Strætisvagn SVA knúinn af lífdísil sem framleiddur er á Akureyri

05. nóvember, 2009 - 15:33
Strætisvagn SVA knúinn af lífdísil sem framleiddur er á Akureyri
Orkey ehf., Mannvit og Strætisvagnar Akureyrar hófu í dag samstarfsverkefni, sem gengur út á að einn af strætisvögnum SVA mun verða knúinn af lífdísil, framleiddum í tilraunaverksmiðju Mannvits og Orkeyjar á Akureyri. Hermann Jón Tómasson bæjarstjóri skrifaði jafnframt undir viljayfirlýsingu um að Akureyrarbær styðji þetta verkefni með því að kaupa lífdísil á sínar bifreiðar og tæki, frá lífdísilverksmiðju Orkeyjar sem mun taka til starfa um næstu áramót.  

Fyrirtækið Orkey ehf. var stofnað í febrúar árið 2007 og hefur síðan þá kannað ýmsa möguleika á framleiðslu lífdísils - jafnt úr erlendu sem innlendu hráefni. Á næstu mánuðum mun fyrirtækið hefja framleiðslu a.m.k. 300 tonnum af lífdísil á ársgrundvelli, sem að mestu verður unninn úr úrgangssteikingarolíu og feiti, en einnig öðrum úrgangi. Áætlað er að fyrst um sinn muni starfsemi Orkeyjar skapa 2-3 ársverk auk nokkrurra afleiddra starfa. Verkfræðistofan Mannvit hefur veitt Orkey, allt frá stofnun, faglega ráðgjöf ásamt því að þróa og hanna framleiðsluferlið. Undanfarin misseri hefur farið fram tilraunaframleiðsla á lífdísil á rannsóknastofu Mannvits á Akureyri og hefur verkefnið m.a. verið styrkt af Vaxtarsamningi Eyjafjarðar. Tækjabúnaðurinn í verksmiðju Orkeyjar verður að stærstum hluta smíðaður á Akureyri. Tilgangur fyrirtækisins er að stuðla að sjálfbærri framleiðslu og notkun endurnýjanlegra orkugjafa og mun fyrirtækið leitast við að taka þátt í framförum á því sviði.

Hluthafar Orkeyjar eru tólf taldins. Þeir eru Aura Mare, N1, Stofnverk, Tækifæri, Arngrímur Jóhannsson, Hafnasamlag Norðurlands, Mannvit, Norðurorka, Brim, HB Grandi, Höldur og LÍÚ.

Til baka

Nýjast

Sjá meira