„Ég er bara föðmuð og kysst hvar sem ég fer“
Frískápnum hefur verið komið fyrir við Tún við grenndargámana sem eru þar fyrir.
Anna Soffía Halldórsdóttir á Húsavík hefur undanfarið unnið hörðum höndum og lagt sitt af mörkum við að gera samfélagið í bænum betra. Á fimmtudag var svokölluðum frískáp komið fyrir við Tún, aftan við grenndargámana. Um er að ræða ísskáp þar sem fólk getur komið með mat og matarafganga og skilið eftir handa öðrum að njóta. Framtakið tekur því á tveimur hlutum samtímis; annars vegar spornar þetta við matarsóun og hins vegar getur þetta hringrásarkerfi komið sér vel fyrir fólk sem er með minna á milli handanna.
„Ég hef bara verið á fullu að vinna í þessu,“ segir Anna Soffía í samtali við Vikublaðið og bætir við að hugmyndina sæki hún til annarra bæjarfélaga sem hafa komið slíkum verkefnum á laggirnar.
„Mér datt í hug að þetta yrði gott hér á Húsavík að hafa svona frískáp og þurfti að byrja á því að fá alls kyns leyfi til að setja þetta upp,“ útskýrir Anna Soffía og bætir við að margt fólk hafi boðið fram aðstoð sína við verkefnið sem allt er unnið í sjálfboðavinnu.
„Byggingavöruverslunin Heimamenn ætlar að gefa efni í að klæða ísskápinn og það er búið að gefa flottan kæliskáp í verkefnið. Fólk sem er að flytja til Danmerkur gáfu þennan flotta skáp,“ segir hún.
Hendum allt of miklu af mat
Anna Soffía segist þekkja dæmi um frískápa í Mosfellsbæ, Reykjavík og Akureyri. „Hugmyndin er sprottin upp úr því að sporna við matarsóun. Við vitum það öll að það er verið að henda of miklu af mat í okkar samfélagi. Við erum með bing af afgöngum sem við hugsum okkur kannski að borða næstu daga en svo endar það allt í ruslinu. Svo ætla ég að halda áfram og fara stiginu lengra. Ég er búin að tala við fyrirtæki og hef beðið þau um að setja í skápinn vörur sem eru komnar á síðasta söludag og er annars hent,“ útskýrir Anna Soffía en lætur ekki staðar numið þar.
„Svo ætla ég að taka þetta enn lengra og hjálpa þeim sem hafa lítið á milli handanna en þora hreinlega ekki í litlu samfélagi að láta sjá sig fara í skápinn. Þá verður ferlið þannig að hver og einn sem setur eitthvað inn í skápinn, lætur vita inni á Facebook síðunni sem ég stofnaði í kringum verkefnið, hvað sett er í hann. Svo mun ég tékka reglulega á skápnum og uppfæra á facebooksíðunni hvað er þar inni. Tek mynd hvað er í skápnum, pósta og segi fólki að drífa sig af stað.“
Aðstoðarkona jólasveinsins
Þá er Anna Soffía farin að huga að því að koma jólasveininum til aðstoðar. „Ég ætla ég að vera með körfu efst í kæliskápnum þar sem fólk getur sett lítil leikföng sem ekkert sér á – svo getur „jólasveinninn“ nýtt sér körfuna ef það er farið að minnka í pokanum,“ segir hún.
Anna Soffía segist hafa fundið fyrir miklu þakklæti fyrir framtakið. „Fólk í bænum er gríðarlega ánægt, ég er bara föðmuð og kysst hvar sem ég fer. Ég held svei mér þá að ég sé að fá frunsu,“ segir hún hlæjandi.
Þó Anna Soffía hafi unnið þetta allt í sjálfboðavinnu, þá sér hún ekki eftir tíma sínum í það. „Nei, fólk er ofboðslega þakklátt og það eru ríkleg laun. Það er alveg yndislegt að geta gefið eitthvað af mér til samfélagsins svo ég tali nú ekki um ef ég get hjálpað þeim sem minna mega sín. Þá mun ég líka hafa þann hátt á að fólk sem er feimið við að bera sig eftir þessu getur haft samband við mig persónulega og ég fer þá og sæki í skápinn og færi þeim heim að dyrum,“ segir Anna Soffía að lokum um leið og hún minnir okkur öll á það með framtaki sínu; að samfélagsandinn lifir enn góðu lífi á Húsavík.
