Fjölgun íslenskra gesta og góðar viðtökur við Grösum
Egill Bjarnason ásamt dóttur sinni í nýja gróðurhúsinu í Skúlagarði. Mynd/aðsend.
Sumarið kom ágætlega út í gistingu hjá Hótel Skúlagarði í Kelduhverfi, sem hjónin Egill Bjarnason og Sigrún Björg Aðalgeirsdóttir eiga og reka. Þau tóku við hótelinu fyrir þremur árum og hafa síðan unnið að umfangsmiklum endurbótum og uppbyggingu starfseminnar. Í sumar fjölgaði meðal annars íslenskum ferðamönnum frá fyrra ári, en Egill segir þó greinilegt að samkeppni á gistimarkaði í Þingeyjarsýslum sé að aukast.
Að sögn Egils hafa leiðsögumenn sem fylgjast með verðþróun bent á að góð tilboð hafi verið í boði á gistingu síðustu misseri. Jafnframt virðist ferðamönnum hafa fækkað á sumum vinsælum áfangastöðum. Þar sker Dettifoss sig úr, en samkvæmt teljara Ferðamálastofu fækkaði gestum þar um 19 prósent fyrstu átta mánuði ársins miðað við sama tímabil í fyrra. Fjöldinn við Goðafoss og í Dimmuborgum var hins vegar svipaður milli ára.
Egill telur líklegt að fækkunin við Dettifoss tengist að einhverju leyti færð á Dettifossvegi, sem enn nýtur ekki vetrarþjónustu. Hann segir þróunina undirstrika að nú sé ekki rétti tíminn til að auka skattlagningu á ferðaþjónustuna.
Vilja laða að fleiri gönguhópa
Áhersla Hótels Skúlagarðs hefur verið á að fjölga gestum sem dvelja lengur og nýta sér fjölbreytta afþreyingu á svæðinu. Í sumar gisti þar meðal annars góður hópur bandarískra stangveiðimanna auk gönguhópa sem gengu Gljúfrastíginn frá Dettifossi niður í Ásbyrgi.
„Þetta er einstök gönguleið og í vetur ætlum við að hleypa af stokkunum átaki við að laða að fleiri gönguhópa,“ segir Egill.
Verkefnið nefnist The Canyon Trail á ensku og hlaut myndarlegan styrk úr samkeppnissjóði Evrópusambandsins síðastliðið vor.
Meira líf yfir daginn
Veitingastaðurinn Grös tók til starfa í veitingasal Skúlagarðs í sumar og segir Egill viðtökurnar hafa farið fram úr væntingum.
„Grös hefur fengið alveg ótrúlega ánægjulegar viðtökur. Með veitingarekstrinum er líka miklu meira líf yfir daginn, sem er gaman fyrir heimilislífið á bænum,“ segir hann.
Ein af áherslum Grasa er að nýta hráefni úr héraði og grænmeti úr eigin ræktun. Sumarið var jafnframt fyrsta reynsla fjölskyldunnar af því að starfa sem smábændur með bæði matjurtagarð og gróðurhús.
Egill segir ræktunina hafa verið lærdómsríka. Sumt hafi tekist vel en annað síður, eins og gjarnan vill verða á fyrsta ári. Reynslan verði nýtt til að þróa ræktunina áfram og næsta sumar standi til að auka sérstaklega framleiðslu á því grænmeti sem nýtist best í eldhúsi veitingastaðarins.
Nýjast
-
Umfangsmiklar endurbætur á Lögmannshlíðarkirkju
Lögmannshlíðarkirkja hefur verið tekin í notkun á ný eftir tveggja ára lokun vegna umfangsmikilla viðhalds- og endurbóta. -
Dekurdagar framundan
Dekurdagar verða haldnir á Akureyri dagana 8.–11. október nk. eða frá fimmtudegi til sunnudags. -
Fjölgun íslenskra gesta og góðar viðtökur við Grösum
Sumarið kom ágætlega út í gistingu hjá Hótel Skúlagarði í Kelduhverfi, sem hjónin Egill Bjarnason og Sigrún Björg Aðalgeirsdóttir eiga og reka. -
Gott sumar en breytt mynstur í ferðaþjónustunni
Ferðaþjónustusumarið í Þingeyjarsýslum kom að ýmsu leyti vel út, þótt þróunin hafi ekki verið einsleit. -
Málþing um einhverfu fullorðinna - hvað þarf að breytast?
Á málþinginu verður fjallað um stöðu fullorðins einhverfs fólks, geðheilbrigðisþjónustu og stuðningsúrræði. Sjónum verður beint að faglegri þekkingu, opinberum úttektum og tillögum til úrbóta, auk reynslu einhverfs fólks og aðstandenda. -
Næstu skref tekin í stækkun verknámshúss VMA
Inga Sæland, mennta- og barnamálaráðherra, og Berglind Ósk Guðmundsdóttir, bæjarstjóri Akureyrarbæjar, undirrituðu í dag viljayfirlýsingu um stækkun verknámshúss Verkmenntaskólans á Akureyri (VMA). Með yfirlýsingunni tekur Akureyrarbær að sér umsjón með undirbúningi og framkvæmd verkefnisins. -
Fá 12 mánaða viðbótarfest til að hefja framkvæmdir við Naustagötu
Meirihluti skipulagsráðs Akureyrarbæjar hefur samþykkt að framlengja frest N13 fasteignaþróun ehf til framkvæmda við lóð númer 13 við Naustagötu. Um er að ræða lóð fyrir verslun- og þjónustu sem fyrst var auglýst árið 2017 en ekki hefur enn tekist að laða að starfsemi í væntanlegt hús. Að mati skipulagsráðs er mikilvægt að á lóðinni byggist upp starfsemi sem nýtist hverfinu en undirbúningur þarfnist tímafreks undirbúnings. -
Hvers konar Ísland viljum við byggja?
Dómsmálaráðherra hefur nú sett breytingar á kosningakerfinu á dagskrá. Tillögur starfshóps ráðherra, sem birtar voru í gær, miða að því að hvert atkvæði vegi sem jafnast, óháð búsetu. Það er mikilvægt lýðræðislegt markmið og ég ber virðingu fyrir því fræðafólki sem sat í starfshópnum. En þegar við breytum kosningakerfinu erum við ekki aðeins að ákveða hvernig atkvæði eru talin. Við erum líka að móta hvernig ólíkir landshlutar tengjast löggjafarvaldinu og hvernig pólitískt vald dreifist um landið og um leið þá hvernig ólíkir landshlutar upplifa inn hlut í stjórnarháttum og stjórnsýslu. -
Samningur milli Reita og FSRE um hjúkrunarheimili á Akureyri
Framkvæmdasýslan – Ríkiseignir (FSRE) hefur samþykkt tilboð Reita í uppbyggingu hjúkrunarheimilis á Akureyri og aðilarnir gert með sér samning um verkefnið. Tilkynnt var í júní fyrr á þessu ári að FSRE hefði metið tilboð Reita hagstæðast með tilliti til verðs og afhendingartíma. Hjúkrunarheimilið verður byggt upp við Þursaholt 6, verður um 9.100 fermetrar að stærð og mun rúma 140 íbúa.
