Alzheimersamtökin með fræðslu á Norðurlandi
Eitt af meginmarkmiðum Alzheimersamtakanna er að auka þekkingu og dýpka skilning á þeim áskorunum sem einstaklingar með heilabilun og aðstandendur þeirra standa frammi fyrir. Þau halda því reglulega fræðsluerindi víðsvegar um landið.
Nú er förinni heitið norður þar sem haldin verða þrjú fræðsluerindi. Eitt á Húsavík, annað á Dalvík og það þriðja á Akureyri. Þar verður starfsemi Alzheimersamtakanna kynnt og fjallað um heilabilun og samskipti.
Fyrsti fræðslufundurinn verður á Húsavík í Hlyn, félagsaðstöðu eldri borgara á mánudag, 2. júní kl. 17. Þá verður fundur í Bergi menningarhúsi á Dalvík á þriðjudag, 3. júní kl. 19:30 og sá þriðji og síðasti verður í félagsmiðstöðinni Sölku á Akureyri á miðvikudag, 4 júní kl. 17.
Þeir sem mæta öðlast skilning á heilabilun og hvernig megi bregðast við breyttum aðstæðum. Þá verður farið yfir leiðir til að auðvelda samskipti og hugmyndir fyrir ánægjulegar samverustundir reifaðar.
Thelma Jónsdóttir, fræðslustjóri og Ásta Kristín Guðmundsdóttir, ráðgjafi samtakanna mæta á fundinum Á fundinum á Dalvík verður Elísa Rán Ingvarsdóttir, hjúkrunarforstjóri Dalbæjar, einnig með stutt erindi og kynnir m.a. þróunarverkefnið Gott að eldast. Á Akureyri verður Björg Jónína Gunnarsdóttir, Alzheimertengill á Akureyri með kynningu á starfinu þar í bæ.
Fyrirlestrarnir eru opnir öllum áhugasömum og aðgangur ókeypis.
Nýjast
-
Sýning á Iðnaðarsafni í tilefni af 80 ára afmæli ÚA
Útgerðarfélag Akureyringa heldur um þessar mundir upp á 80 ára afmæli sitt, félagið var formlega stofnað 26. maí árið 1945. Aðeins fyrr eða um miðjan mars hafði verið boðað til undirbúningsfundar þar sem áhugi fyrir stofnun útgerðarfélags í bænum var kannaður. -
Hvatningarverðlaun Eyrarrósarinnar í Þingeyjarsveit
Verkefnið Afhverju Ekki hlaut Hvatningarverðlaun Eyrarrósarinnar 2025! Afhverju Ekki, einnig nefnt „The Absolutely Everything Studio“, er þverfaglegt vinnustofu-rannsóknarsetur sem stofnað var árið 2024. Verkefnið er leitt af Dr. Jack Armitage fræði- og listamanni. Afhverju Ekki stuðlar að samvinnu og samstarfi með það að marki að finna lausnir á flóknum vistfræðilegum viðfangsefnum. Setrið er staðsett í Breiðanesi, á Laugum í Þingeyjarsveit. Þegar hefur verið tekið á móti sex fræði- og listamönnum sem komið hafa til vinnudvalar og unnið að hönnun, hugbúnaðarþróun og listsköpun, meðal annars fyrir sýningu Íslands á Feneyjartvíæringnum í arkitektúr. -
VMA- Aldrei jafnmargir nemendur brautskráðir á einu skólaári
Alls voru brautskráðir 186 nemendur frá Verkmenntaskólanum á Akureyri við athöfn síðastliðinn laugardag. Þeir voru af tuttugu námsbrautum auk meistaranáms að loknu sveinsprófi. -
ÚA 80 ára - Gjörið svo vel, gangið í bæinn
Í tilefni af 80 ára afmæli Útgerðarfélags Akureyringa er almenningi boðið að kynna sér starfsemi ÚA við Fiskitanga á Akureyri, laugardaginn 31. maí frá klukkan 11:00 til 13:00. -
Þokkabót fagnar afmæli sínu á Græna hattinum
Rúm 50 ár eru nú liðin frá stofnun hljómsveitarinnar Þokkabótar. Fyrsta plata þeirra, Upphafið, kom út 1974. Hún vakti mikla athygli fyrir beitta texta, grípandi lög og geðgóðan flutning. Þekktasta lagið var „Litlir kassar“ og var einkennandi fyrir þá geðgóðu þjóðfélagsrýni sem einkenndi sveitina okkar á milli. -
Þingeyjarsveit - Dagbjört S. Bjarnadóttir heiðruð á aðalfundi Félags íslenskra hjúkrunarfræðinga
Þann 15. maí sl. var aðalfundur Félags íslenskra hjúkrunarfræðinga haldinn á Hilton Reykjavík Nordica. Dagbjört S. Bjarnadóttir var þar heiðruð þar sem hún hlaut hvatningarstyrk ásamt fjórum öðrum hjúkrunarfræðingum fyrir þeirra framlag í greininni. -
Kvennakórinn Embla ásamt hljómsveit flytja Messu fyrir særða jörð
Kvennakórinn Embla ásamt hljómsveit, Þórunni Ósk Marínósdóttur violuleikara og Erlu Dóru Vogler mezzosópran flytja Messu fyrir særða jörð eftir tónskáldið Ketil Björnstad og textahöfundinn Erik Hillestad. Tónleikarnir verða í Glerárkirkju sunnudaginn 1. júní kl 17. Stjórnandi er Roar Kvam. -
Alzheimersamtökin með fræðslu á Norðurlandi
Eitt af meginmarkmiðum Alzheimersamtakanna er að auka þekkingu og dýpka skilning á þeim áskorunum sem einstaklingar með heilabilun og aðstandendur þeirra standa frammi fyrir. Þau halda því reglulega fræðsluerindi víðsvegar um landið. -
,,Slökkviliðið frábær vinnustaður"
Eydís Sigurgeirsdóttir sem hefur unnið hjá Slökkviliði Akureyrar í sjö ár, er i viðtali á Fb síðu Akureyrarbæjar í dag undir liðnum Akureyringur Vikunnar. Eydís kláraði bráðatækninám, ásamt samstarfskonu sinni Bryndísi Elvu Bjarnadóttur, frá NMETC í Massachusetts í febrúar.