„Það sem skiptir mestu máli er að vanda sig í því sem maður tekur sér fyrir hendur“
Jón Arnór Pétursson er aðeins 14 ára gamall en þrátt fyrir ungan aldur á hann nú þegar að baki glæstan feril sem leikari og skemmtikraftur.
Jón Arnór er þessa dagana að stíga sín fyrstu skref í útgáfu á eigin tónlist ásamt Baldri Birni Arnórssyni vini sínum. Þeir senda frá sér tónlist og koma fram undir listamannanafninu „Jón Arnór & Baldur“. Fyrsta lagið þeirra „Alla leið“ kom út 1. júní 2021. Strákarnir eru komnir í stúdíó með annað lagið sitt og von er á fleirum á næstu mánuðum.
Jón Arnór steig fyrst fram á sjónarsviðið í fyrstu þáttaröð af Ísland Got Talent. Óhætt er að segja að hann hafi fangað hug og hjörtu landsmanna með töfrabrögðum sínum og töfrandi sviðsframkomu. Hann fór alla leið í úrslit keppninnar og hafnaði í 2. Sæti. Í framhaldinu fylgdu töfrasýningar víðsvegar um land s.s. á bæjarhátíðum, árshátíðum og fjölskylduskemmtunum. Í júlí 2016 fór Jón Arnór til Þýskalands þar sem hann sýndi töfrabrögð í hæfileikaþættinum SuperKids sem sýndur var í Þýska ríkissjónvarpinu SAT1. „Segja má að Talent ævintýrið hafi rúllað af stað bolta sem hefur ekki stöðvast síðan og skapað ýmis tækifæri,“ segir Pétur Veigar Pétursson, faðir Jóns Arnórs í spjalli við Vikublaðið.
Jón Arnór hefur síðan lagt leiklistina fyrir sig. Hann fór með hlutverk Magga í fyrstu þáttarröð af Ófærð í framleiðslu Baltasars Kormáks. Hann hefur einnig leikið í kvikmyndum og þáttum s.s. Víti í Vestmannaeyjum og Loforði, ásamt því að hafa leikið í auglýsingum og unnið við talsetningar. Í vetur var Jón Arnór í tökum á söng- og dansleikjamyndinni Abbababb sem sýnd verður í kvikmyndahúsum næsta vetur.
Leikhúsið hefur einnig fengið að njóta hæfileika Jóns Arnórs en hann fór með hlutverk Níelsar í söngleiknum Matthildi sem sýndur var á stóra sviði Borgarleikhússins. Nú fer hann með hlutverk Tommí í uppfærslu Þjóðleikhússins á Kardemommubænum.
Þá hefur Jón Arnór verið í Söngskóla Maríu Bjarkar og í Sönglist í Borgarleikhúsinu ásamt því að hafa tekið þátt í ýmsum verkefnum fyrir KrakkaRúv. Jón Arnór er Norðlendingur vikunnar.
Hvaðan ertu?
Hef alltaf búið í Reykjavík. Pabbi er frá Húsavík og þar búa Pétur afi og Solla amma. Mamma er úr Stykkishólmi.
Fjölskylduhagir?
Bý með pabba, mömmu og yngri bróður mínum, Patrik Nökkva í Grafarvoginum í Reykjavík. Aron eldri bróðir minn er fluttur að heiman.
Helstu áhugamál?
Leiklist, tónlist og íþróttir.
Helstu fyrirmyndir?
Allir þeir sem eru heiðarlegir og þora að láta drauma sína rætast.
Hvaða tónlistarmaður/hljómsveit er í mestu uppáhaldi hjá þér?
Queen, Jón Jónsson, Ed Sheeran, Alpatross
Hvernig er fullkomin helgi?
Að fá að stíga á svið, spila fótboltaleik og vera með fjölskyldu og vinum.
Hvaða lag kemur þér í gírinn?
Mörg lög sem koma mér í gírinn. Dettur fyrst í hug Fireball. Sígilt stemningslag.
Uppáhaldssjónvarpsefni?
Friends og fótbolti
Stundarðu íþróttir?
Já, spila fótbolta með Fjölni
Uppáhaldsmatur?
Lambalæri með villisveppasósu
Hvar sérðu þig eftir 10 ár?
Búinn að klára nám, og enn að vinna í eigin tónlist
Hvernig er dæmigerður dagur hjá þér?
Það eru fáir dagar eins. Föstu liðirnir eru skóli, fótboltaæfingar og gítarspil. Í vetur hafa svo bæst við leikæfingar/sýningar, kvikmyndatökur o.fl. Alltaf nóg að gera.
Hvaða áttu helst eftir ógert?
Þar sem nánast allt lífið er framundan á ég margt ógert. Það sem skiptir mestu máli er að vanda sig í því sem maður tekur sér fyrir hendur, hvað sem það verður.
Uppáhalds borg sem þú hefur heimsótt?
Manchester. Fórum á United leik í Meistaradeildinni og skoðunarferð um Old Trafford. Var líka gaman að fara með fjölskyldunni í leikhúsferð til London og fara á sýningu í Camebridge Theatre.
Hvað er helst á döfinni um helgina?
Útskriftarveisla hjá Aroni stóra bróður sem er að útskrifast úr Háskólanum í Reykjavík, halda áfram að vinna í næsta lagi, vera slakur og njóta lífsins.
