Hvergi fleiri íbúar á bak við hvern lögreglumann
Í umdæmi lögreglunnar á Akureyri einn lögreglumaður á hverja 778 íbúa.
Lögreglan á Akureyri hefur orðið fyrir miklum niðurskurði frá efnahagshruni og segir Daníel Guðjónsson yfirlögregluþjónn, að við því hafi þurft að bregðast með margvíslegum hætti. Umdæmi lögreglunnar á Akureyri nær um Eyjafjörð en að auki hafa lögreglumenn í umdæminu fengið aukin verkefni víðar á Norðurlandi. Lögreglan hér þjónar nú rúmum 24 þúsund íbúum og Rannsóknardeild rúmum 36 þúsund íbúum. Hvergi á landinu eru nú fleiri íbúar á bak við hvern lögreglumann, segir Daníel.
Hér er einn lögreglumaður á hverja 778 íbúa, í Reykjavík einn lögreglumaður á hverja 657 íbúa, á Akranesi einn á hverja 662 íbúa, á Seyðisfirði einn á hverja 620 íbúa og á Sauðárkróki einn á hverja 514 íbúa, sem dæmi. Daníel segir að fækkað hafi um fjóra í lögregluliðinu frá árinu 2008, þar sem ekki hafi verið ráðið í stöður manna sem hættu. Tveir hættu í Fjallabyggð og tveir á Akureyri. Á móti hafa Héðinsfjarðargöng sparað fjármuni þar sem hægt var með tilkomu þeirra að leggja niður varðstofuna á Ólafsfirði og færa starfsstöð lögreglumannanna þar í nýlega og góða lögreglustöð á Siglufirði. Akstur lögreglubíla hefur verið minnkaður um þriðjung og þá eru að jafnaði færri á vakt en áður þar sem ekki eru kallaðir inn aukamenn vegna veikinda, orlofs og annarra fjarvista. Því eru oft einungis þrír lögreglumenn að störfum í stað fimm sem telst fullmönnuð vakt samkvæmt vaktskrá.
Þá segir Daníel að sumarafleysingamönnum hafi verið fækkað. Það hefur skert verulega frumkvæðisvinnu lögreglunnar eins og umferðareftirlit einmitt þegar mest þörf er á því en stærstur hluti umferðarlagabrota er að jafnaði yfir sumarmánuðina. Á sama tíma hefur lögreglan fengið aukin verkefni eins og rannsóknir allra stærstu mála á Norðurlandi eins og alvarleg umferðaróhöpp, bruna, öll kynferðisafbrot, stærstu fíkniefnamálin og fleira. Engir fjármunir fylgdu hins vegar þessum skyldum og hefur verið reynt að mæta auknu álagi í Rannsóknardeild með því að láta almenna lögreglumenn ljúka minniháttar málum. Það hefur líka reynst snúið þar sem þar eru að jafnaði færri á vakt en áður og bitnar því líka á almennu eftirliti, segir Daníel.
Nýjast
-
Þá er vorið loksins komið
Já vorið er sú árstíð sem ég elska mest. Sennilega er það líka ljótasta árstíðin. Allt skítugt, grasið gulbrúnt, tré og runnar berir. En svo breytist allt á augabragði. Og daginn sem sólgulur fífill brosir við mér, feit hunangsfluga flýgur framhjá, eða kónguló spásserar yfir borðið sem ég sit við, þá hellist þessi barnslega gleði og tilhlökkun vegna sumars sem er í vændum yfir mig. En besta vormerkið er án efa að það birtir. -
Íshokkí í aldarfjórðung 25 ár frá stofnun kvennaliðs SA í íshokkí
„Þetta er ein hraðasta íþrótt í heimi. Ég hef lýst henni á þann veg að leikmaður er í 100 metra hlaupi á fullum hraða, gefi allt í sprettinn, með 10-15 kg aukalega á sér ásamt því að tveir menn hangi á honum. Það þarf að huga að kylfu og hvar pökkurinn er auk þess sem farið er um á örmjóu blaði. Íshokkí reynir mjög mikið á leikmenn, þeir þurfa að vera í góðu formi, sterkir og hafa gott jafnvægi,“ segir Jónína Margrét Guðbjartsdóttir. Hún var ein af þeim konum sem tók þátt í að stofna kvennalið Skautafélags Akureyrar fyrir 25 árum og er enn að, spilar með og þjálfar að auki U16 kvenna hjá félaginu -
Einstök upplifun í Grobbholti
-Sauðfjárbúið á Húsavík sem dregur að sér hundruði gesta á hverju vori -
Gamla verslunin í Vaglaskógi jöfnuð við jörðu
„Það eiga margir góðar minningar um þessa verslun,“ segir Helen Jónsdóttir en gamla góða búðin í Vaglaskógi var jöfnuð við jörðu nýverið. Allt var tekið nema hellan fékk að vera og væntir Helen þess að eitthvað verði gert á staðnum. „Vonandi verður settur upp fallegur áningarstaður þarna, með borðum og bekkjum og jafnvel skilti sem greinir frá sögu verslunarinnar.“ -
Hamrastígur og Kirkjugarðsstígur Finnur ehf bauð lægst í stígagerðina
Gengið verður til samninga við lægstbjóðenda, Finn ehf í gerð tveggja stíga á Akureyri, Hamrastígs og Kirkjugarðsstígs, en fyrirtækið átti lægsta boð í bæði verkin. -
Alþjóðaflugvöllur á Akureyri verði byggður upp
Sveitarfélögin á Norðurlandi vestra og Norðurlandi eystra skora á ríkisstjórn Íslands og Alþingi að koma rekstri, uppbyggingu og markaðssetningu Akureyrarflugvallar fyrir hjá sérstakri stjórn eða félagi, sem hefur það að markmiði að alþjóðaflugvöllurinn sé byggður upp og kynntur sem ein af gáttum Íslands -
Grafalvarleg staða í rekstri PCC Bakka rædd í atvinnuveganefnd Alþingis.
Atvinnuveganefnd Alþingis hefur verið upplýst um grafalvarlega stöðu í rekstri PCC Bakka við Húsavík, þar sem stefnt gæti í rekstrarstöðvun undir lok sumars ef ekki tekst að snúa vörn í sókn. -
Listasafnið á Akureyri Nýjar sýningar opnaðar
Sýningar Heimis Hlöðverssonar, Samlífi, og Þóru Sigurðardóttur,Tími – Rými – Efni, verða opnaðar í Listasafninu á Akureyri á laugardag 17. maí kl. 15. Á opnunardegi verður leiðsögn með Heimi kl. 15.45. -
Orkey fyrst á Íslandi með sjálfbærni- vottaða framleiðslu á lífeldsneyti
Orkey hefur fengið alþjóðlega kolefnis- og sjálfbærnivottun, ISCC EU, á lífdísilframleiðslu sína á Akureyri fyrst fyrirtækja sem framleiða lífeldsneyti hérlendis.