Öllu tjaldað til á sannkölluðum nostalgíutónleikum
-
Tónlistarhátíðin Eyrarrokk verður haldin í fyrsta sinn á Verkstæðinu á Akureyri um helgina.
„Þetta er okkar framlag til að auka við annars fjölbreytt tónlistarlíf á Akureyri,“ segja þeir Rögnvaldur Bragi, Sumarliði Helgason og Helgi Gunnlaugsson sem standa að tónlistarhátíðinni Eyrarrokk sem fram fer á Verkstæðinu við Strandgötu 53 á Akureyri, þar sem í eina tíð var Oddviti og síðar Norðurslóðasafn.
Helgi keypti húsið fyrir tæpum tveimur árum, hann rekur þar Vitann – mathús virka daga, en í öðrum helmingi hússins er hægt að skella upp einkasamkvæmum, böllum og tónleikum og hefur hann róið á þau mið hvað markaðssetningu varðar. Nafn hússins, Verkstæðið dregur nafn sitt af starfsemi sem áður var í húsinu, en þarna var BSA-verkstæðið til húsa fyrir margt löngu.
Vonandi árlegur viðburður héðan í frá
Eyrarrokk er nú haldið í fyrsta sinn, „en vonandi ekki það síðasta,“ segir Rögnvaldur Bragi. Þeir stefna allir ótrauðir að því að um árlegan viðburð verði að ræða í bæjarlífi Akureyringa og gesta þeirra. Öllu er tjaldað til nú þegar fyrsta Eyrarrokkið er í boði, tónleikar bæði á föstudags- og laugardagskvöld og fjöldi hljómsveita mun stíga á svið. „Þetta verða nostalgíutónleikar,“ bætir hann við, en sjálfur á hann minningar frá því fyrir um það bil 30 árum síðan þegar nokkrar hljómsveitir tóku sig saman og efndu til sameiginlegra tónleika. „Það gekk ekki upp öðruvísi en að hljómsveitirnar tækju sig saman, það var of dýrt og mikið fyrirtæki að ein hljómsveit byði upp á tónleikar. Þetta er nokkurn vegin sama módelið sem við erum með núna, safna saman nokkrum þekktum böndum flestum úr fortíðinni og bjóða upp á dúndurgóða tónleika.“
Sumarliði bætir við að staðan á tónleikamarkaði sé með svipuðum hætti nú, það væri vart á færi þessara hljómsveita að henda upp tónleikum. „Ég er sannfærður um að það verður mikil stemmning á þessum tónleikum, þarna eru hljómsveitir sem gerðu garðinn frægan áður fyrr og marga fýsir eflaust að sjá stíga á svið nú fjölmörgum árum síðar. Það má í einhverjum tilvikum segja að þetta sé einstakt tækifæri að berja þessar sveitir augum og jafnvel það síðasta,“ segir hann.
Góð viðbrögð og við ákváðum að kýla á þetta
Hugmyndin að tónleikahaldinu kviknaði við hefðbundnar samræður, þeir voru að velta vöngum yfir hvað gæti verið gaman að bjóða upp á fjölbreyttara tónleikahald í heimabænum, Rögnvaldur minntist liðinna daga þar sem margar hljómsveitir komu saman og héldu tónleikar og Sumarliða langaði að upplifa þessa stemmningu líka. „Þannig að við ákváðum að gera þetta bara, skrifuðum bréf til 16 hljómsveita og könnuðum með áhuga og skemmst er frá því að segja að 12 svöruðu svo til strax og voru til í tuskið. Áhugann vantaði greinilega ekki. Svo við ákváðum að kýla á þetta,“ segja þeir.
Tónleikar verða bæði á föstudags- og laugardagskvöld og hefjast kl. 20. bæði kvöldin en húsið opnar klukkutíma fyrr. Á föstudagskvöldinu eru það hljómsveitirnar Chernobyl Jazz Club, Lost, Tvö dónaleg haust, Dr. Gunni og Fræbblarnir sem eiga sviðið. Á laugardagskvöldinu stíga svo á stokk Biggi Maus, DDT Skordýraeitur, Dúkkulísurnar, Helgi og hljóðfæraleikararnir, Langi seli og skuggarnir og Elín Helena. Hægt er að kaupa miða á hvort kvöld fyrir sig eða bæði.
