Laugardagur á Listasafninu á Akureyri
Þóra Sigurðardóttir verður í listamannaspjalli á Listasafninu á Akureyri n.k. laugardag 28 júni.
Laugardaginn 28. júní verður mikið um að vera á Listasafninu á Akureyri þar sem boðið verður upp á listamannaspjall við Þóru Sigurðardóttur kl. 15 undir stjórn Ann-Sofie N. Gremaud, en klukkan 14 sýnir Katrin Hahner gjörning í tengslum við þátttöku hennar í samsýningu norðlenskra listamanna, Mitt rými.
Sýning Þóru Sigurðardóttur var opnuð 17. maí síðastliðinn og hefur hlotið afar góðar viðtökur, en listgagnrýnandi Morgunblaðsins gaf sýningunni til að mynda hæstu einkunn. Á sýningu Þóru má sjá ný verk sem eiga rætur sínar í áratugalöngum áhuga hennar á efni, rými og teikningu. Líkaminn, næmi hans, efni, staða og hreyfing eru mikilvæg viðfangsefni listakonunnar. Í verkunum beinist athyglin að náttúruumhverfi lífverunnar: kalki, kolum, málmum, lífrænum himnum, trefjum og úrgangi.
Þóra Sigurðardóttir fæddist og ólst upp á Akureyri. Hún lauk námi frá Myndlista- og handíðaskóla Íslands 1981 og framhaldsnámi við Det Jyske Kunstakademi í Danmörku 1991. Hún hefur sýnt víða á Íslandi og erlendis og m.a. hélt hún einkasýningu í Listasafni Íslands 2024. Verk Þóru eru í eigu opinberra safna og einkasafna hérlendis og erlendis, s.s. Listasafns Íslands, Nýlistasafnsins, Listasafns Reykjavíkur, BBK Print Collection í Berlín og Metropolitan Museum of Art Paper/Print Collection í New York.
Listasafnið á Akureyri auglýsti fyrr á árinu eftir umsóknum um þátttöku í samsýningu norðlenskra listamanna og er gjörningur Katrin Hahner framinn í tengslum við þátttöku hennar í sýningunni. Alls voru verk eftir sautján listamenn valin á sýninguna og er henni ætlað að gefa innsýn í þá fjölbreyttu flóru myndlistar sem tengist Norðurlandi og vekja umræður um stöðu norðlenskra listamanna og myndlistar.
Þátttakendur eru Arthur Ragnarsson, Brynja Baldursdóttir, Egill Logi Jónasson, Gíslína Dögg Bjarkadóttir, Hekla Björt Helgadóttir, Helga Ósk Einarsdóttir, Hlynur Hallsson, Inga Lísa Middleton, Íris Eggertsdóttir, Karl Guðmundsson | Rósa Júlíusdóttir, Katrin Hahner, Kristján Helgason, Rósa Sigrún Jónsdóttir, Sigurður Mar Halldórsson, Sunna Svavarsdóttir og Tereza Kocianova.
Katrin Hahner er mynd- og hljóðlistamaður sem býr bæði á Íslandi og í Þýskalandi. Hún lauk MA gráðu frá Staatliche Akademie der bildenden Künste Stuttgart 2006 og Kunsthochschule Berlin Weissensse 2008.
Katrin Hahner
Innsetning Hahner inniheldur tjaldstrúktúr sem bíður upp á vernd og nánd, hringlaga verk úr handgerðum leirmunum og vídeó-skrásetningu af sorgar-ritúali, sem virðingarvottur við nýtt tilverustig.
Titill vídeóverksins Hypercycle Jazz vísar til kenningar Manfred Eigens um hypercycle; hugmyndar um sjálfbærar hringrásir samtengdra ferla, þar sem hver þeirra virkar hvetjandi á þá næstu. Þessari jákvæðu hringrás endurgjafar mætti líkja við kærleika til manneskju sem er látin. Að tengja þetta fyrirbæri við jazz-spuna gefur til kynna leið til að skilja framtíðarhegðun og ólínulegt hreyfiafl, sem og órofið samhengi forfeðranna og skyldleika við allar lifandi verur.
