Ætlar sér að ná enn lengra
Hér skorar Auður úr aukaspyrnu með Völsungi í 3-0 sigri á Tindastóli fyrr í sumar. Mynd/Hafþór Hreiðarsson.
Auður Ósk Kristjánsdóttir, ungur og efnilegur leikmaður Völsungs, var í byrjunarliði U17 ára landsliðs Íslands sem mætti Portúgal í æfingaleik í Anadia í gær. Ísland varð að sætta sig við naumt 1–0 tap, en eina mark leiksins kom úr vítaspyrnu á 89. mínútu.
Auður Ósk var valin í landsliðshópinn sem dvelur við æfingar og keppni í Portúgal dagana 8.–14. september þar sem mótherjar Íslands eru gestgjafarnir auk Wales og Danmörku. Í samtali við Vikublaðið segir hún valið mikinn heiður og mikilvægt skref á þeirri leið að ná enn lengra í knattspyrnunni.
Landsliðsvalið kom Auði nokkuð á óvart, enda er hún á yngra ári í aldursflokknum.
„Ég var ekki mjög bjartsýn á að verða valin því æfingahópurinn var stór og góður. Tilfinningin var því geggjuð þegar ég fékk að vita að ég hefði verið valin í verkefnið,“ segir Auður.
Tækifæri til að bæta sig
Hún er spennt fyrir ferðinni og vonast til að öðlast dýrmæta reynslu, bæta sig sem leikmann og njóta þess að spila fyrir Íslands hönd. Í landsliðinu mun hún leika á miðjunni, þótt hún hafi aðallega verið í framlínunni með Völsungi í sumar.
„Það verður líka smá áskorun að spila á miðjunni, en ég er mjög spennt fyrir verkefninu.“
Dýrmæt reynsla með Völsungi
Auður segir sumarið með Völsungi hafa verið afar skemmtilegt. Unga liðið hafi staðið sig vel, þótt úrslitin hafi ekki alltaf fallið því í vil. Hún finnur sjálf fyrir miklum framförum, ekki síst þegar kemur að sjálfstraustinu.
„Ég þori betur að vera með boltann og tek betri ákvarðanir með hann,“ segir hún.
Ekki margar dauðar stundir
Metnaður Auðar einskorðast ekki við fótboltavöllinn því hún leikur einnig með meistaraflokki Völsungs í blaki. Það getur því verið krefjandi að samræma íþróttirnar og námið en hún er í 10. bekk Borgarhólsskóla.
„Það getur stundum verið krefjandi og kannski sérstaklega þegar blakæfingarnar byrja hjá mér því ég er líka í meistaraflokki í blaki. Ég nýti frítímann mest í að vera með vinum, fjölskyldu, fara á krossara og vera í sveitinni,“ segir Auður og bætir við að hún ætli sér að ná langt á íþróttasviðinu.
„Stærsti draumurinn er að ná eins langt og mögulegt er í fótboltanum og leika einn daginn með A-landsliði Íslands,“ segir Auður.
Að lokum á Auður einföld en áhrifarík ráð til yngri Völsungsstúlkna sem vilja feta sömu leið:
„Hafið trú á ykkur, njótið þess að spila og gefist aldrei upp.“
Nýjast
-
Hrísey Enn beðið eftir sparkvelli
Enn er beðið eftir því að sparkvöllur rísi í Hrísey. Hverfisráð Hríseyjar hefur lýst yfir vonbrigðum yfir því að ekki var farið af stað með gerð sparkvallar í eynni á leiðnum sumri. Ítrekar ráðið að mikilvægt sé að sparkvöllur í eyjunni verði á fjárhagsáætlun næsta árs. -
AkureyrarAkademían fagnar 20 ára afmæli
AkureyrarAkademían fagnar 20 ára afmæli sínu á þessu ári og af því tilefni var gefin út ný skýrsla þar sem stiklað er á stóru varðandi starfseminni á árunum 2021–2026. Markmiðið er að vekja athygli á fjölbreyttu fræða- og menningarstarfi á svæðinu. -
Aðalgeir fagnaði níræðisafmælinu á hvíta tjaldinu
Húsfyllir var í kvikmyndaklúbbnum Fjalakettinum á Húsavík á fimmtudagskvöld þegar tvær nýjar heimildarmyndir Stefáns Jóns Hafstein og Óskars Páls Sveinssonar voru frumsýndar. Aðalgeir Egilsson á Mánárbakka, aðalpersóna annarrar myndarinnar, varð níræður sama dag og var komið á óvart með óvenjulegri ferð á sýninguna. -
Ætlar sér að ná enn lengra
Auður Ósk Kristjánsdóttir, ungur og efnilegur leikmaður Völsungs, var í byrjunarliði U17 ára landsliðs Íslands sem mætti Portúgal í æfingaleik í Anadia í gær. -
Söngurinn ómaði um allt þorpið
Kirkjukór Húsavíkur bauð Raufarhafnarbúum upp á óvenjulega söngstund í Tönkunum á Raufarhöfn í gær -
NorðurOrg haldið í Hrafnagilsskóla
Forkeppni Söngkeppni Samfés á Norðurlandi fer fram í íþróttahúsi Hrafnagilsskóla. Sveitarstjórn fagnar því að viðburður af þessari stærðargráðu fari fram í Eyjafjarðarsveit. -
„Langódýrast að æfa handbolta á Akureyri“
Áhugaverð frétt sem ég las með þessari fyrirsögn „Langódýrast að æfa handbolta á Akureyri.“ Það er svo margt sem stenst ekki við þessa fyrirsögn því það er alls ekki ódýrast að æfa handbolta á Akureyri… Jú kannski eru sjálf æfingagjöldin lægst á Akureyri en þau eru bara brotabrot af kostnaðinum sem fylgir því að æfa handbolta. Allir flokkar frá 7. flokki og upp úr fara á mót og þar hrúgast inn kostnaðurinn sem gerir það að verkum að ég myndi frekar segja „langdýrast að æfa handbolta á Akureyri“. -
Gamla Þinghúsið í Eyjafjarðarsveit Hugmyndaþing um framtíðarnotkun
Sveitarstjórn Eyjafjarðarsveitar hefur samþykkt að efna til hugmyndaþing um framtíð reitsins þar sem gamla Þinghúsið stendur í Hrafnagilshverfi. Siðast var starfandi leikskóli í húsinu. -
Möl og sandur 80 ára: Starfsemin komin á nýjan stað
Möl og sandur fagnaði fyrr á árinu 80 ára afmæli. Starfsemi fyrirtækisins sem lengst af var við Súluveg hefur verið flutt að Sjafnarnesi. Gestum er boðið að kynna sér starfsemina á morgun, laugardag.
