæðinu.
Nýjast
-
Fimm tilboð í göngubrú
Fimm tilboð bárust í byggingu á nýrri steinsteyptri göngubrú í götustæði Borgarbrautar, auk stígagerðar að aðliggjandi stígum, uppsetningu á grjótkörfum, stoðveggjum og uppsetningu á lýsingu. -
Feðgar útskrifast með stúdentspróf
Upp er runninn síðasti kennsludagur þessarar vorannar 2025. Í mörg horn hefur verið að líta síðustu daga fyrir bæði kennara og nemendur enda þarf að ljúka við hin ýmsu verkefni og einnig eru próf í mörgum námsáföngum. Fram undan eru námsmatsdagar og punkturinn verður síðan settur yfir i-ið með brautskráningu í Menningarhúsinu Hofi laugardaginn 24. maí. -
Nýtt diplómanám við HA fyrir fólk með fjölþættar stuðningsþarfir
Háskólinn á Akureyri leitar að brautryðjendum sem langar að taka þátt í spennandi þróunarverkefni og hefja nám við skólann. -
Krúttlegasta hjólamót árins haldið á Akureyri á sunnudaginn
Krónan, Akureyrardætur og Hjólreiðafélag Akureyrar standa fyrir hjólamóti fyrir krakka á aldrinum 2 til 12 ára og fer mótið fram í Kjarnaskógi sunnudaginn 18. maí næstkomandi. Um er að ræða fyrsta hjólamótið sem Krónan heldur á Akureyri en mótið er haldið að fyrirmynd Krónumótsins í Öskjuhlíð sem er orðinn árlegur viðburður í september ár hvert. Skráning á mótið er hafin og eru öll börn velkomin. -
JÖKLABLÁMI opnun í Verksmiðjunni á Hjalteyri 17 maí 2025, kl. 14:00
Sýningin Jöklablámi opnar í Verksmiðjunni á Hjalteyri 17 maí kl. 14:00 Sýningin stendur til og með 22 júní. Opið alla daga nema mánudaga frá 14:00 til 17:00 -
Ótryggt sjúkraflug frá Húsavík
Á fundi byggðaráðs Norðurþings á dögunum Óskaði Rebekka Ásgeirsdóttir S-lista eftir umræðu sjúkraflug frá Húsavíkurflugvelli. -
Erum hætt að deyja ung!
Þessi rúmlega miðaldra sem þetta skrifar sat nýlega málstofu sem fjallaði um gervigreind í umönnun eldra fólks. Fram að því hafði hún ekki mikið leitt hugann að gervigreind og hvernig best er að nýta hana. Sú greinda hafði til þessa notað mig til að sýna mér endalaust í viðbót ef ég hafði til dæmis verið að skoða mér skó á netinu. -
Landinn heimsækir lögreglufræðinámið á Akureyri
Á dögunum var hægt að horfa á þegar Landinn á RÚV heimsótti lögreglufræðinámið við Háskólann á Akureyri. Okkur lék forvitni á að vita hvernig þetta kom til og kynnast stemmningunni í slíkri heimsókn. Andrew Paul Hill, lektor við lögreglufræðina, varð fyrir svörum. Hann segir að það hafi ekki verið nein formleg kynning sem varð til þess að Landinn heimsótti þau heldur þvert á móti hafi það verið heppileg tilviljun og jákvætt viðhorf áhugasamra aðila sem leiddi þetta spennandi verkefni af sér. -
Kisukot áfram á einkaheimili
Fyrir liggja drög að þjónustusamningi til eins árs um tímabundna meðhöndlun á köttum þar sem gert er ráð fyrir að Kisukot verði áfram starfrækt við Löngumýri á Akureyri svo sem verið hefur í rúman áratug.