„Þetta verður virkilega skemmtilegt, góða blanda af rokki, popprokki, rokkabillýi og allskonar fleira, bæði fjölbreyttar hljómsveitir og tónlistarstefnur,“ segir þeir félagar brattir og stefna á svipaða tónlistarhátíð að ári, „nema við töpum miklu, þá verður þetta á fimm ára fresti,“ segir Sumarliði. „Við stefnum bara að því að fá upp í útlagðan kostnað, það nægir okkur og svo auðvitað að gestirnir skemmti sér konunglega.“
/MÞÞ
Nýjast
-
Himinhátt innanlandsflug
Í samtölum mínum við fólk af landsbyggðinni um samgöngur og flug heyrist sífellt háværari umræða um hækkandi verð á flugferðum innanlands. Íbúum landsbyggðarinnar er orðið tíðrætt um að ekki fyrir svo löngu hafi það frekar borgað sig að keyra milli Akureyrar og Reykjavíkur ef þrír voru í bílnum. Í dag þurfi ekki einu sinni að hugsa sig um hvort eigi að keyra eða fljúga, jafnvel þó að Loftbrúin sé notuð og einungis einn sé á ferð. Fólk grínast með að það sé ódýrara að millilenda í London á leið sinni til Reykjavíkur, en það er sorgleg staðreynd að það er ekkert grín. -
Sumardagurinn fyrsti í Sigurhæðum klukkan 13
Ferskustu listamennirnir í Pastel ritröð kynna verk sín:Nr. 37: Þorbjörg Þóroddsdóttir: Vögguvísuatómapar.Nr. 36: Egill Logi Jónasson: Hohner mér vel.Egill Logi aka Drengurinn fengurinn er tónlistar- og myndlistarmaður. Hann starfar á Akureyri og er hluti af listhópnum Kaktus.Þorbjörg Þóroddsdóttir er 19 ára ungskáld frá Akureyri. Hún varð stúdent frá MA í fyrra, stundaði nám við lýðháskóla á Jótlandi í haust og vinnur nú á leikskóla. Hún hefur unnið til þrennra verðlauna í ritlistarsamkeppni Ungskálda. -
Dr. Áslaug Ásgeirsdóttir skipuð rektor Háskólans á Akureyri
Dr. Áslaug Ásgeirsdóttir hefur verið skipuð sem rektor Háskólans á Akureyri frá og með 1. júlí næstkomandi. Skipan Áslaugar er samkvæmt ákvörðun Háskólaráðs frá 2. apríl síðastliðnum um að tilnefna hana sem næsta rektor skólans. Háskóla-, iðnaðar- og nýsköpunarráðherra samþykkti tillöguna og tekur Áslaug við rektorsstöðunni 1. júlí næstkomandi. Alls bárust fimm umsóknir um embættið en skipað er til fimm ára. -
Syngjandi sumarsveifla í Laugarborg
Að kvöldi síðasta vetrardags býður Kirkjukór Grundarsóknar í Eyjafjarðasveit til tónlistarveislu í Laugarborg þar sem sannarlega verður syngjandi sumarsveifla í aðalhlutverki. -
Ef ég væri sími.
Líklega er áhugi fólks á tækjum og tækni mismikill. Flestir eru þó duglegir í að passa uppá símana sína, tileinka sér tækninýjungar og uppfæra þá. Þetta litla tæki sem fylgir okkur mörgum í daglegu lífi. Síminn er gjarnan skammt undan, uppi á borði, í töskunni eða vasanum. Góður sími getur veitt okkur sítengingu við alheiminn, vini og vandamenn, afþreyingu, vinnuna og bara allt mögulegt. -
Mörg þúsund manns árlega á faraldsfæti suður til lækninga
Þjónusta Sjúkrahússins á Akureyri hefur dregist saman undanfarin misseri. Því fer fjarri að SAK nái að uppfylla það hlutverk sem skilgreint er í lögum um heilbrigðisþjónustu, þar sem m.a. segir að sjúkrahúsið eigi að veita þjónustu í nær öllum sérgreinum lækninga og vera varasjúkrahús Landspítala -
Lögreglan á Norðurlandi eystra rannsakar andlát
Eftirfarandi tilkynningu sendi lögreglan á Norðurlandi eysta frá sér nú rétt í þessu. Klukkan 04:30 aðfaranótt mánudags var lögreglan á Norðurlandi eystra kölluð að fjölbýlishúsi á Akureyri. Fyrstu lögreglumönnum sem komu á vettvang var vísað á meðvitundarlausa konu í íbúðinni og hófust endurlífgunartilraunir þegar í stað. Læknir og sjúkraflutningamenn komu einnig á vettvang en tilraunir til endurlífgunar báru ekki árangur og var konan úrskurðuð látin á vettvangi. -
Svona er síminn hannaður til að stela athygli okkar
Af hverju er svona erfitt að leggja frá sér símann? Er efnið sem þar er að finna alltaf svo mikilvægt og áríðandi að það gengur fyrir þau samskipti sem við erum að eiga við fólkið í kringum okkur? Förum við í símann þegar að við erum undir stýri? (Já það telst líka með að gera það á rauðu ljósi). Lengjum við klósettferðirnar okkar til að vera lengur í símanum? Leggjum við símann alltaf á borðið á fundum, í kaffitímanum eða við matarboðið og leyfum þannig tilkynningunum á skjánum að stela athygli okkar? Setjum við börnin okkar fyrir framan skjá til þess að kaupa okkur sjálfum skjátíma? Leitum við í símann alltaf þegar að okkur leiðist? Erum við hrædd við að vera vandræðaleg á almannafæri og förum í símann til að þykjast vera að sinna einhverju mikilvægu frekar en að líta upp og leyfa huganum að reika? Dettum við út í samtölum við annað fólk því við ætluðum að fletta einhverju eldsnöggt upp en rákumst svo á eitthvað annað sem greip athygli okkar? Getum við átt gæðastundir með fjölskyldunni án þess að láta símann trufla okkur? -
Lokaorðið - Forgangslistinn
Eftir því sem ég eldist verð ég sífellt þakklátari fyrir að fá að ganga lífsins veg með fólkinu mínu. Við erum fámenn þjóð og höfum í gegnum tíðina staðið þétt saman. Við höfum lyft grettistaki í forvörnum vegna slysa á sjó og landi.
Athugasemdir