Fólk greiðir hundruð þúsunda í dvalarkostnað vegna heilbrigðisþjónustu
Aðalfundur Krabbameinsfélags Íslands skorar á heilbrigðisráðherra að endurskoða greiðsluþátttöku vegna sjúkradvalar innanlands
Aðalfundur Krabbameinsfélagsins skorar á heilbrigðisráðherra að endurskoða greiðsluþátttöku vegna sjúkradvalar innanlands og tryggja, til dæmis með greiðsluþaki, að kostnaður sjúklings og aðstandenda vegna nauðsynlegrar dvalar á sjúkrahóteli sligi ekki fólk af landsbyggðinni.
Dæmi eru um að einstaklingar hafi þurft að greiða yfir 500.000 kr. á ári fyrir dvöl á sjúkrahóteli.
Ýmsar aðgerðir hafa verið innleiddar til að draga úr greiðslubyrði þeirra sem þurfa á mikilli heilbrigðisþjónustu að halda. Má þar t.d. nefna greiðsluþak fyrir heilbrigðisþjónustu og lyf, ásamt þátttöku Sjúkratrygginga í ferðakostnaði. Margir þurfa hins vegar að dvelja langdvölum fjarri heimili sínu með nánum aðstandanda vegna lífsnauðsynlegra lyfja- og/eða geislameðferða og kostnaður fyrir slíkt safnast hratt saman þegar sólarhringsdvöl kostar allt að 8.750 kr.
Á nýafstöðnum aðalfundi Krabbameinsfélagsins var samþykkt ályktun þar sem skorað er á heilbrigðisráðherra að endurskoða fyrirkomulag varðandi greiðsluþátttöku vegna sjúkradvalar innanlands. Í ályktuninni er lagt til greiðsluþak á dvalarkostnað, sambærilegt því sem þekkist nú þegar varðandi greiðslur fyrir heilbrigðisþjónustu og lyf.
Hér fyrir neðan má lesa ályktunina í heild sinni:
Jafnt aðgengi að krabbameinsþjónustu óháð búsetu
Greiðsluþak á dvalarkostnað vegna heilbrigðisþjónustu
Aðalfundur Krabbameinsfélagsins haldinn þann 24. maí 2025 skorar á heilbrigðisráðherra að endurskoða greiðsluþátttöku vegna sjúkradvalar innanlands og tryggja að kostnaður sjúklings og aðstandenda vegna nauðsynlegrar dvalar á sjúkrahóteli sligi ekki fólk af landsbyggðinni. Slíkt mætti til dæmis útfæra með greiðsluþaki, líkt og þekkist nú þegar varðandi greiðslur fyrir heilbrigðisþjónustu og lyf.
Með þessu væri stigið mikilvægt framfaraskref í átt að auknum jöfnuði óháð búsetu.
Þak á greiðslur fyrir heilbrigðisþjónustu og lyf og greiðsluþátttaka Sjúkratrygginga í ferðakostnaði tryggja ákveðinn jöfnuð þegar kemur að greiningu og meðferð krabbameina. Greiðsluþak fyrir heilbrigðisþjónustu er 35.824 kr. og almennt greiðsluþak lyfja er 62.000 kr. að hámarki á 12 mánaða tímabili.
Jöfnuði er hins vegar ekki náð þegar horft er til búsetu.
Krabbameinslyfjameðferðir fyrir íbúa af landsbyggðinni fara að stórum hluta fram á Landspítala. Þar eru sértækar, lífsnauðsynlegar meðferðir í boði sem ekki er hægt að veita alls staðar á landinu. Hluti fólks dvelur í íbúðum Krabbameinsfélagsins en margir nýta þjónustu sjúkrahótelsins. Flestir eru sem betur fer í þeirri stöðu að geta haft með sér aðstandanda en stuðningur þeirra er gríðarlega mikilvægur í gegnum erfiðar meðferðir.