Nýjast
-
Götuhornið - Gamlingi á villigötum
Mig hefur lengi langað til að senda bréf til Götuhornsins. Mér hefur legið ýmislegt á hjarta og fannst það eiga fullt erindi til lesenda. Þetta hefur þó ekki getað orðið fyrr en nú vegna vandræða sem ég lenti í og þurfti að greiða úr. -
Fyrsta alþjóðlega hótelið á landsbyggðinni mun opna á Akureyri árið 2025
Fyrirhugað er að fyrsta alþjóðlega hótelið á landsbyggðinni mun opna á Akureyri 2025 undir merkjum Curio Collection by Hilton. Framkvæmdin verður í samvinnu við Bohemian Hotels. „Bohemian Hotels ehf., í samstarfi við Hilton, tilkynnir með stolti undirritun tímamótasamnings um byggingu og rekstur tveggja hágæða hótela á Íslandi. Þessir samningar marka ákveðin tímamót í hótelgeiranum á Íslandi og færa Akureyri gistingu og þægindi á heimsmælikvarða til jafns við Reykjavík" segir i tilkynningu frá Bohemian Hotels. -
Kuldatíð seinkar vorverkum
Talsverðar líkur er á að kal verði í túnum í Svarfaðardal en sennilega sleppa önnur svæði í héraðinu betur þó ekki sé það fullvíst. Kuldatíð seinkar vorverkum bænda og gæti í versta falli orðið til þess að spretta fari seinna af stað en vanalega, snjór er yfir öllum túnum og því ekki hægt að bera á. -
Goblin opnar á Glerártorgi
„Eins leitt og okkur þykir að yfirgefa fallega miðbæinn okkar, erum við afar spennt fyrir þessum flutningum og hlökkum til að bjóða viðskiptavini okkar velkomna á Glerártorgi,“ segja þau Þorsteinn Marinósson og Ásta Hrönn sem eiga Goblin. Starfsemin hefur verið við Brekkugötu undanfarin ár en flyst nú í rýmra húsnæði á Glerártorgi. -
Lystigarðurinn - Kostar meira að pissa
Gjald fyrir afnot af salernisaðstöðu í Lystigarðinum á Akureyri hækkar 1. maí næstkomandi, út 150 krónum eins og áður var í 300 krónur. Gjaldið verður endurskoðað við gerð gjaldskrár Umhverfis- og mannvirkjaráðs Akureyrarbæjar árlega. -
Bókakynning á Amtsbókasafninu á Akureyri á morgun.
Kristín Guðmundsdóttir höfundur bókarinnar Tólf lyklar verður með kynningu á bókinni á Amtsbókasafninu á morgun og hefst kynningin klukkan 15:30. Bókin er fyrir fólk af erlendum uppruna sem er búið með grunninn í íslensku. -
Barnamenningarhátíð á Akureyri
Barnamenningarhátíð á Akureyri er nú haldin í sjöunda sinn og hefur vaxið ár frá ári. Hátíðin teygir sig yfir allan aprílmánuð með það að markmiði að hvetja börn og fjölskyldur þeirra til að taka virkan þátt í menningarlífi bæjarins sér að kostnaðarlausu.Á dagskrá eru fleiri en 50 viðburðir af ýmsu tagi. -
Sigríður Örvarsdóttir nýr safnstjóri Listasafnsins
Sigríður Örvarsdóttir hefur verið ráðin nýr safnstjóri Listasafnsins á Akureyri. Sigríður er með MA gráðu í safnafræði frá Háskóla Íslands (2018), BA gráðu í textílhönnun frá Seminaret for Kunst og Haandværk í Danmörku (2001), ásamt meistaranámi í prjónahönnun frá Academie Royale des Beux-Arts (2014) og viðbótardiplómu í hagnýtri jafnréttisfræði frá Háskóla Íslands (2009). Auk þess er hún með kennsluréttindi í grunn- og framhaldsskóla (2001). Sigríður hefur starfað sem safnstjóri og forstöðumaður Menningarmiðstöðvar Þingeyinga frá árinu 2022 og veitir sem slík forstöðu Myndlistarsafni Þingeyinga en safneign þess telur um 1.900 verk. Í starfi sínu stýrir hún starfseminni og ber ábyrgð á öllum þáttum rekstrar, allri fjárhags- og verkefnaáætlanagerð, bókhaldi, mannauðsmálum, rekstri fasteigna og faglegu starfi sjö annarra safneigna og fjögurra sýningarstaða. Sigríður starfaði sem verkefnastjóri sýninga hjá Akureyrarbæ sumarið 2021. Í því starfi sinnti hún sýningagerð, rannsóknarvinnu og kynningarmálum. Árin 2019 til 2020 var hún sjálfstætt starfandi ráðgjafi við gerð safnastefnu Akureyrarbæjar. Hún gegndi starfi safnafulltrúa Listasafnsins á Akureyri árið 2012 og árin 2010 og 2012 starfaði hún sem verkefnastjóri samsýninga og ritstjóri safnahandbóka fyrir söfn á Norður- og Norðausturlandi. Árin 2008 til 2012 starfaði hún sem safnkennari við Minjasafnið á Akureyri. Sigríður hefur reynslu af kennslu í list- og hönnunargreinum á öllum skólastigum innan lands sem utan, m.a. hjá Listaháskóla Íslands og Marbella Design Academy á Spáni. Hún hefur tekið þátt í alheimsþingi ICOM, alþjóðaráðs safna og verið fulltrúi þess í Rannsóknarsetri í safnafræðum við Háskóla Íslands. Alls bárust 14 umsóknir um starfið. -
Virðist sem skorti pólitískan vilja
Stjórn og trúnaðarráð Framsýnar kom saman til fundar í gær. Mörg mikilvæg mál voru til umræðu á fundinum m.a. samgöngumál. Ákveðið var að hvetja Vegagerðina og stjórnvöld til að styðja við áætlunarflug um Húsavíkurflugvöll auk þess styðja betur við Loftbrúna sem skiptir íbúa á landsbyggðinni verulega miklu máli. Fjölga þarf ferðum sem menn geta nýtt sér á þessum sérstöku kjörum
Athugasemdir