Þankar gamals Eyrarpúka
Ein af mínum fyrstu endurminningum tengist umferðinni frá Akureyri til Reykjavíkur. Löngum stóð ég við rimlana á hliðinu við Brekkugötu 29 og horfði yfir götuna í austur til að fylgjast með bílunum sem þar fóru framhjá.
Á þeim tíma var þetta ekki einhver venjuleg gata í bænum heldur meginleiðin frá miðbæ Akureyrar suður til höfuðborgarsvæðisins. Þarna lá meðal annars leið rútubílanna um eftir að hafa tekið farþega sína og hafurtask þeirra við BSA-stöðina við Ráðhústorg. Síðan var ekið upp á Brekkugötuna í norðurátt; þar með hófst mikið ferðalag Suður. Þá bar vel í veiði fyrir lítinn snáða sem heyrði erfiðisstunur rútunnar strax neðan frá Oddeyrargötu og svo enn betur eftir því sem hún nálgaðist.
Þegar rútan fór svo fram hjá húsinu okkar var ég jafnan búinn að reka út báðar hendur milli hliðarrimlanna og veifaði ákaft til farþeganna. Stundum tóku þeir eftir þessum handasveiflum mínum og veifuðu glaðlega á móti mér til óblandinnar ánægju. Rúturnar fóru síðan áfram norður og yfir Glerárbrúna fyrir neðan virkjunina og þaðan Suður sem fyrir mér var eitthvað óendalega langt í burtu og allt sem þar var og allt sem þar gerðist var álíka fjarstæðukennt eins og líf á öðrum hnöttum.
Ég stóð áfram þögull við hliðið, horfði í austur þar sem löggustöðin ógurlega blasti við og Eiðsvöllurinn með bragga sína og forarvilpur sem síðar breyttist í skrúðgarð.
Vaðlaheiðin tók svo við og þarnæst himinhvolfið sjálft þar sem sagt var að Guð og góða fólkið byggi á efri hæðum og heitir Himnaríki. Vonandi allt í bærilegu standi á þeim bæ og því ekki ástæða til að hafa áhyggjur af fólkinu sem þar á lögheimili. Mér var meira í hug pabbi minn sem var löngum stundum enn neðar og norðar á Eyrinni að byggja okkur nýtt og stórt hús við götu sem kennd er við Rán konu Ægis og heitir Ránargata. Þarna vann hann þindarlaust í öllum sínum frístundum og lagði nótt við dag. Hann sagði okkur svo fréttir yfir kvöldmatnum hvernig gengi.
Einn daginn lauk hann við að handgrafa niður á fast, síðan voru undirstöður steyptar og svo áfram þar til eitt kvöldið að hann sagði að styttist í að hann færi að setja upp eldhúsinnréttingu. Eftir það væri skammt í málningarvinnuna og lokafrágang. Ég hlustaði opinmynntur og trúði vart að fljótt kæmi að því að við myndum flytja í höllina niður á Eyri.
Sannarlega var nýja húsið okkar höll miðað við litlu og notalegu kjallaraíbúðina í Brekkugötunni. Þar höfðum við búið góðu lífi og deilt í sátt og samlyndi klósetti og þvottahúsi með öðrum íbúum hússins. Engar erjur í númer 29 enda vorum við svo heppin að þar voru með okkur fjölskyldur Finnboga í Reykhúsinu og Dúdda einhenta sem allt var mikið sómafólk.
Svo rann stundin upp. Á hallandi sumri árið 1947 var allt okkar hafurtask sett upp á stóran vörubíl og okkur Árna bróður tyllt ofaná allt saman og ekið rakleitt niður í Ránargötu 16. Frá þeim degi varð ykkar einlægur Eyrarpúki og er enn!
Ingólfur Sverrisson
Nýjast
-
Mikil aukning á hótunum og beitingu á ofbeldi gagnvart lögreglu á Norðurlandi eystra.
,,Það er ljóst að það að hér er um grafalvarlega stöðu að ræða. Svar dómsmálaráðherra við fyrirspurninni sýnir okkur að þróunin á starfssvæði lögreglustjórans á Norðurlandi eystra er með þeim hætti að það er nauðsynlegt að bregðast við. Það er mikilvægt að greina þessa stöðu. Hver er ástæðan fyrir þessari miklu fjölgun á brotum gegn lögreglumönnum og opinberum starfsmönnum á þessu landsvæði það er Norðurlandi eystra“ segir Njáll Trausti Friðbertsson þingmaður og oddviti Sjálfstæðisflokksins í Norðausturkjördæmi. -
Boðskapur frá forsetaframbjóðanda
Það hafa kannski margir klórað sér í hausnum yfir þátttöku minni í forsetakosningunum þar sem ég stíg nú eins og landkönnuður á nýjum slóðum og tek með mér ný og fersk sjónarhorn, smá húmor og djúpstæða trú á mátt hins ómögulega. Ég er eflaust ekki hinn hefðbundni frambjóðandi en ég er án efa ferskur blær inn í flokk frambjóðenda og það er einmitt það sem gerir þetta stóra verkefni svo skemmtilegt og hvetjandi. -
Líf að færast í Holtahverfi
Líf er að færast í nýtt Holtahverfi norður, svæði á milli Krossanesbrautar og smábátahafnar í Sandgerðisbót. Húsin rísa hvert á fætur öðru og fyrstu íbúarnir hafa komið sér fyrir í nýjum íbúðum. Enn er eitthvað eftir af lóðum og er Akureyrarbær um þessar mundir að auglýsa par- og raðhúsalóðir lausar til úthlutunar, en m.a. eru nokkrar lóðir lausar við Álfaholt, Hulduholt og Þursaholt. -
Frú Ragnheiður - Færri í nálaskiptaþjónustu en fleiri komu í bílinn
Fjöldi einstaklinga sem leitaði til Frú Ragnheiðar árið 2023 var 51 í 584 heimsóknum en árið 2022 voru einstaklingarnir 46 í 412 heimsóknum. Af þessum fjölda voru 10 viðbragðsaðilar og einstaklingar sem leituðu til verkefnisins til að fá Nyxoid nefúðann. Ekki er því um fjölgun skjólstæðinga í nálaskiptaþjónustu að ræða en þeim fækkaði um fimm milli ára, úr 46 í 41. -
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á. -
Goblin opnar á Glerártorgi
„Eins leitt og okkur þykir að yfirgefa fallega miðbæinn okkar, erum við afar spennt fyrir þessum flutningum og hlökkum til að bjóða viðskiptavini okkar velkomna á Glerártorgi,“ segja þau Þorsteinn Marinósson og Ásta Hrönn sem eiga Goblin. Starfsemin hefur verið við Brekkugötu undanfarin ár en flyst nú í rýmra húsnæði á Glerártorgi. -
Lystigarðurinn - Kostar meira að pissa
Gjald fyrir afnot af salernisaðstöðu í Lystigarðinum á Akureyri hækkar 1. maí næstkomandi, út 150 krónum eins og áður var í 300 krónur. Gjaldið verður endurskoðað við gerð gjaldskrár Umhverfis- og mannvirkjaráðs Akureyrarbæjar árlega.
Athugasemdir