Fyrir sólarhringsdvöl á sjúkrahóteli greiða sjúklingar 1.890 kr. á sólarhring með fæði. Fyrir aðstandanda kostar gistingin 1.890 kr. og fæði 4.970 kr. á sólarhring. Sólarhringurinn getur því kostað allt að 8.750 kr. Margir þurfa því miður að dvelja langdvölum fjarri heimili sínu vegna lyfja- og/eða geislameðferða og dæmi eru um að einstaklingar hafi þurft að greiða yfir 500.000 kr. á ári fyrir dvöl á sjúkrahóteli vegna nauðsynlegra meðferða sem þeir geta ekki sótt í sinni heimabyggð.
Til samanburðar má nefna að þurfi sjúklingur að nýta heilbrigðisþjónustu erlendis taka Sjúkratryggingar þátt í kostnaði vegna uppihalds sjúklings og aðstandenda með greiðslu dagpeninga eftir ákveðnum reglum.
Frá þessu segir á krabb.is
Nýjast
-
Glæsileg A-álma tekin í notkun í Glerárskóla
Ný og endurbætt A-álma hefur verið tekin í notkun í Glerárskóla. Gestum bauðst að líta á þær heilmiklu breytingar sem gerðar hafa verið á álmunni, en húsnæðið hefur verið endurnýjað á þann hátt að miklar breytingar hafa verið gerðar á vinnuumhverfi nemenda og starfsfólks. -
Fiskur frá smábátum dregur úr afköstum landvinnslunnar og bónusar starfsfólks lækka
Afköst í fiskvinnsluhúsum Samherja dragast verulega saman þegar keyptur er afli af strandveiðibátum til vinnslu. Starfsmaður sem hefur unnið í tæpa fimm áratugi hjá Útgerðarfélagi Akureyringa segir sláandi mun á gæðum hráefnis frá smábátum og togurum sem veiða á djúpslóð. Bónusar fiskvinnslufólks lækka þegar unninn er afli frá smábátum því mun tímafrekara er að verka fiskinn. -
Af slúbbertum og svörtum sauðum
Vísir birti nýlega frétt um nýútkomna skýrslu Viðskiptaráðs þar sem fjallað er um uppsagnarvernd opinberra starfsmanna. Sá sem fréttina ritar kýs að reyna að fá fleiri „smelli“ með því að leggja skýrsluhöfundi orð í munn eins og að kalla opinbera starfsmenn „slúbberta“. -
Félag eldri borgara á Akureyri sækir um lóðir við Þursaholt Hafnað því ekki er búið að ákveða hvernig á að úthluta lóðunum
Akureyrarbær hefur ekki tekið ákvörðun um hvernig lóðum við Þursaholt verður úthlutað. Umsókn Félags eldri borgara á Akureyri, EBAK sem sótti um lausar lóðir á svæðinu var því hafnað. -
Ofurþéttingarárátta samtímans
Skipulagsráð Akureyrarbæjar hefur lagt til að bæjarstjórn samþykki tillögu að breytingu á aðalskipulagi 2018-2030. Í greinargerð segir að gert sé ráð fyrir að uppbygging hefjist fyrst á svokölluðum Tjaldsvæðisreit auk þess sem unnið verði að undirbúningi uppbyggingar til blandaðrar landnotkunar á Akureyrarvelli. -
Fyrsta beina flug sumarsins til Amsterdam
Í dag er fyrsta beina flug sumarsins til Amsterdam, en það er á vegum Verdi Travel og Transavia Flogið verður vikulega á fimmtudögum, til 14. ágúst n.k. -
Ríkið tekur – landsbyggðirnar fá minna
Hjálmar Bogi Hafliðason skrifar -
Þegar samfélagið þagnar
Benóný Valur jakobsson skrifar -
Fólk greiðir hundruð þúsunda í dvalarkostnað vegna heilbrigðisþjónustu
Aðalfundur Krabbameinsfélagsins skorar á heilbrigðisráðherra að endurskoða greiðsluþátttöku vegna sjúkradvalar innanlands og tryggja, til dæmis með greiðsluþaki, að kostnaður sjúklings og aðstandenda vegna nauðsynlegrar dvalar á sjúkrahóteli sligi ekki fólk af landsbyggðinni.