Nýjast
-
Laugardagur á Listasafninu á Akureyri
Laugardaginn 28. júní verður mikið um að vera á Listasafninu á Akureyri þar sem boðið verður upp á listamannaspjall við Þóru Sigurðardóttur kl. 15 undir stjórn Ann-Sofie N. Gremaud, en klukkan 14 sýnir Katrin Hahner gjörning í tengslum við þátttöku hennar í samsýningu norðlenskra listamanna, Mitt rými. -
Ertu ekki örugglega að fylgjast með?
Rauði krossinn á Íslandi hefur hleypt af stokkunum fræðslu- og forvarnarátaki um öryggi barna í sundi. Átakið er unnið í samstarfi við Reykjavíkurborg og Samtök forstöðumanna sundstaða á Íslandi (SFSÍ) og er því beint að öllu landinu. Árlega drukkna yfir 300 þúsund manns í heiminum eða um 30 manneskjur á hverjum einasta klukkutíma. Á Íslandi drukknuðu 68 manns á tíu ára tímabili frá 2013-2023. „Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. -
,,Þessi umbótavinna hefur verið mikil og krefjandi"
Í kjölfar ítarlegrar úttektar Embættis landlæknis á geðþjónustu Sjúkrahússins á Akureyri (SAk) hefur verið ráðist í umfangsmiklar umbætur til að efla þjónustuna og bæta aðstæður fyrir bæði sjúklinga og starfsfólk. Markvisst hefur verið unnið að úrbótaáætlun með það að leiðarljósi að styrkja geðheilbrigðisþjónustu SAk. -
Akureyrarbær og Skátafélagið Klakkur undirrita viljayfirlýsingu
Akureyrarbær og Skátafélagið Klakkur hafa undirritað viljayfirlýsingu um eflingu samstarfs, framtíðaruppbyggingu og gerð heildstæðs rekstrarsamnings um starfsemi félagsins. -
Listasumar hefst á morgun
Hátíðin hefst með Opnu húsi í Kaktus, þar sem haldið verður upp á Jónsmessu með tilraunakenndu og opnu DJ – VJ kvöldi, og Opnu húsi í Deiglunni -
Krílabær verður áfram í rekstri
Sveitarstjórn Þingeyjarsveitar hefur tekið tillit til skoðana sem fram komu í athugasemdum sem sendar voru í kjölfar þess að til skoðunar var að loka leikskóladeildinni Krílabæ. -
SEIGLAN MIKILVÆGA
Eitt af því sem hefur reynst okkur Íslendingum vel í gegnum aldirnar, og í raun haldið lífi í landanum þegar verst áraði, er seiglan. Seigla í daglegu lífi er því eitt af því mikilvægasta sem við getum kennt börnum okkar. -
Að færa hinseginleika heim
„Ég er og verð alltaf Öxfirðingur,“ segir Aðalbjörn Jóhannsson með bros á vör. Hann er stýri Ergi, félags hinsegin stúdenta á Norðurlandi og lýsir sér sem sveitamanni, bókaormi, sérlegum áhugamanni um fólk og fylgist með kosningasjónvarpi af sömu innlifun og önnur fylgjast með Eurovision. Með rætur í Norður- og Suður-Þingeyjarsýslu, tengingu við Akureyri frá unglingsárum og smá Norðmann í blóðinu, hefur Aðalbjörn komið sér fyrir í BA námi í félagsvísindum við Háskólann á Akureyri. Hann viðurkennir að leiðin hafi upphaflega legið í kennaranám, en í dag blómstrar áhugi hans á fólki og samfélagsmálum í háskólanum þar sem samheldni og stuðningur skína í gegn. -
Nýr björgunarbátur hjá Björgunarsveitinni Garðari
Efna til nafnasamkeppni um nafnið á bátnum
