Er það minn eða þinn sjóhattur? Takk Norðurþing!
Þann 20. janúar síðastliðinn sendi sveitarstjórn Norðurþings frá sér umsögn um frumvarp til laga um miðhálendisþjóðgarð. Vægt er tekið til orða með því að segja, að þetta sé eitt það allra slappasta sem komið hefur frá sitjandi sveitarstjórn. Skömm er að og sýnir að hagsmunir íbúanna er varpað fyrir borð í nafni hlutleysis. Heiðarlegra hefði verið að lýsa yfir beinum stuðningi við frumvarpið í stað þess tátipls sem á sér stað í umsögninni.
Í umsögninni segir m.a.: „Að tækifæri kunna að liggja í uppbyggingu þjónustu og innviða fyrir þjóðgarðinn við Grímsstaði á Fjöllum og nærliggjandi svæði innan Norðurþings nærri mörkum þjóðgarðs og hálendisins.“
Nokkrum línum neðar segir: „Lykilatriði er að sveitarfélög séu ekki í einu og öllu bundin af stjórnunar- og verndaráætlun garðsins og þurfa ekki að taka allt sem þar kæmi fram inn í skipulag sveitarfélags.“
Þarna er algjör tvískinnungur á ferðinni og tipla menn þar í kringum grautarskálina, léttstígir eins og tófa án þess að marki neinsstaðar spor. Þeir sjá tækifærin sem mögulega liggja nærri mörkunum en þó sé lykilatriði að sveitarfélögin séu ekki bundin af stjórnunar- og verndaráætlun garðsins.
Hvers vegna gerir þá sveitarstjórn enga fyrirvara við 14. gr. 3. kafla sem segir að öll jaðarsvæði muni falla undir stjórnunar- og verndaráætlun þjóðgarðs ? Hvers vegna eru engar athugasemdir gerðar við að hvergi liggur nein skilgreining á orðinu „jaðarsvæði“ ? Með sínu svokallaða „hlutleysi“ er sveitarstjórn óbeint að leggja blessun sína yfir frumvarpið. Hún getur þá líklega sætt sig við að jarðir og eignir séu teknar eignarnámi með skipun ráðherra.
Henni finnst ásættanlegt að lýðræðislegt skipulagsvald kjörinna fulltrúa sé skert og völd 1/3 af landinu okkar sé fært á fárra manna hendur í nafni forræðishyggju. Henni finnst í lagi að aldrei hafi farið fram nein þarfagreining og hvergi liggi fyrir nein uppbyggingar- kostnaðar- eða rekstaráætlun fyrir svo stórt bákn. Henni finnst í lagi að nýtingar- og almannarétturinn sé virtur að vettugi þar sem ráðherra einn getur ef honum sýnist svo, lokað vegum og svæðum árið um kring. Þess má geta að innan Vatnajökulsþjóðgarðs er nú þegar búið að loka tugum slóða sem hefð var fyrir að nota í áratugi og jafnvel lengur. Engin ástæða er til að ætla annað en það sama muni gerast innan miðhálendisþjóðgarðs ef af honum verður.
Það er eitt ef meirihluta sveitarstjórnar hugnast sú hugmynd að það lýðræðislega rekna land sem Þjóðlendurnar eru, verði samþjappaðar niður í hendur eins ráðherra og breytt í enn eina ríkisstofnunina. En það er annað að samþykkja frumvarp í kringum þá stofnun sem inniber slíkt valdboð og einræði sem raunin er. Og ég held að sveitarstjórn ætti að velta því fyrir sér hvort raunveruleg náttúruvernd felist í því að stimpla hálendið allt með nafninu „Þjóðgarður“, vitandi að nafnið eitt og sér mun marfalda það magn ferðamanna sem mun vilja sækja það heim ? Hvað verður þá um þá náttúrulegu upplifun ferðamanna sem svo mikið er talað um ?
Einnig dreg ég það stórlega í efa, ef sveitarstjórn stæði frammi fyrir því að allt að 65% alls landsvæðis sveitarfélagsins ætti að falla undir þjóðgarð eins og blasir við öðrum sveitarfélögum, að hún myndi sýna slíkt hlutleysi sem hún sýnir nú.
Í ljósi þessarar óljósu afstöðu sveitarstjórnar er mér því með öllu óskiljanlegt hvers vegna yfir höfuð hún telur nauðsynlegt að halda uppi vörnum fyrir landi í eigu sveitarfélagsins í svokölluðu Ássandsmáli sem ríkið rekur nú fyrir dómstólum í nafni Landgræðslunnar. Þar vill ríkið slá eign sinni á stórt landsvæði norðan vegar í Kelduhverfi. Hvers vegna eru hagsmunir sveitarfélagsins veigameiri þar en annarsstaðar ? Það lítur allavega út fyrir að hagsmunir íbúanna vegi töluvert minna þegar þeir eru settir á vogarskálina á móts við hagsmuni sveitarfélagsins sjálfs.
