Ásthildur á Hringborði Norðurslóða

sthildur Sturludóttir og Þorsteinn Gunnarsson á Arctic Circle. mynd/akureyri.is
sthildur Sturludóttir og Þorsteinn Gunnarsson á Arctic Circle. mynd/akureyri.is

Bæjarstjórinn á Akureyri, Ásthildur Sturludóttir, sækir Heimskaut Norðurslóða eða Arctic Circle í Reykjavík en þar er fjallað um framtíð norðurheimskautsins í breyttri veröld hvar áhrifa loftlagsbreytinga gætir sífellt meira.

Ásthildur hélt í gærkvöldi stutta tölu á sérstakri móttöku þar sem Þorsteinn Gunnarsson fyrrverandi rektor Háskólans á Akureyri var heiðraður fyrir störf sín á sviði Norðurslóðamála. Meðal annarra frummælenda var Ólafur Ragnar Grímsson fyrrverandi forseti Íslands.

Í kvöld verður haldin opin málstofa um sjálfbæra þróun og stöðu ungmenna á Norðurslóðum en þar talar Ásthildur um þá þróun sem orðið hefur í búsetu yngra fólks í hinum dreifðari byggðum Íslands og hvernig stafrænar lausnir gætu verið lykillinn að því að búseta allra aldurshópa haldist sem víðast.

Á morgun, laugardag, verða síðan haldnar pallborðsumræður um það hvernig sveitarfélög hafa brugðist við þeim vanda sem Covid-19 hefur leitt yfir okkur og hvað megi af þeim viðbrögðum læra. Þessi málstofa er á vegum Samtaka bæjar- og sveitarstjóra á Norðurslóðum, Arctic Mayors' Forum, þar sem Akureyrarbær gegnir formennsku og Ásthildur Sturludóttir stýrir umræðunum.

Arctic Circle er vettvangur alþjóðlegrar samvinnu á sviði Norðurslóðamála, opinn lýðræðislegur vettvangur með þátttöku stjórnvalda, stofnana, fyrirtækja, háskóla, hugsuða, umhverfissamtaka, frumbyggja og annarra sem láta sig framtíð jarðar varða.


Nýjast