Nýjast
-
Félagsgróðurhús og aðstoð við makaleit
Hugmyndir um hraðstefnumót og uppbyggingu á félagsgróðurhúsi litu dagsins ljós á fundum sem haldnir hafa verið í Stórutjarnarskóla og í Skjólbrekku. Mótun heildstæðrar stefnu fyrir Þingeyjarsveit stendur yfir um þessar munir og var boðað til fundanna í tengslum við þá vinnu. Einnig var rafrænn fundur haldinn fyrir allt sveitarfélagið. -
Akureyri og Fjallabyggð - Hátíðarhöld í tilefni af Verkalýðsdeginum
Stéttarfélögin við Eyjafjörð bjóða félagsfólki og fjölskyldum þeirra að taka þátt í hátíðardagskrá í tilefni af verkalýsdeginum þann 1. maí. Í ár er fylgt liði undir kjörorðunum Sterk hreyfing - Sterkt samfélag og er félagsfólk hvatt til þess að sýna samstöðu með því að fjölmenna í kröfugöngu. -
Annir hjá starfsmönnum Hafnasamlagsins
Snemma í gærmorgun mættu fjórir af okkar mönnum til Húsavíkur á dráttarbátnum Seif, eftir að hafa siglt frá Akureyri. Tveir menn til viðbótar keyrðu svo austur og voru tilbúnir í verkefni dagsins. -
Nýr formaður ÍBA Jóna tekur við af Geir
Jóna Jónsdóttir er nýr formaður Íþróttabandalags Akureyrar. Hún tók við embættinu af Geir Kristni Aðalsteinssyni sem verið hafði formaður í 10 ár. Ársþing ÍBA var haldið á dögunum. -
Hagnaður KEA 787 milljónir króna
Á aðalfundi félagsins sem fram fór í gærkvöldi kom fram að 787 milljóna króna hagnaður varð af rekstri félagsins á síðasta ári. Hreinar fjárfestingatekjur voru 1.057 milljónir króna og hækkuðu um 290 mkr. á milli ára. Eigið fé var rúmir 9,5 milljarðar og heildareignir námu rúmum 9,8 milljarði króna. Eiginfjárhlutfall var rúmlega 97%. -
,,Þetta snýst þá bara um að fara rútuferð á fimmtudaginn”
Það var sannkölluð háspenna sem boðið var upp á í leik Þórs og Fjölnis í Íþróttahöllinni í kvöld. Tækist Þór að sigra væri sæti í Olis deild karla næsta keppnistímabil í höfn, færi Fjölnir með sigur þyrfti oddaleik n.k fimmtudag í Reykjavík. -
Rannsókn á andláti- Gæsluvarðhald framlengt um viku
Gæsluvarðhald yfir manni sem er grunaður um að hafa orðið sambýliskonu sinni að bana í fjölbýlishúsi á Akureyri hefur verið framlengt um eina viku, eða til 6. maí -
Þjónusta þjóðkirkju við landsbyggðina
Eitt aðaleinkenni þjóðkirkjunnar, kirkju þjóðarinnar er hún að hún hefur þá grunnskyldu að veita kirkjulega þjónustu um allt land. Henni ber að þjóna fólki í sveit og borg, í þorpum og bæjum, þeim sem búa afskekkt og þeim sem búa þétt. Þetta er ekki einfalt hlutverk því þegar upp er staðið er það fjárhagurinn sem stýrir því hversu breið og öflug sú þjónusta er. Sóknargjöldin sem ríkið innheimtir fyrir þjóðkirkjuna hafa verið skert af hálfu ríkisins frá því í hruninu og jafnvel eitthvað fyrr. Þetta hefur gert það að verkum að erfiðara er að halda úti þjónustu safnaða og halda við kirkjubyggingum sem margar hver eru menningarleg þjóðarverðmæti. Þá hefur vígð þjónusta verið skert þar sem kirkjan hefur þurft að fara í sparnaðaraðgerðir auk þess sem fólksflutningar hafa orðið á ákveðnum svæðum. -
„Slippurinn Akureyri, Vinnslustöðin í Vestmannaeyjum og Skipasýn gera með sér hönnunarsamning“
Slippurinn Akureyri sem framleiðir vinnslubúnað undir merkjum DNG by Slippurinn hefur gert hönnunarsamning við Vinnslustöðina í Vestmannaeyjum og verkfræðistofuna Skipasýn.
Athugasemdir