Því hvet ég sveitarstjórnina til að segja sig frá Ássandsmálinu sem fyrst svo samhljómur geti ríkt í hlutlausum vinnubrögðum þeirra og framkomu því þar fer ekki saman hljóð og mynd í dag.
-Ágústa Ágústsdóttir, íbúi við Öxarfjörð
Nýjast
-
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á. -
Goblin opnar á Glerártorgi
„Eins leitt og okkur þykir að yfirgefa fallega miðbæinn okkar, erum við afar spennt fyrir þessum flutningum og hlökkum til að bjóða viðskiptavini okkar velkomna á Glerártorgi,“ segja þau Þorsteinn Marinósson og Ásta Hrönn sem eiga Goblin. Starfsemin hefur verið við Brekkugötu undanfarin ár en flyst nú í rýmra húsnæði á Glerártorgi. -
Lystigarðurinn - Kostar meira að pissa
Gjald fyrir afnot af salernisaðstöðu í Lystigarðinum á Akureyri hækkar 1. maí næstkomandi, út 150 krónum eins og áður var í 300 krónur. Gjaldið verður endurskoðað við gerð gjaldskrár Umhverfis- og mannvirkjaráðs Akureyrarbæjar árlega. -
Bókakynning á Amtsbókasafninu á Akureyri á morgun.
Kristín Guðmundsdóttir höfundur bókarinnar Tólf lyklar verður með kynningu á bókinni á Amtsbókasafninu á morgun og hefst kynningin klukkan 15:30. Bókin er fyrir fólk af erlendum uppruna sem er búið með grunninn í íslensku. -
Barnamenningarhátíð á Akureyri
Barnamenningarhátíð á Akureyri er nú haldin í sjöunda sinn og hefur vaxið ár frá ári. Hátíðin teygir sig yfir allan aprílmánuð með það að markmiði að hvetja börn og fjölskyldur þeirra til að taka virkan þátt í menningarlífi bæjarins sér að kostnaðarlausu.Á dagskrá eru fleiri en 50 viðburðir af ýmsu tagi. -
Sigríður Örvarsdóttir nýr safnstjóri Listasafnsins
Sigríður Örvarsdóttir hefur verið ráðin nýr safnstjóri Listasafnsins á Akureyri. Sigríður er með MA gráðu í safnafræði frá Háskóla Íslands (2018), BA gráðu í textílhönnun frá Seminaret for Kunst og Haandværk í Danmörku (2001), ásamt meistaranámi í prjónahönnun frá Academie Royale des Beux-Arts (2014) og viðbótardiplómu í hagnýtri jafnréttisfræði frá Háskóla Íslands (2009). Auk þess er hún með kennsluréttindi í grunn- og framhaldsskóla (2001). Sigríður hefur starfað sem safnstjóri og forstöðumaður Menningarmiðstöðvar Þingeyinga frá árinu 2022 og veitir sem slík forstöðu Myndlistarsafni Þingeyinga en safneign þess telur um 1.900 verk. Í starfi sínu stýrir hún starfseminni og ber ábyrgð á öllum þáttum rekstrar, allri fjárhags- og verkefnaáætlanagerð, bókhaldi, mannauðsmálum, rekstri fasteigna og faglegu starfi sjö annarra safneigna og fjögurra sýningarstaða. Sigríður starfaði sem verkefnastjóri sýninga hjá Akureyrarbæ sumarið 2021. Í því starfi sinnti hún sýningagerð, rannsóknarvinnu og kynningarmálum. Árin 2019 til 2020 var hún sjálfstætt starfandi ráðgjafi við gerð safnastefnu Akureyrarbæjar. Hún gegndi starfi safnafulltrúa Listasafnsins á Akureyri árið 2012 og árin 2010 og 2012 starfaði hún sem verkefnastjóri samsýninga og ritstjóri safnahandbóka fyrir söfn á Norður- og Norðausturlandi. Árin 2008 til 2012 starfaði hún sem safnkennari við Minjasafnið á Akureyri. Sigríður hefur reynslu af kennslu í list- og hönnunargreinum á öllum skólastigum innan lands sem utan, m.a. hjá Listaháskóla Íslands og Marbella Design Academy á Spáni. Hún hefur tekið þátt í alheimsþingi ICOM, alþjóðaráðs safna og verið fulltrúi þess í Rannsóknarsetri í safnafræðum við Háskóla Íslands. Alls bárust 14 umsóknir um starfið. -
Virðist sem skorti pólitískan vilja
Stjórn og trúnaðarráð Framsýnar kom saman til fundar í gær. Mörg mikilvæg mál voru til umræðu á fundinum m.a. samgöngumál. Ákveðið var að hvetja Vegagerðina og stjórnvöld til að styðja við áætlunarflug um Húsavíkurflugvöll auk þess styðja betur við Loftbrúna sem skiptir íbúa á landsbyggðinni verulega miklu máli. Fjölga þarf ferðum sem menn geta nýtt sér á þessum sérstöku kjörum
Athugasemdir